Kisah Para Rasul 8:12 - En Taar Weru a nunuwu' é Tontemboan

¹² Taan intarépé' séra luminga si Filipus makua in Abar Kaaruien andumoro' si Amang Kasuruan Kumawasa tanu Kolano wo andumoro' i ngaran i Yesus Kristus. Kelinga éra in itu wo séra maéman wo méé in owak em baptisen, séra itu tuama wo wéwéné.

Kisah Para Rasul 8:12 ပူးပေါင်းရင်းမြစ်များ

Matius 28:19

Ampa'paano in itu, mangém am pakasa im bangsa, wo émaano mangé séra mamuali murit-Ku. Baptiseno mangé séra ang karapi ngaran i Amang, i Toyaang wo i Roh Le'nas.

Lukas 9:2

Kumawus angé in itu, yutus-Na séra mangé kumua in abar andumoro' i Amang Kasuruan Kumawasa tanu Kolano wo ka'i sumama' sé tou sumakit.

Lukas 9:60

Wo isowat i Yesus ai sia, “Si tou ra'ica maéman a Yaku ipeputé wo sé tou imatéo. Anaé, iwayao mio' sé tou ra'ica maéman a Yaku mangé kumubur si tou imaté. Taan ko mangém wo ipakua-kuao mangé andumoro' ing Kakolanoan i Amang Kasuruan am bisa-wisake'.”

Kisah Para Rasul 1:3

Kekawus-Na imaté wo tumou sumawel, Sia menguri-nguri mapaturu' in owak-Na ai séra epat ngapulu' ngando eng kauréna, wo méé kelian tuus en tumuru' sapaoka Sia uli-ulit tumou sumawel. Wo Sia makua andumoro' si Amang Kasuruan kumawasa tanu Kolano.

Kisah Para Rasul 11:20

Taan an uner éra awéan ka'i piraan tou Siprus wo Kirene sé imangé an Antiokhia. A mangé mbitu icua éra ka'i en Abar Kaaruien andumoro' i Yesus a sé tou ra'ica Yahudi.

Kisah Para Rasul 18:8

Awéan si capala im balé paapo'an é agama Yahudi ang kota Korintus, makangaran Krispus. Sia wo pakasa sé tou am baléna maémano a si Apo' Yesus. Sé tou walina ang kota Korintus sé lumingao in sususuien i Paulus, imaémano ka'i a si Apo' Yesus wo pakasa séra méé in owak em baptisen.

Kisah Para Rasul 19:5

Kelinga in itu, wo séra baptisen ang karapi ngaran i Apo' Yesus.

Kisah Para Rasul 2:38

Isowat i Petrus ai séra, “Mape'diso wo terimano em baptisan a ngaran i Yesus Kristus wosama' eng kamesé-meséaan iow ampungan oka. Wo in taniitu teriman oka miow en tatambér-Na, siituo si Roh Le'nas.

Kisah Para Rasul 2:41

Kumawus in itu, sé tou itumerima i nunuwuun i Petrus, séra méé in owak em baptisen. Asi témpo ituke', sé tou maéman a si Yesus makaawes eng kakeli mamuali telu ngariwu tou.

Kisah Para Rasul 20:21

Pengua-nguaku a sé tou Yahudi wo a sé tou ra'ica Yahudi wosama' séra mape'dis wo kumiit a si Amang Kasuruan wo séra musti maéman a si Apo' Yesus.

Kisah Para Rasul 20:25

Intarépé' icuaku ai camu sapaoka icamu ra'io meta'up wo yaku. An tutuwku i mewali-wali wo icamu, aicuakuo tambisa e mamuali tou i Amang Kasuruan.

Kisah Para Rasul 28:31

Si Paulus masusui in abar andumoro' i Amang Kasuruan Kumawasa tanu Kolano wo ipasusuina ka'i ai séra andumoro' i Apo' Yesus Kristus. Sia masusui a sé tou ang karapi in da'ica wana eng kaindé'an wo ra'ica wana e mangapéro.

Kisah Para Rasul 5:14

Makauré makaaweso sé tou maéman a si Apo' Yesus, awéan sé tuama wo awéan sé wéwéné.

Kisah Para Rasul 8:4

Wo an tampa-tampa tinincasan é tou maéman itu, séra mengua-ngua in Abar Kaaruien andumoro' i Yesus Kristus a sé tou keli.

Roma 10:10

Ampa'paan sa kita maéman an untep in até, kita nianggap wutul i Amang Kasuruan. Wo sa kita mangaku ang karapi im ba'ba', kita lowiren.

1 Korintus 11:11

Mandé ka'i in taniitu, an dior i Casuruan ra'ica wana wéwéné sa ra'ica wana tuama, taniitu ka'i ra'ica wana tuama sa ra'ica wana wéwéné.

Galatia 3:28

Anaé, pakasa in tou maéman a si Kristus ra'io wana em béda, mandé kai séra tou Yahudi kuma'pa tou ra'ica Yahudi, ata kuma'pa tou ra'io pakakawasan é tou walina, tuama kuma'pa wéwéné. Ampa'paan kamu im baya nianggap meputé an dior i Amang Kasuruan ampa'paano i Yesus Kristus.

1 Petrus 3:21

Si sonop wangko' an tutuw itu, andéan im baptisan intarépé'. Em baptisan itu pengatuus sapaoka kamu linowiro i Amang Kasuruan ampa'paano tinou-Na sumawel si Yesus Kristus. Em baptisan itu ra'ica i meresi sé kotor an owak iow, taan i mangilek a si Amang Kasuruan wosama' en até miow weresi.