Kisah Para Rasul 26:18 - En Taar Weru a nunuwu' é Tontemboan

¹⁸ e mangé muka' im bewerot éra wosama' séra ra'io ka'i menonou ang kariréimbengan taan menonou ang kasendotan, wo ka'i séra ra'io pakakawasan i kikiiten é sétang taan pakakawasan i Amang Kasuruan. Wo in taniitu ampa'paan séra maéman a Yaku, eng kamesé-meséaan éra makéré oka kaampungan wo makéré oka ka'i bagéan si aitantuo i Amang Kasuruan a sé tou sé line'nas-Na.’

Kisah Para Rasul 26:18 ပူးပေါင်းရင်းမြစ်များ

Matius 4:10

Taan icua i Yesus ai sia, “Mangém ko, é kikiiten é sétang! Ang Kitap Le'nas aipatic in tana'i, ‘Ico musti kumuru en sumiri' a si Casuruan, si Amang Kasuruanmu, wo wayake' Sia em patus pengaselewiranmu.’ ”

Matius 4:16

Sé tou sé menonou ang kariréimbengan isuméréo in Sendot wangko', wo séra sé maento' an tampa si kinawasa im papaté, ai séra mantango mai en Sendot.”

Lukas 1:77

Ico maali mai in abar a sé tou i Casuruan tumambisa wosama' séra ro'na makailek ing kalowiran kumiit ing kaampungan ing kamesé-meséaan éra.

Lukas 1:79

en sumendot in até é tou sé menonoué' ang kariréimbengan wo sé tou menonoué' ang kaindé'an. Wo mai-Na oka akinen kita kumiit in lalan maangé asi katouan wuta ing kaeluran.”

Lukas 2:32

Wo Sia tanu in sendot si aiwéé i Amang Kasuruan en tumélang in até é tou walina wosama' séra ro'na mai a si Amang Kasuruan, wo ka'i en sendot itu e méma' sé tou-Mu Israel ro'na irayo é tou walina.”

Lukas 24:45

Wo émaan-Na em pakawerot éra mawuka' akar ro'na kailekan éra sapa sé aipatic ang Kitap Le'nas.

Lukas 24:47

Wo aipatic ka'i sapaoka en abar anio' musti sisil angé maké ing kawasa i ngaran-Na a sé pakasa im bangsa tumo'tol an Yerusalem akar am pakasa ing kayo'baan: Si séike' e mape'dis ang kamesé-meséaan ampungan oka i Amang Kasuruan.

Lukas 4:18

“E Roh i Amang Kasuruan a Yakuo ampa'paan Aku sinisir-Nao eng kumua in Abar Kaaruien a sé tou lengéi, wo Yaku ka'i ayutuso i Amang Kasuruan eng kumua a sé tou tana'i: sé tou ayuntep am bui iwekar-Na oka, sé tou wola émaan-Na oka ro'na maséré, sé tou paoko-okoien émaan-Na oka icawekar,

Yohanes 17:17

Émaano mangé séra menonou le'nas ang karapi in sususuien wutul-Mu. Pakasa en taar-Mu siituo en sususuien wutul.

Yohanes 3:19

Si anioo e mangémai si Amang Kasuruan mukum sé tou ang kayo'baan anio': En sendot mayo ang kayo'baan, taan sé tou masalé'ke' ing kariréimbengan, ra'ica masalé' in sendot itu, ampa'paan séra masalé-salé'ke' mengaéma' ing kaléwo-léwo'an.

Yohanes 4:10

Isowat i Yesus ai sia, “Sa raké' woo kailekan i inang sapa si casalé' iwéé i Amang Kasuruan wo makailek si séi réén Aku si mangilek woo elepen, tantu si inang mangilek oka a Yaku, wo iwéé-Ku oka a si inang en dano si mawéé ing katouan.”

Yohanes 4:14

Taan si séike' e melep in dano si aiwéé-Ku, sia ra'io ka'i maré'om akar ing kauré-uré, ampa'paan en dano si iwéé-Ku itu mamuali oka palemboian in dano an owakna. En dano itu melembo-lemboi an owakna akar sia menonou akar ing kauré-uré.”

Yohanes 8:12

Kekawus in itu, icua i Yesus sumawel a sé tou keli in tana'i, “Yakuo en sendot ing kayo'baan. Si séi eng kumiit Yaku, sia itu ra'io menonou ang kariréimbengan, taan sia menonou an sendot si méma' isia menonou akar ing kauré-uré.”

