Kolose 2:15 - En Taar Weru a nunuwu' é Tontemboan

¹⁵ Ang kayu salip itu, pakasa é roh sé maperénta wo e roh sé makakawasa kinalao i Kristus. Niéma'-Na séra tanu tou pakawa'kesen, mawaya' makiit an somoi-Na. Séra mamuali séséro'en é tou an tutuw si Kristus muntung.

Kolose 2:15 ပူးပေါင်းရင်းမြစ်များ

Matius 12:29

Kuma'pa tumambisa réén si esa tou ro'na muntep am balé i esa tou enté' e mandét ing kasiyaanna, sa ra'ica wa'kesenna owo si tou enté' itu? Pakawa'kesenna mio' sia wo ro'nao andétenna waya sé an untep im balé itu.

Lukas 10:18

Icua i Yesus ai séra, “Én. Sinéré-Kuo si kikiiten é sétang ilumepok an langit owo tanuoka kilat.

Lukas 11:22

Taan sa awéan esa tou en lébé keter mai sumundur wo kumala si makawalé itu, eng kasiwakana pakasa en lulutaw pawerotenna ro'na lumoindong isia, andéten oka i tou lébé keter itu. Wo pakasa eng kasiyaan sé an untep im balé itu rombiten oka i tou lébé keter itu wo yéké-ékéna a sé kara-karapina.

Yohanes 16:11

Katelu, ituru'-Na oka a sé tou sapaoka sé tou mengaéma' ing kamesé-meséaan tantu ukumen, ampa'paan si kikiiten é sétang si cumawasa ing kayo'baan anio' aitantuo in ukumen.

Yohanes 19:30

Keepé'-Na in anggor esem itu, icua-Na, “Malekepo!” Wo icuru-Na en do'kos wo isarakan-Na e mu'kur-Na.

1 Korintus 15:24

Kumawus in itu eng kayo'baan maka'pu oka. Wo asi témpo itu ka'i pakapaté-patén i Kristus pakasa sé maperénta, pakasa sé makatimboi ing kakawasaan wo ing kaketeran. Wo isarakan-Na oka eng kakawasaan-Na tanu Kolano a si Amang Kasuruan, Amang-Na.

2 Korintus 2:14

Taan makapulu'sama' a si Amang Kasuruan. Sia maaki- akin icami akar imuntung ampa'paan i Kristus. Pakén i Amang Kasuruan icami wosama' sé tou am bisa-wisa makatuus si Kristus. Anaé, em paselewir ami tanu im bou manam si pengakawouan am bisa-wisa.

2 Korintus 4:4

Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

Efesus 3:10

Em basa-Na en tumuru' im pawasa-wasan ing kapinteran-Na si wangko' itu a sé malaékat sé maperénta wo sé makakawasa an sorga. Wo eng kapinteran-Na intarépé' icua oka é jamaat ai séra.

Efesus 4:8

Ampa'paan in itu ang Kitap Le'nas aipatic in tana'i, “An tutuw Sia sumosor angé asi tampa rumangka-rangka', wali-Na mangé sé kaséké' sé kinala-Na wo a sé tou-Na wéan-Na wéwéé.”

Efesus 6:12

Ampa'paan kita merang ra'ica sumundur sé tou, taan en sundurenta itu sé maperénta, wo sé makakawasa wo sé kawasa ing kayo'baan si riréimbeng anio' wo sé roh léwo' an langit.

Kolose 1:16

Ampa'paano si Kristus, akar émaan i Amang Kasuruan pakasa sé ang kayo'baan wo sé an sorga, pakasa sé kaséréan wo sé ra'ica kaséréan, tanumai palukutan pasiri-siriin kuma'pa kakolanoan, roh sé maperénta kuma'pa sé makakawasa. Em baya-waya niéma' i Amang Kasuruan ampa'paano si Kristus wo torona i Kristus.

Kolose 2:10

Wo ampa'paan kamu meesao wo si Kristus, kamu ka'i niéma'o lekep. Siao si capala si cumawasa sé maperénta wo sé makakawasa.

Ibrani 2:14

Sé tou patuulen i Yesus toya-toyaang itu, séra asaloke' tou si ro'na maté. Anaé, si Yesus imamuali tou wo menonou meputé wo sé tou, wosama' em papaté ro'na sangkumen-Na kaputé in tou. Wo ampa'paano im papaté-Na itu, ro'na kalan-Na si kikiiten é sétang si makakawasa im papaté.

Wahyu 12:9

Si naga wangker ituo si ula' matu'a, si patuulen kikiiten é sétang kuma'pa Roh léwo', si mengasélé'kow pakasa in tou ang kayo'baan. Sia itu aiténdél ang kayo'baan mewali-wali wo sé malaékatna.

Wahyu 20:10

Wo si kikiiten é sétang si sumélé'kowo sé tou itu, iténdél an untep in ta'sic api wo walélang. An tampa ituo en tinéndélan si binatang wo si nabi ra'ica wutul. Wo am bitu séra niokoi endo wo em bengi akar ing kauré-uré.