Kisah Para Rasul 24:24 - En Taar Weru a nunuwu' é Tontemboan

²⁴ Mawaya'o pirao ngando si Paulus tinang, wo mai si gubernur Feliks mewali-wali wo si penanaanna makangaran Drusila si tou Yahudi. Wo iru'du' i gubernur itu en tumowa si Paulus wo linganna asi Paulus andumoro' tumambisa wosama' sé tou ro'na maéman a si Yesus Kristus.

Kisah Para Rasul 24:24 ပူးပေါင်းရင်းမြစ်များ

Markus 6:20

Ampa'paan si Yohanes pengasiriin i Herodes wo kailekanna si Yohanes itu tou wutul wo le'nas. Anaé, sia linoindong i Herodes, taan susurna in luminga si Yohanes manuwu' sia ra'io makaaté in sama' mandé ka'i sia mendam in arui mengalinga si Yohanes manuwu'.

Lukas 19:3

Sia rumaméji suméré tambisa si Yesus itu. Taan ra'ica kaséréanna si Yesus, ampa'paan keli asé tou wo en owakna ka'i kompéng.

Lukas 23:8

Keséré i Herodes si Yesus, en aténa arui keli ampa'paan uréo keli sia masalé' suméré si Yesus. Wo ka'i uréo sia melinga-linga in abar andumoro' i Yesus wo maarap ro'na suméré Sia méma' esa tuus kakaya'kaan.

Kisah Para Rasul 16:31

Isowat éra, “Maémano mangé a si Apo' Yesus Kristus wosama' ko malowir oka, taniitu ka'i pakasa sé am balému malowir.”

Kisah Para Rasul 20:21

Pengua-nguaku a sé tou Yahudi wo a sé tou ra'ica Yahudi wosama' séra mape'dis wo kumiit a si Amang Kasuruan wo séra musti maéman a si Apo' Yesus.

Kisah Para Rasul 24:25

Wo icua i Paulus tumambisa sé tou menonou wutul an dior i Amang Kasuruan, tumambisa eng kumawasa in owak wosama' ra'ica méma' ing kamesé-meséaan wo ka'i andumoro' in endo sé tou akimen i Amang Kasuruan. Kelingana in itu, sia makala'us maindé' wo icuana, “Taniitupé'owo, wo mangéo ko. Kawisa mangé sa awéano témpo loor towanku oka sumawel ko.”

Kisah Para Rasul 26:22

Taan yaku tinawang i Amang Kasuruan, siituo aku menonoué' akar asi endo anio'. Wo intarépé' aku makatulung am bia'i e méé kasairian andumoro' si Yesus ai camu im baya, tou sé iparangka-rangka' kuma'pa tou sé ipawawa-wawa'. Pakasa sé aicuaku itu meputé sé aicuao i Musa wo sé nabi indior.

Galatia 2:16

Taan, kailekan ami ra'ica wana tou mandé esake' si nianggap wutul an dior-Na ampa'paan mengaéma' in ukum Torat. Sé tou nianggap wutul an dior-Na ampa'paan maéman a si Yesus Kristus. Anaé, kami in tou Yahudi ka'i maémano a si Yesus Kristus wosama' kami nianggap wutul an dior i Amang Kasuruan ampa'paan im paémanen, ra'ica ampa'paan i mengaéma' in ukum Torat. Ampa'paan ra'ica wana tou mandé esake' si nianggap wutul i Amang Kasuruan ampa'paan mengaéma' in ukum Torat.

Galatia 2:20

Intarépé' ang katouanku, ra'io ka'i yaku e menonou, taan si Kristuso si menonou a yaku. Eng katouanku ang kayo'baan anio' katouan si aituuro am paémanen a si Toyaang i Amang Kasuruan si mengaupuso yaku wo isumarakan in owak-Na toronaku.

Galatia 3:2

Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?

1 Yohanes 5:1

Si séike' e maéman sapaoka si Yesus itu Kristus, sia toyaango i Amang Kasuruan. Wo en tou si mengaupus a si Amang, sia ka'i mengaupus sé tou i mamualio toya-toyaang-Na.

Yudas 1:3

Poo-poow sé icaupusku! En ulitna si paangé-angénku asi kataré-taré, yaku masalé' keli woo matic in surat ai camu andumoro' ing kalowiran si tinerimatao im baya. Taan intarépé' icasalé'ku keli e matic andumoro' sé walina torona miow. Icasalé'ku en sumina'u icamu wosama' kamu rumaméji kasake' imaéman. Em paémanen itu makasake' iwéé i Amang Kasuruan a sé tou le'nas akar ing kauré-uré.

Wahyu 14:12

Em penting am bia'i sé tou le'nas musti talesen mandé ka'i meta'up in okoi, sérao sé makiit im perénta-perénta-Na wo mauli-ulit maéman a si Yesus.