Yohanes 9:39

Wo icua i Yesus, “Yaku mai ang kayo'baan e makim, wosama' si séike' sé ra'ica maséré, ro'nao oka suméré, wo si séike' sé ro'na maséré, sia mawola oka.”

Yohanes 9:5

Ang kauré-Ku ang kayo'baané', Yakuo en sendot ing kayo'baan.”

Kisah Para Rasul 10:43

Indior, pakasa sé nabi isumangkumo kumua andumoro' Sia. Icua éra sa sé tou maéman ai Sia, makéré oka kaampungan ing kamesé-meséaan ampa'paano i ngaran-Na.”

Kisah Para Rasul 13:47

Ampa'paan si Amang Kasuruan e merénta icami, ‘Sinisir-Kuo ko, wosama' ko ro'na mangé kumua in abar kalowiran a sé tou ra'ica Yahudi akar an tempok ing kayo'baan. Wo in taniitu, ico mamuali kaputé in sosoloan si sumendot iséra.’ ”

Kisah Para Rasul 15:9

Si Amang Kasuruan ka'i ra'ica masisir in tou, tou Yahudi kuma'pa tou ra'ica Yahudi. Line'nas-Nao en até éra ampa'paan maémano a si Yesus.

Kisah Para Rasul 2:38

Isowat i Petrus ai séra, “Mape'diso wo terimano em baptisan a ngaran i Yesus Kristus wosama' eng kamesé-meséaan iow ampungan oka. Wo in taniitu teriman oka miow en tatambér-Na, siituo si Roh Le'nas.

Kisah Para Rasul 20:21

Pengua-nguaku a sé tou Yahudi wo a sé tou ra'ica Yahudi wosama' séra mape'dis wo kumiit a si Amang Kasuruan wo séra musti maéman a si Apo' Yesus.

Kisah Para Rasul 20:32

Intarépé', isarakanku kamu a si Amang Kasuruan wosama' kamu téiran-Na. Wo musti ka'i pena'né-na'néien iow en Abar Kaaruien andumoro' in upus tatambér-Na ai camu. En abar itu e méé ing kaketeran am paémanen iow wo ka'i si méé oka ing kamang si aijanji-Nao iwéé a sé pakasa sé tou si niéma'-Nao le'nas.

Kisah Para Rasul 26:19

Kolano Agripa si pasiri-sirinku, an tutuw-Na imapaturu' in owak-Na a yaku, yaku tatap le'tek mengaéma' im perénta si aiwéé i Apo' Yesus.

Kisah Para Rasul 26:23

En aicua éra sapaoka si Mesias musti mamuléng ing keli kawenduan wo maté, taan Siao eng kataré-taré tumou sumawel. Sia oka ka'i e maali mai in sendot ing kalowiran a sé tou Yahudi wo ka'i a sé tou ra'ica Yahudi.”

Kisah Para Rasul 3:19

Ampa'paano in itu, itela'uo mio' eng kaléwo-léwo'an sé pengaémaan iow wo mape'diso mangé wosama' eng kamesé-meséaan iow ampungan i Amang Kasuruan.

Kisah Para Rasul 5:31

Wo angkaien-Na mangé si Yesus ang karapi ing kama kakan-Na an tampa pasiri-siriin, wosama' sé tou Israel ro'na mape'dis wo makéré ing kaampungan ang kamesé-meséaan.

Roma 8:17

Wo sa kita toya-toyaang i Amang Kasuruan, kita awéan hak e makéré im bagéan asé im pakasa sé aitu'tulo i Amang Kasuruan torona é toyaang-Na. Wo terimanta oka en itu mewali-wali wo si Kristus. Wo sa kita mawendu meputé in sinangkumai i Kristus, kita ka'i tumerima oka i rarayo wo in sisiri' kaputé i Kristus.

1 Korintus 1:2

En surat anio' aipaticku ai camu jamaat i Amang Kasuruan ang Korintus sé line'naso i Amang Kasuruan ampa'paan imeesao ang karapi i Kristus Yesus, wo ka'i tinowao i Amang Kasuruan e mamuali tou le'nas mewali-wali wo sé pakasa in tou maéman am pakasa in tampa, sé maapo' a si Yesus Kristus, si Apo'ta im baya.

