Kolose 1:27 - En Taar Weru a nunuwu' é Tontemboan

²⁷ Wo Sia masalé' kumua a sé tou-Na sapaoka sé icaenepé' itu uli-ulit loor wo wangko' asé pakasa in tou sé ra'ica Yahudi. Sé ipakaenep itu tana'i, si Kristus an atéo miow, eng kaangéanna kamu awéan paarapen makéré im bagéan asi rarayo wo in sisiri' asi Amang Kasuruan owo.

Kolose 1:27 ပူးပေါင်းရင်းမြစ်များ

Matius 13:11

Isowat i Yesus, “Si Amang Kasuruan imééo mai ing kamang tatambér ai camu e makailek in sususuien sé icaenepé' andumoro' ing Kakolanoan in Sorga, taan ai séra ra'ica.

Lukas 17:21

Anaé, ra'ica wana tou e ro'na kumua, ‘Sérénai, Sia am bia'i’ kuma'pa ‘Sérén angé, Sia a mangé mbitu!’ En ulitna, si Amang Kasuruan Kumawasao tanu Kolano an uner iow ang kayo'baan anio'.”

Yohanes 14:17

Si Matawang ituo si Roh Le'nas si mengawali icamu a si sususuien wutul andumoro' si Amang Kasuruan. Sé tou ang kayo'baan ra'ica tumerima Sia, ampa'paan séra ra'ica isuméré Sia wo ra'ica makatuus Sia. Taan kamu makatuus Sia ampa'paan Sia mewali-wali wo icamu intarépé', wo Sia mento' oka an untep in até miow i esa wo si esa.

Yohanes 14:20

An tutuw-Ku tumou sumawel, kakailekan oka miow sapaoka Yaku meesa wo si Amang, wo icamu meesa wo Yaku wo Yaku meesa ang karapi miow.

Yohanes 14:23

Isowat i Yesus ai sia, “Si tou mengaupus Yaku, tantu émaanna oka en taar-Ku, wo sia icaupus oka i Amang-Ku. Yaku wo si Amang-Ku maai oka ai sia wo mento' ang karapina.

Yohanes 17:26

Aicua-Kuo ai séra si séi si Amang en ulitna, wo ipengua-ngua-Ku oka melala'us andumoro si Amang. Wo in taniitu séra maupus oka sé tou walina tanu si Amang mengaupus Yaku wo Yaku meesa wo iséra.”

Yohanes 6:56

Si séike' eng kuman in owak-Ku wo melep in enda'-Ku, si tou itu menonou ang karapi-Ku, wo Aku mewali-wali wo isia.

Roma 11:33

Ulit ra'io icakua eng kasiyaan, eng kapinteran wo eng kakailekan i Amang Kasuruan. Ra'ica wana mandé esake' en tou e ro'na makailek sé pinusé'-Na, wo ra'ica wana ka'i mandé esake' tou e ro'na makailek im pakatawoi-Na.

Roma 2:4

Si Amang Kasuruan itu en até-Na sama', talesen wo wuta ing kaupusan. Taan tioo paepesen iow im beren em pakasa in itu wo mawerot ra'io sangali mape'dis! Ra'ica réén kailekan iow sapaoka ituru' i Amang Kasuruan eng kasamaan in até-Na itu wosama' kamu mape'dis ang kamesé-meséaan?

Roma 5:2

Wo ampa'paan kita maéman a si Yesus, kita imakéré in upus aitambér i Amang Kasuruan. Wo ampa'paan in upus aitambér ituo kita menonou intarépé'. Wo kita maaru-arui ampa'paan makaanu im paarapen sapaoka kita makéré oka bagéan a rarayo wo in sisiri' asi Amang Kasuruan owo.

Roma 8:10

Taan sa si Kristus an owak iow, mandé ka'i en owak iow maté ampa'paan ing kamesé-meséaan, e roh miow kasake' menonou ampa'paan kamu nianggapo wutul i Amang Kasuruan.

Roma 9:23

Sia talesen ai séra wosama' Sia ro'na tumuru' ing kawangko' i rarayo wo in sisiri'-Na a sé tou icaupus-Na, sé aitu'tul-Nao indioré' owo a sé tou en tumerima in itu.

1 Korintus 3:16

Ra'ipé' réén kailekan iow sapaoka kamu itu tanu Walé i Amang Kasuruan wo e Roh i Amang Kasuruan makaento' ai camu?

2 Korintus 2:14

Taan makapulu'sama' a si Amang Kasuruan. Sia maaki- akin icami akar imuntung ampa'paan i Kristus. Pakén i Amang Kasuruan icami wosama' sé tou am bisa-wisa makatuus si Kristus. Anaé, em paselewir ami tanu im bou manam si pengakawouan am bisa-wisa.

