Kisah Para Rasul 18:26 - En Taar Weru a nunuwu' é Tontemboan

²⁶ Wo ang karapi in da'ica wana kaindé'an tumo'tolo si Apolos masusui am balé paapo'an é agama Yahudi. Kelinga i Priskila wo si Akwila sé ipasusuina wo uwasen éra sia mangé am balé éra. Am bitu icua éra i makakii-kiit ai sia andumoro' im basa i Amang Kasuruan en lumowir sé tou.

Kisah Para Rasul 18:26 ပူးပေါင်းရင်းမြစ်များ

Markus 10:15

En ulitna icua-Ku mangé ai camu, si séi si ra'ica sumungkul ing Kakolanoan i Amang Kasuruan tanu sé toyaang teké' anio', sia ra'ica kawisa muntep ang Kakolanoan-Na.”

Lukas 19:26

Isowat i tuang itu, ‘Wutu-wutul icuaku ai camu: Sé tou ro'na pengatokéan in sapake' mangé, séra wéan oka lébé keli mai. Taan sé tou ra'ica toro patokéan in sapake' mangé, sapa ka'i sé ai séra pakaindo-indon oka.

Lukas 24:27

Wo isisil-Na waya ai séra in dua sapa sé aipatic am pakasa ing Kitap Le'nas andumoro' in owak-Na, tumo'tolai ang kitap-kitap aipatic i Musa akar ang kitap-kitap aipatic é nabi walina.

Yohanes 7:17

Sa si tou masalé' maéma' ing kasalé'an i Amang Kasuruan, kakailekanna oka en sususuien-Ku anio' asi Amang Kasuruan owo kuma'pa mai a Yaku owo in esa.

Kisah Para Rasul 14:3

Anaé, si Paulus wo si Barnabas mento' uré toyo' am bitu. Wo ang karapi in da'ica wana kaindé'an pengua-ngua éra en abar andumoro' in upus aitambér i Casuruan. Séra in dua winéan-Na kawasa e méma' in tuu-tuus sé ra'io icakua wo kakaya'kaan-kakaya'kaan.

Kisah Para Rasul 18:18

Si Paulus mento'pé' ka'i piraan ngando ang Korintus. Wo sia mekiupus en tumela'u sé poo-poow maéman am bitu wo suméngkot angé an sangkum in Siria mewali-wali wo si Priskila wo si Akwila. Ra'ipé' mangé am bitu, si Paulus kumunting im buukna akar i mala'ngas ang kota Kengkera. Sia méma' in taniitu e mamuali tuus in janjina indior a si Amang Kasuruan, niéma'nao.

Kisah Para Rasul 18:25

Wo ka'i tinerimanao en sususuien andumoro' i Apo' Yesus. Sia incaya' keli masisil andumoro' i Yesus wo pakasa em pasisilna ra'ica wana en suméa'. Mandé ka'i in taniitu, em baptisan kailekanna asaloke' im baptisan i Yohanes Mabaptis.

Kisah Para Rasul 19:8

Telu ngaserap eng kauréna, si Paulus mengauntep am balé paapo'an é agama Yahudi. Am bitu sia maroma' ang karapi in da'- ica wana kaindé'an wo meindo-indoan roma' wo sé tou Yahudi wosama' percayan éra andumoro' ing kakolanoan i Amang Kasuruan.

Kisah Para Rasul 28:23

Wo séra tumantu esa endo e meta'up sumawel wo si Paulus. Wo asi endo itu kelian sé imai an tampa pakaento'anna. Wo sia kumua wo masairi ai séra andumoro' si Amang Kasuruan Kumawasa tanu Kolano. Sia ka'i maké in tuu-tuus an ukum Torat wo eng kitap é nabi e rumaméji wosama' kailekan éra wo émanen éra sa si Yesus itu si Mesias. En itu imamuali tumo'tol i mamoondo akar im bawaando.

Kisah Para Rasul 8:31

Isowatna, “Tumambisa aku ro'na makailek sa ra'ica wana tou en sumusui a yaku.” Wo pekiupusenna si Filipus sumaké ang keréta itu wo lumukut an duruna.

1 Korintus 12:21

Anaé, em beren ra'ica toro kumua asi kama, “Yaku ra'ica maperlu ico.” Taniitu ka'i en do'kos ra'ica toro kumua a si kécéi, “Yaku ra'ica maperlu ico.”

1 Korintus 3:18

Sa kamu mengawerot in owak iow awéan kapinteran, kamu imuwako in owak iow in esa, ampa'paan eng kapinteran papakén iow itu asalo makiit im pakawerot é tou ang kayo'baan wo eng kapinteran ituo e modok icamu. Aweso taré kamu ra'ica mapaké ing kapinteran makiit im pakawerot ing kayo'baan wosama' an dior i Amang Kasuruan kamu uli-ulit awéan kapinteran.

1 Korintus 8:2

Sa awéan tou mawerot sapaoka sia kelio eng kailekan, en ulitna sia itu keliané sé ra'ipé' kailekanna si musti kailekanna.

Ibrani 6:1

Ampa'paan in ituo, mayoo tela'uta em patuuran in sususuien en andumoro' i Kristus wo melala'uso in sususuien si rumangka'mai wosama' em paémanenta makaketer. Tioo penguri-ngurin em patuuran in sususuien itu, tanumai sususuien in andumoro' i mape'dis mengéma-ngéma' in léwo', wo sususuien in andumoro' tumambisa maéman a si Amang Kasuruan,

2 Petrus 3:18

Taan aweso taré kamu makaawes mendam ing kamang aitambér i Amang Kasuruan, wo makalébéo makatuus si Yesus Kristus, Apo' wo si Lumolowirta. Ai Siake' pakasa e rarayo wo en sisiri' intarépé' akar ing kauré-uré. Ulit.