1 Korintus 1:30

Si Amang Kasuruan in esa e méma' camu meesa ang karapi i Kristus Yesus. Wo si Kristus Yesuso e méma' cita mapinter, wo ampa'paano Sia ka'i kita nianggap wutul i Amang Kasuruan. Niéma ka'i Yesus kita mamuali tou le'nas wo ka'i tinu'bus-Na kita ang kamesé-meséaanta.

2 Korintus 4:4

Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

2 Korintus 4:6

Indior si Amang Kasuruan icumua in tana'i, “Asi kariréimbengan mantangai en sendot.” Intarépé' Siao ka'i iméma' in sendot-Na matélang an untep in atéta. Ampa'paano in sendot-Na si an untep in atéta, ro'na kailekanta eng kawangko' i Amang Kasuruan si masendot ang gio i Kristus.

2 Korintus 6:14

Tioo mengaesa wo sé tou sé ra'ica maéman a si Kristus; en itu ra'ica patus. Ampa'paan en sususuien wutul ra'ica kawisa meesa wo ing kaléwo'an! Wo ra'ipé' wana mako en sendot meesa wo i riréimbeng.

Galatia 2:20

Intarépé' ang katouanku, ra'io ka'i yaku e menonou, taan si Kristuso si menonou a yaku. Eng katouanku ang kayo'baan anio' katouan si aituuro am paémanen a si Toyaang i Amang Kasuruan si mengaupuso yaku wo isumarakan in owak-Na toronaku.

Galatia 3:14

Si Yesus Kristus pinatéo ang kayu salip wosama' eng kamang i Amang Kasuruan si aijanjio a si Abraham, iwéé a sé pakasa en tou sé maéman icauntep sé tou ra'ica Yahudi. Anaé, sa kita maéman a si Yesus si maté ang kayu salip, kita ro'na tumerima i Roh Le'nas si aijanjio i Amang Kasuruan indior.

Galatia 3:2

Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?

Efesus 1:11

Si Amang Kasuruan en tumu'tul im baya-waya kumiit ing kasalé'an wo im pinusé'-Na in esa. Wo ra'ipé' niéma'-Na eng kayo'baan kita sinisir-Nao, wosama' ro'na terimanta sapa sé aijanji-Nao iwéé ai cita ampa'paan kita imeesao ang karapi i Kristus.

Efesus 1:14

E Roh Le'nas ituo e imamuali jaminanta sapaoka ulit terimanta oka waya sé aijanjio i Amang Kasuruan a sé tou-Na. An tutuw itu iwekar-Na oka kita asé pakasa ing kaléwo'an ing kayo'baan anio'. Anaé, mayoo irayota si Amang Kasuruan ampa'paan ing kawangko'-Na.

Efesus 1:18

Isombayangku ka'i wosama' wukaan-Na mai en até miow akar kakailekan iow em paarapen si aiwéé-Na an tutuw iow tinowa-Na, wo akar kakailekan iow taloso wangko' eng kasiyaan im bagéan sé aitu'tul-Nao a sé tou le'nas.

Efesus 1:7

Ampa'paano in enda' i Yesus Kristus wo ampa'paan kita meesao ang karapi-Na, icita tinu'buso, eng kaangéanna kita niampungano ang kamesé-meséaanta. Wo siituo en upus wangko' si aitambér i Amang Kasuruan ai cita.

Efesus 2:8

Ampa'paan kamu linowir in upus aitambér i Amang Kasuruan an tutuw iow maéman. Eng kalowiran itu asalo aitambér i Amang Kasuruan, ra'ica wuéna im pakasa sé loor sé pinengaéma' miow.

Efesus 4:18

Em bewerot éra imariréimbengo, wo séra menonou tayang wo si Amang Kasuruan, ampa'paan séra bodok wo en até éra keté.

Efesus 5:11

Tioo mengakiit im pengaémaan é tou sé menonoué' ang kariréimbengan, ampa'paan em pengaémaan éra itu ra'ica wana torona. Aweso taré ituru'o miow a sé tou sapaoka em pengaémaan éra itu suméa'.

Efesus 5:14

Ampa'paan in ituo awéan en aipatic in tana'i, “Éi camu sé makatekelé', tumooro, wo tumouo mai sumawel am papaté wo si Kristus tumélang oka mai camu.”

Efesus 5:8

Indior kamu toya-toyaang ing kariréimbengan, taan intarépé' kamu imamualio tou i Casuruan, anaé icamuo sé toyaang in sendot. Ampa'paan in itu menonouo mangé tanu toya-toyaang in sendot,

Efesus 6:12

Ampa'paan kita merang ra'ica sumundur sé tou, taan en sundurenta itu sé maperénta, wo sé makakawasa wo sé kawasa ing kayo'baan si riréimbeng anio' wo sé roh léwo' an langit.

