Kolose 3:23 - En Taar Weru a nunuwu' é Tontemboan

²³ Sapake' mangé en émaan iow, tawoieno mangé en itu ang karapi in lekep en até, meputéo kamu sumelewir a si Casuruan, ra'ica sumelewir sé tou.

Kolose 3:23 ပူးပေါင်းရင်းမြစ်များ

Matius 6:16

“Sa kamu mengapuasa, tioo en amo miow susa tanu sé tou punek. En amo éra mapa in susa kéndoon, wosama' sérén é tou sapaoka séra ang karoro'an i mapuasa. En ulitna icua-Ku mangé ai camu, siituo en laasa si kinéréano éra.

Roma 14:6

Si tou maanggap si esa endo en lébé pentingai wo sé endo walina, niéma'na en itu e rumayo wo sumiri' si Casuruan. Wo si tou ro'na kuman pakasa ing kakanen, niéma'na en itu e rumayo wo sumiri' si Casuruan, ampa'paan an tutuw ra'ipé' icuman, sia mééo i makapulu'sama' a si Amang Kasuruan. Wo si tou kuman in séndéénke', niéma'na en itu e rumayo wo sumiri' si Casuruan wo sia ka'i kumua i makapulu'sama' a si Amang Kasuruan.

Roma 14:8

Sa kita menonou, kita menonou torona i Casuruan. Wo sa kita maté, kita maté torona i Casuruan. Anaé, menonou kuma'pa maté, kita anu i Casuruan.

Efesus 5:22

Éi wéwéné sé kinawéngo, lume'te-le'teko mangé a si penanaanmu, meputé kamu le'tek a si Casuruan.

Kolose 3:17

Wo sapake' mangé en émaan iow kuma'pa icua miow, émaano mangé waya en itu kumiit ing kasalé'an i Apo' Yesus, ang karapi i makua makapulu'sama' a si Amang Kasuruan, Amangta, ampa'paano i Yesus Kristus.

1 Petrus 1:22

Kamu lume'naso in owak iow ang karapi in le'tek mengaéma' in sususuien wutul i Amang Kasuruan, akar kamu makawoo mengaupus sé poo-poow an esa paémanen ang karapi i mauli-ulit. Anaé sina'uenku kamu wosama' kamu meupu-upusan ang karapi in lekep en até.

1 Petrus 2:13

Kamu sé makiit si Casuruan musti male'te-le'tek angé a sé maperénta si makatimboi ing kawasa. Male'te-le'tek angé a si colano si makatimboi ing kakawasaan rumangka-rangka',

1 Petrus 2:15

Ampa'paan icasalé' i Amang Kasuruan kamu méma' sé loor, wosama' si tou ra'ica wana eng kailekan andumoro' ing kasalé'an-Na, sia ra'io ka'i memaa-maar sé ra'ica wutul andumoro' icamu.