Kisah Para Rasul 28:18 - En Taar Weru a nunuwu' é Tontemboan

¹⁸ An tutuw é tou Romawi itu meriksa yaku a mangé mbitu, ra'ica kinéréan éra eng kaséaanku si ro'na méma' yaku makéré in ukuman patén. Ampa'paan in ituo aku aiwekar éra.

Kisah Para Rasul 28:18 ပူးပေါင်းရင်းမြစ်များ

Kisah Para Rasul 22:30

Si kikiiten é suraro Romawi itu masalé' makailek waya ampa'paano in sapa sé tou Yahudi tumudu si Paulus. Ampa'paano in itu, asi woondona mai, ru'du'na icesot si Paulus am bui. Wo iru'du'na wosama' sé kikiiten é imam wo sé anggota Mahkamah Agama walina e mali'us. Iwalina si Paulus kumesot a markas wo mangé isaru ai séra.

Kisah Para Rasul 23:29

Taan kinailekanku sapaoka sia tinudu andumoro' in atoran an ukum Torat. Taan ra'ica wana tuus en tumuru' sa sia patus makéré ukuman patén kuma'pa yuntep am bui.

Kisah Para Rasul 24:10

Wo si gubernur itu suméin a si Paulus sapaoka sia ro'nao rumoma'. Wo icua i Paulus, “Tuang gubernur, kailekanku, si tuang ta'uno mengaurus im perkara i bangsa anio'. Ampa'paano in itu yaku arui en até méla in owak an dior i tuang.

Kisah Para Rasul 24:22

Kekawus i Paulus kumua in taniitu, si gubernur Feliks si makailek wutul in sususuien i Yesus Kristus, en lumando woo im perkara itu. Icuana, “Em perkara miow, puséénku oka sa si Lisias si kikiiten é suraro Romawi icateka'o am bia.”

Kisah Para Rasul 25:25

Taan an tutuwku in sumidang im perkarana, ra'ica kinéréanku mandé esake' eng kameséaanna si patus makéré in ukuman patén. Wo ampa'paan sia in esa e imangilek im perkarana isosor en sidangen i Kaisar Romawi, anaé puséénku eng kumirim isia sumaru a si Kaisar.