Kisah Para Rasul 22:5 - En Taar Weru a nunuwu' é Tontemboan

⁵ Sé niéma'ku itu, kailekan i imam wangko' wo sé anggota i Mahkamah Agama, séra oka e méé kasairian ai camu sapaoka en itu wutul. Wo isérao itu ka'i e méé in surat kawasa a yaku em paalin a sé tou Yahudi an Damsyik. Anaé, ang karapi in surat kawasa itu, yaku ro'na tumangka' sé tou makiit in sususuien i Yesus sé an Damsyik. Kekawus in itu iwaliku mangé séra an Yerusalem en ukumen.

Kisah Para Rasul 22:5 ပူးပေါင်းရင်းမြစ်များ

Lukas 22:66

An tutuw imandoo, mali'uso mai sé matu'a é tou Yahudi, sé kikiiten é imam wo sé makailek wutul in Torat. Wo si Yesus iwali éra en sidangen a Mahkamah Agama éra.

Kisah Para Rasul 1:15

Asi makasa, sé poo-poow esa paémanen a si Yesus imaumung mewali-wali. Eng kakeli éra wona' sangaatus rua ngapulu' tou. Wo si Petrus tumulung an uner éra wo kumua,

Kisah Para Rasul 13:26

Poo-poowku sé icauntep an taranak i Abraham wo ka'i sé tou ra'ica Yahudi sé maapo' a si Amang Kasuruan! En abar ing kalowiran itu aicuao ai cita im baya.

Kisah Para Rasul 2:29

Poo-poow, icuaku ai camu ang karapi im butul andumoro' si Daud, si apo'ta. Si aicuana itu, ra'ica andumoro' in owakna in esa ampa'paan sia in esa imatéo wo aicuburo, wo eng kuburna awéané' akar intarépé' asi kota anio'.

Kisah Para Rasul 22:1

“Éi tuang-tuang wo sé poo-poow, lingan iow, awéan en icuaku ai camu e méla in owakku!”

Kisah Para Rasul 23:1

An tutuw i Paulus aisaru a sé anggota Mahkamah Agama, téintengenna séra wo kumua, “Éi poo-poow, akar asi endo anio' aku menonou ang karapi in até weresi an dior i Amang Kasuruan.”

Kisah Para Rasul 23:6

An tutuw kailekan i Paulus sapaoka sé anggota Mahkamah Agama itu awéan rua golongan, si esa Saduki wo si esa ka'i Farisi wo sia kumua in taangko', “Poo-poow, sé matu'aku tou Farisi wo aku ka'i tou Farisi. Yaku aisaru a Mahkamah anio' ampa'paan percayanku sa sé tou imatéo touen sumawel i Amang Kasuruan.”

Kisah Para Rasul 26:10

En itu émaanku ka'i an Yerusalem. An tutuwku imakéréo kawasa asé kikiiten é imam, tangkaanku sé tou le'nas wo yuntep am bui. Énanku ka'i séra makéré in ukuman patén.

Kisah Para Rasul 26:11

Yaku ka'i muntep am balé-walé paapo'an é agama Yahudi wo pengaokoienku sé tou makiit si Yesus wo leséénku séra en sumangkal im paémanen éra. Ampa'paano aku mae'bow keli wo keli paangitenku séra akar ang kota-kota walina.”

Kisah Para Rasul 26:12

Icua ka'i i Paulus, “Asi makasa aku makéré surat kawasa asé kikiiten é imam owo e mangé an Damsyik.

Kisah Para Rasul 28:17

Teluo ngando kami am bitu wo enoten i Paulus sé tou Yahudi sé pasiri-siriin e meta'up wo sia. Wo an tutuw éra imali'uso, icuana ai séra, “Poo-poow! Yaku am bia'i ampa'paan tinangka' é tou Yahudi an Yerusalem wo isarakan éra aku a sé pemerénta Romawi. Taan aku ra'ica iméma' kaséaan sapa-sapa en sumundur sé taranakta wo ka'i ra'ica kumélong ing kanaramen é apo-apo'ta.

Kisah Para Rasul 28:21

Taan icua éra a si Paulus, “Kami ra'ica itumerima surat an Yudea owo si mai icumua andumoro' ing katouanmu. Taniitu ka'i sé karapi ami sé imaréngai an Yerusalem owo, mandé esake' ai séra ra'ica wana en sumisil in léwo' andumoro' ico.

Kisah Para Rasul 3:17

Poo-poow, kailekanku kamu wo pakasa sé kikiiten iow e maté si Yesus ampa'paan ra'ica kailekan iow sapa e niéma' miow.

Kisah Para Rasul 4:5

Asi woondona mai, sé kikiiten é tou Yahudi, sé matu'a wo sé makailek wutul in Torat sumidang an Yerusalem.

Kisah Para Rasul 5:21

Matawi i mando, sé ruru'du'an itu muntep ang kintal im Balé Le'nas wo tumo'tolo masusui am bitu. Asi témpo itu ka'i an tampa walina si imam wangko' wo sé tou mengakiit sia rumu'du' sé anggota Mahkamah Agama e mali'us. Séra ituo sé matu'a é tou Yahudi sé mengasina'u. Iru'du' éra mangé mindo sé ruru'du'an itu am bui.

Kisah Para Rasul 9:14

Wo intarépé' sia imayo am bia'i. Sia imakéréo surat kawasa asé kikiiten é imam an Yerusalem, en tumangka' sé tou maéman a si Apo' Yesus am bia'i.”

Galatia 1:13

Liningao miow en andumoro' ing katouanku indior si mengakiit in agama é Yahudi. Yaku wutu-wutul mengaokoi sé jamaat i Amang Kasuruan wo rumaméji maté iséra im baya.

Filipi 3:6

Yaku incaya' keli an agama Yahudi akar paokoienku sé jamaat sé maéman a si Kristus. Wo yaku wutu-wutul le'tek makiit in ukum Torat akar ra'ica wana tou e ro'na méé kaséaan a yaku andumoro' in itu.

1 Timotius 4:14

An tutuw sé penatua an jamaat maro ing kama ai co e mutus ico, séra makéréo i nunuwu' asi Casuruan owo. Wo e nunuwu' itu andumoro' ing kamang aitambér-Na ai co. Anaé, pakéno mangé sumama-sama' en tatambér si aiwéé i Roh Le'nas itu.