Kisah Para Rasul 26:16 - En Taar Weru a nunuwu' é Tontemboan

¹⁶ Intarépé', tumooro wo tumulungo. Yaku mapaturu' in owak-Ku ai co ampa'paan aitantu-Kuo ko e maselewir a Yaku wo sumairi andumoro' pakasa sé sinérému e niéma'-Ku wo andumoro' sé ipapaturu'-Ku oka ai ico sa.

Kisah Para Rasul 26:16 ပူးပေါင်းရင်းမြစ်များ

Lukas 1:2

Aipatic éra waya en itu meputé wo sé aisisilo é tou sé isuméré in esa ing kamamualian itu tumo'tolai asi kataré-taré wo en Taar i Casuruan itu ipakua-kua éra ka'i a sé tou walina.

Kisah Para Rasul 1:17

Wo ka'i indior si Yudas itu esaan ai cita wo mengaselewir mewali-wali wo icita.”

Kisah Para Rasul 1:25

Si tou ituo en sumawel maselewir wo tumerima oka in tawoien ruru'du'an si aitela'uo i Yudas. Si Yudas anio' imakéréo in tampa si patus terimana.”

Kisah Para Rasul 20:24

Taan ra'io pandungenku eng katouanku, asalo ro'na lekepenku en tawoien si aiwéé i Apo' Yesus a yaku eng kumua in Abar Kaaruien andumoro' in upus aitambér i Amang Kasuruan a sé cita in tou.

Kisah Para Rasul 21:19

Si Paulus méé in siri' ai séra. Wo isisilna waya ai séra e niéma' i Amang Kasuruan a sé tou ra'ica Yahudi, tutuwna i mangé kumua in Abar Kaaruien andumoro' i Yesus Kristus an tampa éra.

Kisah Para Rasul 22:10

Wo icuaku, ‘O Apo' Yesus, sapa réén e musti émaanku?’ Isowat i Apo' Yesus a yaku, ‘Tumulungo wo mangém an Damsyik. A mangé mbitu icua-Ku oka ai co sapa en émaanmu.’

Kisah Para Rasul 23:11

Asi woondona mai tutuw i mawengio, si Apo' Yesus mai tumulung an duru i Paulus wo kumua, “Ico ra'ica toro maindé'! Kete-ketereno en atému. Ico imééo kasairian andumoro' Yaku a sé tou Yerusalem anio' wo ka'i ko musti mangé méé kasairian tanu sia'i andumoro' Yaku a Roma.”

Kisah Para Rasul 26:15

Wo isowatku, ‘Si séi réén Ko é Tuang?’ En suara itu kumua, ‘Yakuo si Yesus, si paoko-okoienmu.

Kisah Para Rasul 6:4

Wo in taniitu, kami asaloka mengasombayang wo mengakua in Taar i Amang Kasuruan.”

Roma 1:5

Wo ampa'paano i Yesus Kristus ituo, si Amang Kasuruan imééo mai ing kamang a yaku mamuali ruru'du'an e makin waya sé tou ang kayo'baan wosama' séra maéman wo le'tek a si Yesus Kristus. Émaanku waya en itu, wosama' e ngaran i Yesus Kristus iparayo-rayo wo pasiri-siriin.

Roma 15:16

Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

2 Korintus 4:1

Ampa'paano ing kaupusan i Amang Kasuruan, émaan ami en tawoien anio'. Ampa'paan in ituo cami ra'ica katalaan in arapan.

2 Korintus 5:18

Pakasa in itu tatawoi i Amang Kasuruan. Émaan-Na icita meeluran wo Sia ampa'paano i Kristus. Wo si Amang Kasuruan iméé in tawoien ai cita e makawali waya sé tou meeluran wo Sia.

Galatia 1:12

Ampa'paan en Abar Kaaruien itu ra'ica tinerimaku asé tou, wo ka'i ra'ica wana tou en sumusui in Abar Kaaruien a yaku. Taan si Yesus Kristus in esa en cumua in Abar Kaaruien itu a yaku.

Galatia 2:2

Yaku mangé an Yerusalem ampa'paan si Amang Kasuruan icumuao a yaku e musti maangé. Wo an tutuwku a mangé mbitu, yaku meta'up wuntulke' a sé tou sé nianggap pasiriin an jamaat. Wo ipepaarku a sé kikiiten an jamaat itu en Abar Kaaruien andumoro' i Yesus Kristus sé ipakua-kuakuo a sé tou ra'ica Yahudi, wosama' kakailekan é kikiiten sapaoka en tawoienku wutu-wutul mééo im buéna. Wo in taniitu em paraméjianku mengakua in Abar Kaaruien itu a sé tou ra'ica Yahudi indior wo intarépé' ra'ica mara'i-ra'i.

Efesus 3:3

Si Amang Kasuruan in esa en icumua a yaku andumoro' im pawasa-wasan-Na sé aicaenepé', tanu si aipaticku asi suratku anio' mandé ka'i ing kolekke'.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

Kolose 1:25

Yaku imamualio tou si mengaselewir sé jamaat itu ampa'paan aku tinokéan i Amang Kasuruan in tawoien eng kumua im pakasa in Taar-Na ai camu.

Kolose 1:7

Pakasa en Abar Kaaruien andumoro' i Yesus Kristus itu, kinailekan iow asi Epafras owo si karapi ami maselewir si caupus ami. Sia le'tek mengaselewir asi Kristus torona ing kalooran iow.

1 Tesalonika 3:2

wo si Timotius poowta an esa paémanen, yutus ami mangé ai camu. Sia itu kara-karapita matawoi a si Amang Kasuruan e mengakua in Abar Kaaruien andumoro' i Yesus Kristus. Yutus ami si Timotius maangé e méé ing kaketeran an até miow wosama' em paémanen iow a si Yesus makaketer.

1 Timotius 1:12

Yaku kumua i makapulu'sama' a si Kristus Yesus Apo'ta, ampa'paan Siao si méé mai ing kaketeran a yaku. Anggapen-Na aku tou le'tek ai Sia, akar tinokéan-Na mai aku mamuali maselewir ai Sia.

1 Timotius 4:6

Timotius, sa sé aisusuiku itu icuamu waya a sé poo-poow esa paémanen, ico imamualio ata maselewir in loor a si Kristus Yesus. Wo kete-ketereno mangé en atému ang karapi i nunuwu' i Amang Kasuruan si paémanenta wo karapi in sususuien wutul sé kiniitmuo mai akar intarépé'.

2 Timotius 4:5

Taan ko é Timotius, kawasanmu mangé en owakmu mandé sapake' e mamuali. Malese-leseno mangé masaru ing kawenduan, émaano mangé melala'us en tawoien mengakua in Abar Kaaruien andumoro' i Yesus Kristus wo émaan sumama-sama' en tawoien si aiwéé i Casuruan ai co.