Kisah Para Rasul 9:39 - En Taar Weru a nunuwu' é Tontemboan

³⁹ Kelinga in itu, si Petrus makala'us tumu'tul wo mangé ang karapi éra. Icateka' mangé am bitu, iwali éra sia ang kamar an dangka'. Wo pakasa sé wéwéné balu tumulung rumuru mangé a si Petrus. Wo ang karapi i mengamé-ngamé' ituru' éra ai sia pakasa eng karai wo en juba si niéma'na tutuw i menonou.

Kisah Para Rasul 9:39 ပူးပေါင်းရင်းမြစ်များ

Matius 17:17

Wo icua i Yesus, “Éi camu tou léwo' wo tou ra'ica maéman! Akar kawisa réén Aku musti mewali-wali wo icamu? Wo akar kawisa Aku musti talesen ai camu? Paalino mai si toyaang itu!”

Matius 26:11

Ampa'paan sé tou lengéi tatap ang karapi miow wo séra ro'na tawangen iow. Taan Aku ra'io uré mewali-wali wo icamu.

Markus 14:8

Si wéwéné anio' iméma'o sapa si ro'na émaanna. Ninaamnao in solo mawou manam en owak-Ku, tanu tumu'tulo i mayat-Ku e mangé icubur.

Lukas 24:44

Makakanai Sia wo icua-Na ai séra, “An tutuw-Ku i mewali-walipé' wo icamu, sumangkumo icua-Ku ai camu, sapaoka pakasa en aipatic andumoro' Yaku ang Kitap Torat, ang kitap é nabi wo ang kitap Mazmur, musti mamuali.”

Yohanes 12:8

Ampa'paan sé tou lengéi kasake' mewali-wali wo icamu, taan Aku ra'ica' oka tatap mewali-wali wo icamu.”

Yohanes 17:12

Ang kauré-Ku imewali-wali wo iséra, tinéiran-Ku mai séra ang karapi ing kawasa-Mu si aiwéé-Mu a Yaku, wosama' ra'ica wana esaan tou ai séra e maté, aluar si esa si aitantuo imaté. Wo in taniitu sapa si aipatico ang Kitap Le'nas imalekepo.

Kisah Para Rasul 1:13

An tutuw éra icateka' mangé an Yerusalem, séra mangé an tampa linoséran éra wo sumosor angé an esa kamar an dangka'. Séra itu: Si Petrus wo si Yohanes, si Yakobus wo si Andreas, Si Pilipus wo si Tomas, si Bartolomeus wo si Matius, si Yakobus toyaang i Alfeus, si Simon tou Zelot, wo si Yudas toyaang i Yakobus.

Kisah Para Rasul 20:35

Pakasa sé niéma'kuo itu, mééo esa tuus ai camu sapaoka ang karapi in tumawoi le'tek tanu siitu, ro'na sémbonganta sé tou lembi. Wo musti ta'néienta si aicua i Apo' Yesus in tana'i, ‘Lébé arui mengawéé wotaré mengaterima.’ ”

Kisah Para Rasul 6:1

Sé tou mengakiit in sususuien i Yesus makaaweso eng kakeli. An tutuw itu sé tou Yahudi sé manuwu' i nunuwu' é Yunani mangingimbulu a sé tou Yahudi sé menganuwu' i nunuwu' é Ibrani. Ampa'paan sé wéwéné balu é tou Yahudi menganuwu' i nunuwu' é Yunani itu, ra'io pawéan rékén é tou an tutuw mengaéké ing kaperluan mengendo-ngendo.

Kisah Para Rasul 8:2

Sé tou le'tek a si Amang Kasuruan mangé mindo i mayat i Stefanus wo icubur wo séra maamé' akar in sesendu'an oka.

Kisah Para Rasul 9:41

Timboian i Petrus eng kamana wo atasanna in tumulung. Wo towan i Petrus sé tou le'nas itu wo sé wéwéné balu, ituru'na ai séra sa si Tabita tinouna sumawel.

2 Korintus 8:12

Sa kita mawéé ang karapi in lekep en até, teriman oka i Amang Kasuruan sapa sé aiwééta kiit ing kawooanta. Ampa'paan si Amang Kasuruan ra'ica kawisa mako tumuntut ai cita e méé si ra'ica kawooanta.

Efesus 4:28

Si tou si sumangkumo rumombit, yentoo mio' marombit. Aweso taré sia rumaméji tumawoi sapake' sé loor ang karapi ing kamana in esa, wosama' sia makaanu in sapa-sapake' si ro'na iwéténg a sé tou lengéi.

1 Tesalonika 1:3

Susur ami sumombayang a si Amang Kasuruan Amangta, pena'né-na'néien ami em pakaselewir iow ampa'paan kamu maéman a si Yesus. Kata'néian ami tambisa kamu maselewir a sé tou walina ampa'paan séra icaupus iow. Kata'néiané' ami mandé ka'i kamu talesen meta'up ing kawenduan, pengaraméjin iow mengaéma' sé loor ampa'paan maara-arapke' a si Yesus Kristus Apo'ta.

1 Tesalonika 4:13

Poo-poow, sa awéan tou maté, ra'ica kiim ami kamu mawendu keli kaputé sé tou ra'io wana em paarapen. Ampa'paan in itu, icasale' ami kumua ai camu sapa si mamuali oka a sé tou matéo.

1 Timotius 5:3

Pawéanmu mio' rékén sé balu wéwéné sé uli-ulit pinatéano i penanaanna wo ra'io wana sé masémbo-sémbong.

1 Timotius 5:5

Si balu wéwéné si ra'ica wana toyaang wo ra'ica wana poyo' en suma'li, sia asalo mamangén a si Amang Kasuruan. Endo wo em bengi sia menomba-nombayang meki-kiupus a si Amang Kasuruan.

1 Yohanes 3:18

Toya-toyaangku, tioo kita ma- upus asaloke' am ba'ba' kuma'pa asaloke' a nunuwu', taan mayoo kita meupu-upusan ang karapi im pengaémaan wo lekep en até.