2 Korintus 4:17

Wo eng kawenduan sé papendamen ami intarépé' ra'ica uter wo ang karoro'anke'. Taan teriman ami oka eng kaaruian si ra'io icakua wo eng kaaruian itu akar ing kauré-uré. Eng kaaruian itu ilumébé mai wo ing kawangko' sa ipeputé wo ing kawenduan si pinendam ami mai.

2 Korintus 4:6

Indior si Amang Kasuruan icumua in tana'i, “Asi kariréimbengan mantangai en sendot.” Intarépé' Siao ka'i iméma' in sendot-Na matélang an untep in atéta. Ampa'paano in sendot-Na si an untep in atéta, ro'na kailekanta eng kawangko' i Amang Kasuruan si masendot ang gio i Kristus.

2 Korintus 6:16

Awéan réén em puténa walé i Amang Kasuruan wo im paapo'an é opo-opo'? Kita anio' walé paento'an i Amang Kasuruan si menonou. Si Amang Kasuruan in esa icumua: “Mento' oka Aku an uner éra wo menonou mewali-wali wo iséra. Yaku mamuali oka Amang Kasuruan éra, wo séra mamuali oka tou-Ku.”

Galatia 2:20

Intarépé' ang katouanku, ra'io ka'i yaku e menonou, taan si Kristuso si menonou a yaku. Eng katouanku ang kayo'baan anio' katouan si aituuro am paémanen a si Toyaang i Amang Kasuruan si mengaupuso yaku wo isumarakan in owak-Na toronaku.

Galatia 4:19

Éi toya-toyaang sé caupusku, ampa'paan maindé' in andumoro' icamu, yaku ka'i mawendu puté wo ing kawenduan si pinendamo mai i esa wéwéné tutuw makéré toyaang. Yaku mawendu oka melala'us tanu siitu akar em peri i Kristus kaséréan an owak iow.

Efesus 1:7

Ampa'paano in enda' i Yesus Kristus wo ampa'paan kita meesao ang karapi-Na, icita tinu'buso, eng kaangéanna kita niampungano ang kamesé-meséaanta. Wo siituo en upus wangko' si aitambér i Amang Kasuruan ai cita.

Efesus 2:22

Ampa'paan i Kristus, kamu sé tou ra'ica Yahudi ka'i winangun mewali-wali wo sé tou Yahudi mamuali paento'an i Amang Kasuruan. Am bitu Sia mento' tanu Roh.

Filipi 4:19

Si Casuruanku oka e mawesai im pakasa sé paperlun iow iciit ing kasiyaan-Na si ra'ica maka'pu, ampa'paan kamu meesao wo si Kristus Yesus.

Kolose 1:5

Kamu maéman wo mengaupus taniitu ampa'paan kamu maarap wo mengento-ngento' sapa sé aitu'tu'o i Amang Kasuruan torona miow an sorga. Em paarapen itu liningao miow an tutuw in sususuien wutul ipakua-kuao ai camu. Siituo en Abar Kaaruien andumoro' i Yesus Kristus.

Kolose 2:3

Wo si Kristus ituo e ro'na muka' im pawero-werotenta akar kita ro'na makailek pakasa ing kapinteran asi Amang Kasuruan owo wo makailek sé indior ipaene-enep-Napé'.

Kolose 3:11

Wo in taniitu, kamu sé mamualio weru, ra'io wana em bédana, tou Yunani kuma'pa tou Yahudi, tou sinunat kuma'pa tou ra'ica sinunat, tou Barbar kuma'pa tou Skit, ata kuma'pa ra'ica ata, pakasa waya puté. Taan si penting keli si Kristus wo Sia menonouo an owak iow im baya.

1 Timotius 1:1

En surat anio' a yaku owo Paulus, si mamualio ruru'du'an i Kristus Yesus kumiit im perénta i Amang Kasuruan Si Lumolowirta wo si Kristus Yesus si paarapenta.

Ibrani 6:19

Em paarapenta itu ayandé tanu in jangkar keter wo aman torona i mu'kurta. Em paarapen itu makawali icita lumangkoi angé ing kaéng pengakawu', am pauntepan asi Kamar Lume'na-le'nas an sorga.

1 Yohanes 4:4

Toya-toyaangku, kamu itu asi Amang Kasuruan owo. Kamu icumalao sé nabi ra'ica wutul itu, ampa'paan e Roh ai camu itu eng kawasana en lébé wangko' mai wo si roh asi cayo'baan anio'.

Wahyu 3:20

Séréno! Yaku makatulung an dior im papalen wo tuméngkor. Sa awéan tou luminga in suara-Ku wo muka' im papalen, muntep oka Aku meta'up wo isia, wo kuman mewali-wali wo isia, wo sia kuman mewali-wali wo Yaku.