Kisah Para Rasul 18:25 - En Taar Weru a nunuwu' é Tontemboan

²⁵ Wo ka'i tinerimanao en sususuien andumoro' i Apo' Yesus. Sia incaya' keli masisil andumoro' i Yesus wo pakasa em pasisilna ra'ica wana en suméa'. Mandé ka'i in taniitu, em baptisan kailekanna asaloke' im baptisan i Yohanes Mabaptis.

Kisah Para Rasul 18:25 ပူးပေါင်းရင်းမြစ်များ

Markus 1:3

Sia mengangko-ngangko' oka an tana' kapayasan, ‘Tu'tuleno en lalan torona i Casuruan, wo rondoren en lalan langkoian-Na.’ ”

Markus 12:14

Sé tou itu mai wo kumua ai Sia: “Guru, kailekan ami si Guru ra'ica mengatowo. Si Guru ra'ica maindé' a si séike' mangé, ampa'paan si Guru ra'ica mengasisir in tou em pasiriin, taan taré masusui a sé tou ang karapi i makakii-kiit andumoro' ing kasalé'an i Amang Kasuruan. Intarépé' wuiéien ami sa kumiit in atoran in agamata, ro'na réén kami mér im pajak a si Kaisar kuma'pa ra'ica? Musti réén kami mér im pajak kuma'pa ra'ica?”

Lukas 1:4

wosama' kailekan i tuang sapaoka pakasa sé aisusui ami a si tuang, en itu uli-ulit mamuali.

Lukas 7:29

Wo pakasa sé tou iluminga in aicua i Yesus, wo ka'i sé tou matagi im pajak, makua sapaoka si Amang Kasuruan itu wutul. Ampa'paan séra im baya imééo in owak em baptisen i Yohanes Mabaptis.

Kisah Para Rasul 13:10

wo kumua, “Éi toyaang i kikiiten é sétang! Ico wuta in uwak sé membam-balinaan wo ing kaléwo'an. Pakasa sé wutul pasundurenmuke'. Kéitu réén ra'ica yento'mu mengaléwo' im pawasan i Amang Kasuruan si mai lumowir sé tou?

Kisah Para Rasul 16:17

Si wéwéné itu mengii-ngiit ka'i an somoi i Paulus wo icami, ang karapi i mengangko-ngangko', “Sé tou anioo sé ata i Amang Kasuruan Si Rumangka-rangka'. Séra makua in lalan kalowiran ai camu.”

Kisah Para Rasul 18:26

Wo ang karapi in da'ica wana kaindé'an tumo'tolo si Apolos masusui am balé paapo'an é agama Yahudi. Kelinga i Priskila wo si Akwila sé ipasusuina wo uwasen éra sia mangé am balé éra. Am bitu icua éra i makakii-kiit ai sia andumoro' im basa i Amang Kasuruan en lumowir sé tou.

Kisah Para Rasul 19:23

An tutuw itu, an Efesus imarinca'o ampa'paan en sususuien andumoro' im basa i Amang Kasuruan en lumowir sé tou, ra'ica icasalé' é tou.

Kisah Para Rasul 19:3

Wuéien ka'i sumawel i Paulus ai séra, “Sa taniitu, nibaptis réén im baptisan sapa kamu?” Isowat éra, “Kami nibaptis kumiit im baptisan i Yohanes.”

Kisah Para Rasul 19:9

Taan awéan piraan tou ra'ica kiim tumerima in sususuien i Paulus ampa'paan séra keté até. Wotaré ipemaa-maar éra in léwo' an dior é tou keli andumoro' im basa i Amang Kasuruan en lumowir sé tou iméma' ing kamesé-meséaan. Ampa'paano in itu itela'u i Paulus séra wo towanna sé tou maéman a si Yesus kumesot am balé paapo'an é agama Yahudi. Wo susur in endo sia maroma' ang karapi é tou am pakuliaan, si ningaranan Tiranus.

Kisah Para Rasul 9:2

e mangilek surat kawasa em paalin am balé-walé paapo'an é agama Yahudi an Damsyik wo sa ipeta'upna sé tuama kuma'pa wéwéné sé makiit in sususuien i Yesus, séra tangkaanna wo paalinna an Yerusalem.

Roma 12:11

Tioo eng kare'deman iow maina', taan mandéo taré kamu incaya' maselewir a si Casuruan ang karapi i roh si aiwéé-Na.

2 Timotius 2:4

Sa si suraro an tutuw i matawoi, ra'ica pandungenna en owakna wo sé urusan walina. Sia asalo makasaru in tawoienna itu wosama' si kikiitenna arui ai sia.

Yakobus 5:16

Ampa'paan in ituo, mangakuo mangé ing kamesé-meséaan asi esa wo si esa wo menson-sombayangano mangé wosama' kamu masama'. En sombayang é tou mengaéma' im butul uli-ulit wangko' eng kawasana.