Kisah Para Rasul 20:19 - En Taar Weru a nunuwu' é Tontemboan

¹⁹ Ang karapi ing kako'kosan in até aku sumelewir si Casuruan wo makakeli-keli aku maamé' wo keli mamendam im pangepé'an ampa'paan sé tou Yahudi maaté-até in léwo' e maté yaku.

Kisah Para Rasul 20:19 ပူးပေါင်းရင်းမြစ်များ

Lukas 19:41

An tutuw i Yesus makatawio in Yerusalem wo sérén-Na eng kota itu wo amé'an-Na.

Yohanes 12:26

Si séike' en sumelewir Yaku musti kumiit Yaku. Wo am bisake' en angéan-Ku, am bitu ka'i awéan si maselewir Yaku. Si séi e maselewir Yaku sia siriin oka i Amang-Ku.”

Kisah Para Rasul 17:13

Taan an tutuw kailekan é tou Yahudi sé an Tesalonika owo sapaoka si Paulus makua ka'i in taar i Amang Kasuruan am Berea wo séra mangé am bitu e memaso-maso' in léwo' a sé tou am bitu akar sé tou keli ra'io makaaté in sama'.

Kisah Para Rasul 17:5

Taan sé tou Yahudi walina manganat a si Paulus wo si Silas. Ampa'paano in itu li'usen éra sé tou léwo' am pasar sé ra'ica wana tawoien en lumicoko ing kota itu. Wo em balé i Yason sinerang éra ka'i e mangéré si Paulus wo si Silas, en urusen an dior é tou keli.

Kisah Para Rasul 20:3

An Yunani sia mento' telu ngaserap. Wo sia tu'tulo en suméngkot maangé an Siria. Mesakéo woo sia ang kapal, kalingaanna sa sé tou Yahudi a mangé mbitu mawasa e maté sia. Ampa'paan in ituo sia ra'ica mamuali sumaké ang kapal taan maréngke' sumawel an Antiokhia kumiit in lalan katanaan lumangkoi a Makedonia.

Kisah Para Rasul 20:31

Ampa'paan in ituo, mareti-retio mangé kamu. Musti pena'né-na'néi iow sapaoka ang kauré in telu ngata'un aku mewali-wali wo icamu, endo wo em bengi kamu pengasina'uenku si esa wo si esa akar en danona im berenku menii-niis.

Kisah Para Rasul 21:27

An tutuw mekawu-kawuso em pitu ngando, wo sé tou Yahudi sé an Asia owo mai suméré si Paulus si an untep im Balé Le'nas. Pasoon éra i nunuwu' léwo' sé tou am bitu wo tumangka' isia.

Kisah Para Rasul 27:23

Ampa'paan, kawengi si Amang Kasuruan si paapo'anku wo si makaanu yaku, rumu'du' mai si malaékat-Na mai tumulung an duruku.

Roma 1:1

En surat anio' a yaku owo, Paulus. Yaku anio' ata i Kristus Yesus si tinowao mamuali ruru'du'an-Na wo si sinisiro eng kumua in Abar Kaaruien i Amang Kasuruan.

Roma 1:9

Kamu ipenomba-nombayangku wo si Amang Kasuruano en sairi sapaoka aku uli-ulit mengasombayang torona miow. Siao si Amang Kasuruan si pengaselewiranku ang karapi in lekep en até an tutuwku mengakua in Abar Kaaruien andumoro' i Toyaang-Na.

Roma 12:11

Tioo eng kare'deman iow maina', taan mandéo taré kamu incaya' maselewir a si Casuruan ang karapi i roh si aiwéé-Na.

2 Korintus 2:4

An tutuwku imatic in surat indior ai camu, yaku uli-ulit ra'ica makaaté in sama' wo mawendu wo makakeli-keli mengamé-ngamé'. An tutuw itu ra'ica kiimku méma' icamu mawendu ampa'paan in surat itu, taan en icasalé'ku wosama' kailekan iow, yaku uli-ulit mengaupus icamu.

2 Korintus 3:5

Kami ra'ica wana alasan eng kumua sapaoka kawooan ami méma' in tawoien anio', taan si Amang Kasuruan i méé mai icami makawoo.

2 Korintus 7:5

An tutuw ami icateka' a Makedonia ka'i, pakasa en owak ami wutu-wutul ra'ica makapendam in elur. Am bisa-wisake' ipengapeta'up ami eng kasusaan: awéan kaperéndéran ang kesot wo awéan kaindé'an an até ami.

Galatia 1:10

Tioo mengawerot sa aku rumaméji marui in até é tou. Yaku rumaméji marui in até i Amang Kasuruan. Sa aku asaloke' rumaméji marui in até é tou, yaku anio' ra'ica ata i Kristus.

Efesus 6:7

Émaano mangé en tawoien iow itu ang karapi in arui en até kaputé kamu mengaselewir a si Casuruan, ra'ica mengaselewir sé tou.

Filipi 3:18

Icuaku in taniitu, ampa'paan awéan e mangémai akar en atéku wendu keli. Tanu sé makakeli-kelio aicuaku ai camu ang karapi i maamé', ita'néiku ai camu sapaoka intarépé' keli tou imangaku séra makiit si Kristus, taan séra ra'ica menonou makiit in sususuien i Kristus si maté ang kayu salip en tumu'bus ing kamesé-meséaanta!

Kolose 3:24

Weroten sumama-sama', sapaoka teriman oka miow em bagéan asi Casuruan owo, si aitu'tul-Nao ai camu. Siituo en laasa iwéé-Na oka ai camu. Ampa'paan en ulitna, kamu ang karoro'an i maselewir a si Tuang iow, Siao si Kristus.

1 Tesalonika 1:9

Am bisa-wisa sé tou mengasisil tambisa kamu tumerima cami an tutuw ami mangé ai camu. Ipasisil éra ka'i andumoro' tumambisa kamu tumela'u sé opo-opo' wo mape'dis wo mai maapo' a si Amang Kasuruan si menonou wo si ulit.

2 Timotius 1:4

Sa aku makata'néi asi endo ilumangkoi, ico imaamé' an tutuwta in dua mentalicuran, siituo aku masalé' woo meta'up sumawel wo ico wosama' aku arui keli.

Yakobus 1:2

Poo-poowku! Sa kamu meta'up i membam-balinaan pangepé'- an, terimano mangé waya en itu ang karapi in arui en até.

1 Petrus 1:6

Ampa'paan in ituo maaru-aruio mangé, mandé ka'i intarépé' awéan en témpona kamu musti mawendu ampa'paan sumangkum ing kumeli-keli pangepé'an.

2 Petrus 1:1

En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

Wahyu 7:15

Ampa'paan in ituo, séra makatulung an dior im palukutan pasiri-siriin i Amang Kasuruan wo sumelewir Sia endo wo em bengi an untep im Balé Le'nas. Wo Sia si makalukut asi palukutan pasiri-siriin itu mewali-wali oka ang karapi éra en lumoindong iséra.