2 Timotius 2:26

Wo in taniitu séra makailek in tou sumawel wo icawekar an ta'kong i kikiiten é sétang si kumawasa iséra indior akar séra kumiit ing kasalé'an i kikiiten é sétang itu.

Ibrani 10:10

Ampa'paan ing kasalé'an i Amang Kasuruan tanu siitu, kita line'naso torona ing kauré-uré an tutuw i Yesus Kristus rumagés in owak-Na wayake' i makasa.

Ibrani 10:14

Anaé, ang karapi in esake' iparagés, linekepo i Kristus torona ing kauré-uré sé tou sé line'nas-Nao.

Ibrani 11:6

Si tou ra'ica maéman a si Amang Kasuruan, sia ra'ica kawisa mako maarui in até-Na. Si tou mai a si Amang Kasuruan sia musti maéman sapaoka si Amang Kasuruan itu awéan, wo sia musti maéman ka'i sapaoka si Amang Kasuruan méé mai in laasa a sé tou sé uli-ulit mengaéré Sia.

Ibrani 9:15

Ampa'paan in ituo, pinaalio mai i Kristus em perjanjian weru, wosama' sé tou sé tinowao i Amang Kasuruan makéré oka bagéan si akar ing kauré-uré asi janji-Na. Sé tou ro'na makéré im bagéan si akar ing kauré-uré ampa'paan si Kristus imatéo wo tumu'bus ing kamesé-meséaan sé pinengaéma' éra an tutuw im perjanjian kataré pengapakéné'.

Yakobus 2:5

Poo-poow sé icaupusku! Lingano mai en icuaku anio': Sinisiro i Amang Kasuruan sé tou sé paweroten ing kayo'baan anio' lengéi, wosama' séra masiya' am paémanen éra wo makaanu im bagéan ang kakolanoan-Na tanu si aijanji-Nao a sé pakasa in tou sé mengaupus Sia.

1 Petrus 1:4

Kita maarap makéré oka bagéan si aitu'tulo i Amang Kasuruan a sé tou-Na. Em bagéan ituo sé kamang ipakaéma' i Amang Kasuruan a mangé en sorga. Wo sé kamang itu ra'ica mengaléwo', ra'ica mengawuruk wo ra'ica mawalina.

1 Petrus 2:25

Ampa'paan kamu indior tanuoka sé domba icasélé'kowo, taan intarépé' kamu imaréngo mai asi gembala si matéir i mu'kur iow.

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

1 Yohanes 1:9

Taan sa pangakunta eng kamesé-meséaanta ai Sia, tantu kita ampungan-Na. Sia wutu-wutul le'tek an janji-Na wo ra'ica marapit, ampa'paan in ituo ampungan-Na oka eng kamesé-meséaanta wo le'nasen-Na oka kita asé kaléwo-léwo'an sé niéma'ta.

1 Yohanes 2:12

Aipaticku ai camu, éi toya-toyaang, ampa'paan eng kamesé-meséaan iow niampungano mai ang karapi ingaran i Kristus.

1 Yohanes 3:8

Taan si séi si mengéma-ngéma'pé' ing kamesé-meséaan, sia itu anu i kikiiten é sétang, ampa'paan si kikiiten é sétang itu tumo'tolke' mai indior mengéma-ngéma' ing kamesé-meséaan. Taan si Toyaang i Amang Kasuruan maai en tumeri im pakasa sé pengaémaan i kikiiten é sétang.

1 Yohanes 5:19

Kailekanta sa kita anio' asi Amang Kasuruan owo, wo pakasa sé ang kayo'baan anio' pakakawasaan i kikiiten é sétang.

Yudas 1:1

Siri' a yaku owo, Yudas. Yaku anio' ata i Yesus Kristus si mepoow wo si Yakobus. En surat anio' aicirim a sé tou sé tinowa i Amang Kasuruan sé icaupus-Na keli wo ka'i sé pakatéiran-Na e mamuali tou i Yesus Kristus.

Wahyu 21:27

Taan sapake' mangé sé najis kuma'pa sé tou mengaéma' sé karican oka mai kuma'pa kotowo ra'ica toro muntep asi kota itu. Sé ro'na muntep asi kota itu, wayake' sé tou e ngaran éra aipatico an untep ing kitap katouan i Toyaang i Domba itu.