Kisah Para Rasul 9:2 - En Taar Weru a nunuwu' é Tontemboan

² e mangilek surat kawasa em paalin am balé-walé paapo'an é agama Yahudi an Damsyik wo sa ipeta'upna sé tuama kuma'pa wéwéné sé makiit in sususuien i Yesus, séra tangkaanna wo paalinna an Yerusalem.

Kisah Para Rasul 9:2 ပူးပေါင်းရင်းမြစ်များ

Matius 10:17

Kamu musti maténga-téngam a sé pakasa in tou! Ampa'paan awéan oka tou en sumarakan icamu an sidang agama wo samboken oka éra kamu am balé-walé paapo'an éra.

Yohanes 14:6

Wo icua i Yesus, “Yakuo en lalan maangé a si Amang Kasuruan, Yaku ka'i si mengakua in sususuien wutul andumoro' i Amang Kasuruan, wo Yaku ka'i si mengawéé mai ing katouan akar ing kauré-uré. Ra'ica wana esake' tou e maai a si Amang sa ra'ica ipakawali-Ku.

Kisah Para Rasul 18:25

Wo ka'i tinerimanao en sususuien andumoro' i Apo' Yesus. Sia incaya' keli masisil andumoro' i Yesus wo pakasa em pasisilna ra'ica wana en suméa'. Mandé ka'i in taniitu, em baptisan kailekanna asaloke' im baptisan i Yohanes Mabaptis.

Kisah Para Rasul 19:23

An tutuw itu, an Efesus imarinca'o ampa'paan en sususuien andumoro' im basa i Amang Kasuruan en lumowir sé tou, ra'ica icasalé' é tou.

Kisah Para Rasul 19:9

Taan awéan piraan tou ra'ica kiim tumerima in sususuien i Paulus ampa'paan séra keté até. Wotaré ipemaa-maar éra in léwo' an dior é tou keli andumoro' im basa i Amang Kasuruan en lumowir sé tou iméma' ing kamesé-meséaan. Ampa'paano in itu itela'u i Paulus séra wo towanna sé tou maéman a si Yesus kumesot am balé paapo'an é agama Yahudi. Wo susur in endo sia maroma' ang karapi é tou am pakuliaan, si ningaranan Tiranus.

Kisah Para Rasul 24:14

Taan an dior i tuang, pangakunku sapaoka yaku maapo' a si Amang Kasuruan si paapo'an é apo-apo' ami ang karapi i makiit in sususuien i Yesus Kristus. En sususuien itu pengatuulen éra sususuien imasélé'kow. Percayanku ka'i waya sé aipatic an ukum Torat wo sé ang kitap é nabi.

Kisah Para Rasul 24:22

Kekawus i Paulus kumua in taniitu, si gubernur Feliks si makailek wutul in sususuien i Yesus Kristus, en lumando woo im perkara itu. Icuana, “Em perkara miow, puséénku oka sa si Lisias si kikiiten é suraro Romawi icateka'o am bia.”

Kisah Para Rasul 26:10

En itu émaanku ka'i an Yerusalem. An tutuwku imakéréo kawasa asé kikiiten é imam, tangkaanku sé tou le'nas wo yuntep am bui. Énanku ka'i séra makéré in ukuman patén.

Kisah Para Rasul 26:12

Icua ka'i i Paulus, “Asi makasa aku makéré surat kawasa asé kikiiten é imam owo e mangé an Damsyik.

Kisah Para Rasul 6:9

Am bitu awéan ka'i piraan tou Yahudi ang Kirene owo wo an Aleksandria, wo awéan piraan ka'i mai ang Kilikia wo an Asia owo. Séra itu indior sumangkumo mamuali ata é tou taan intarépé' ra'io. Em balé paapo'- an éra makangaran ‘Walé paapo'an é tou sé indior sumangkumo mamuali ata.’ Ra'ica icasalé' éra si Stefanus, ampa'paan in ituo séra meindoan roma' wo sia.

Kisah Para Rasul 7:19

Si colano itu mengauwak wo mengoko-ngokoi sé apo-apo'ta. Leséénna sé apo-apo'ta en tumiya' sé toyaang sé makatoué' mai wosama' sé toyaang itu maté.

Kisah Para Rasul 9:14

Wo intarépé' sia imayo am bia'i. Sia imakéréo surat kawasa asé kikiiten é imam an Yerusalem, en tumangka' sé tou maéman a si Apo' Yesus am bia'i.”

Kisah Para Rasul 9:21

Wo pakasa é tou sé iluminga si Saulus mangaya-ngaya'ka' wo kumua, “Ra'ica réén sia si mengapaté sé tou maéman a si Yesus an Yerusalem? Ra'ica réén sia mai en tumangka' sé tou maéman a si Yesus wo paalin a sé kikiiten é imam?”

2 Korintus 11:32

An tutuwku ang kota Damsyik, si gubernur si niangkai i colano Aretas masalé' tumangka' yaku wo irumu'du' sé suraro en tuméir im papalen ing kota itu.

Galatia 1:17

Yaku ka'i ra'ica mangé an Yerusalem e meta'- up wo sé tou en diorai mamuali ruru'du'an wo yaku. Taan aku mangéke' an tana' Arab, wo am bitu oka aku maréng sumawel ka'i an Damsyik.