Kisah Para Rasul 23:6 - En Taar Weru a nunuwu' é Tontemboan

⁶ An tutuw kailekan i Paulus sapaoka sé anggota Mahkamah Agama itu awéan rua golongan, si esa Saduki wo si esa ka'i Farisi wo sia kumua in taangko', “Poo-poow, sé matu'aku tou Farisi wo aku ka'i tou Farisi. Yaku aisaru a Mahkamah anio' ampa'paan percayanku sa sé tou imatéo touen sumawel i Amang Kasuruan.”

Kisah Para Rasul 23:6 ပူးပေါင်းရင်းမြစ်များ

Matius 10:16

“Wéan rékén en anio'! Yutus-Ku kamu mangé tanuoka sé domba an uner é serigala. Ampa'paan in itu kamu musti mapinte-pinter tanu ula', wo lekep en até tanu mombo.

Matius 22:23

Asi endo' ituke', piraan tou Saduki mai a si Yesus. Paanggapen éra sa sé tou imatéo ra'io kawisa tumou sumawel. Wo wuéien éra a si Yesus:

Matius 3:7

An tutuw itu ka'i kelian tou Farisi wo Saduki mai a si Yohanes e mekibaptis. Taan aicuanake' ai séra, “Éi kamu tou léwo' kamu meputé wo si ula' rumacu-racung! Paweroten iow réén kamu ro'na icawekar an ukuman si maai sa?

Kisah Para Rasul 22:3

“Yaku tou Yahudi, itumou an Tarsus an tana' Kilikia, taan imawangko' an Yerusalem anio'. Si guruku makangaran Gamaliel. Yaku sinusuianna in sama' andumoro' in ukum Torat si aiwéé i Musa a sé apo-apo'ta. Pakasa en atoran i Amang Kasuruan itu pengaémaanku waya tanu ka'i im pengaémaan iow intarépé'.

Kisah Para Rasul 22:30

Si kikiiten é suraro Romawi itu masalé' makailek waya ampa'paano in sapa sé tou Yahudi tumudu si Paulus. Ampa'paano in itu, asi woondona mai, ru'du'na icesot si Paulus am bui. Wo iru'du'na wosama' sé kikiiten é imam wo sé anggota Mahkamah Agama walina e mali'us. Iwalina si Paulus kumesot a markas wo mangé isaru ai séra.

Kisah Para Rasul 22:5

Sé niéma'ku itu, kailekan i imam wangko' wo sé anggota i Mahkamah Agama, séra oka e méé kasairian ai camu sapaoka en itu wutul. Wo isérao itu ka'i e méé in surat kawasa a yaku em paalin a sé tou Yahudi an Damsyik. Anaé, ang karapi in surat kawasa itu, yaku ro'na tumangka' sé tou makiit in sususuien i Yesus sé an Damsyik. Kekawus in itu iwaliku mangé séra an Yerusalem en ukumen.

Kisah Para Rasul 23:1

An tutuw i Paulus aisaru a sé anggota Mahkamah Agama, téintengenna séra wo kumua, “Éi poo-poow, akar asi endo anio' aku menonou ang karapi in até weresi an dior i Amang Kasuruan.”

Kisah Para Rasul 23:15

Intarépé' icasalé' ami tana'i, aweso taré sé tuang wo sé anggota Mahkamah Agama mangé rumu'du' si kikiiten é suraro Romawi wosama' isaruna sumawel si Paulus a sé tuang, tanuoka kéndo' periksan iow sumawel ang karapi in sama'. Taan, ra'ipé' icateka' si Paulus a sé tuang, icami tu'tulo maté isia.”

Kisah Para Rasul 23:20

Wo isowatna, “Sé tou Yahudi imeesao en dékén e mangilek a si tuang wosama' woondo si Paulus ro'na mangé isarumu sumawel a Mahkamah Agama. Émaan éra taniitu tanuoka kéndo' sia mangé periksan éra sumawel in sama'.

Kisah Para Rasul 23:7

An tutuw sia kumua in taniitu, sé tou Farisi wo sé tou Saduki tumo'tolo meindo-indoan roma' akar sé tou keli mamualio rua ngareru'.

Kisah Para Rasul 24:15

Yaku ka'i maarap a si Amang Kasuruan meputé wo iséra, sapaoka kawisa mangé pakasa in tou sé matéo touen oka sumawel, sama' sé tou wutul kuma'pa tou ra'ica wutul.

Kisah Para Rasul 24:21

Kuma'pa wona' an tutuwku makatulung an dior éra wo icuaku in taangko' sapaoka, ‘Sé tou imatéo touen oka sumawel i Amang Kasuruan,’ akar aku aisaru éra a si tuang.”

Kisah Para Rasul 28:20

Ampa'paan in ituo pinangilekku kamu meta'up wo mepaar ang karapiku wosama' kailekan iow sa pakasa en aitudu éra a yaku ra'ica wutul. Ampa'paan aku maarap wo maéman a si Mesias si aijanji i Amang Kasuruan ai cita tou Israel, ampa'paan in ituo aku pakawa'kesen tanu sia'i.”

Filipi 3:5

Yaku sinunat an tutuw in umurku walu ngando. Yaku tou Israel, asi suku i Benyamin, wutu-wutul tou Ibrani. Wo aku tou Farisi, si le'tek keli an ukum Torat.

Kolose 1:5

Kamu maéman wo mengaupus taniitu ampa'paan kamu maarap wo mengento-ngento' sapa sé aitu'tu'o i Amang Kasuruan torona miow an sorga. Em paarapen itu liningao miow an tutuw in sususuien wutul ipakua-kuao ai camu. Siituo en Abar Kaaruien andumoro' i Yesus Kristus.

Ibrani 6:19

Em paarapenta itu ayandé tanu in jangkar keter wo aman torona i mu'kurta. Em paarapen itu makawali icita lumangkoi angé ing kaéng pengakawu', am pauntepan asi Kamar Lume'na-le'nas an sorga.