Kisah Para Rasul 17:32 - En Taar Weru a nunuwu' é Tontemboan

³² An tutuw iluminga sapaoka sé tou imatéo ro'na touen sumawel wo sia aiséro'ke' é piraan tou ai séra. Taan sé walina makua, “Kawisa oka mangé lingan ami en aicuamu tarépé'.”

Kisah Para Rasul 17:32 ပူးပေါင်းရင်းမြစ်များ

Lukas 14:18

Taan pakasa sé tou nienot, esa wo si esa icumélongke'. Si cataré kumua, ‘Mekiampung aku ra'ica maangé ampa'paan aku makatelesé' uma weru, anaé mangékupé' sérén en uma itu.’

Lukas 22:63

Wo sé tou matéir im Balé Le'nas sé itumang si Yesus, para'- i-ra'ien éra Sia wo ka'i parukin éra.

Lukas 23:11

Wo tumo'tolo si Yesus paséro' wo para'i-ra'ien i Herodes wo sé surarona, karaian éra Sia in juba tanu im papakén é kolano. Wo iwali éra mangé sumawel Sia a si gubernur Pilatus.

Lukas 23:36

Sé suraro ka'i mengara'i-ra'i Sia. Séra rumuru mangé ai Sia wo wéan éra mangé elepen anggor esem Sia,

Kisah Para Rasul 13:41

‘Wéanio' rékén sumama-sama', éi camu sé menéro-néro' an tutuw in luminga in Taar-Ku! Sérén oka miow eng kamamualian sé ra'io icakua sé émaan-Ku oka an jaman iow, akar kamu mangaya-ngaya'ka' wo maté. Kamu maté oka ampa'paan kamu ra'ica mercaya, mandé awéan tou mai sumisil waya in itu ai camu.’ ”

Kisah Para Rasul 17:18

Ang kota Atena awéan golongan Epikuros wo golongan Stoa. Sé tou pinter asé reru itu meindo-indoan roma' wo si Paulus, awéan e makua, “Sapa réén eng kailekan i tou anio'? Eng kailekanna waya im pira taan keli nuwu'.” Wo sé walina ka'i makua, “Si tou anio' makua wona' andumoro' é opo-opo' é bangsa walina.” Icua éra in taniitu ampa'paan si Paulus mengakua andumoro' i Yesus wo andumoro' Sia si tinou sumawel am papaté.

Kisah Para Rasul 17:31

Ampa'paan aitantu-Nao asi esa témpo e makim sé tou karapi i ra'ica marapit, wo aituru'-Nao esa Tou mamuali akim. Wo aituru'-Nao en itu a sé pakasa in tou ang karapi in tumou sumawel si Tou itu am papaté.”

Kisah Para Rasul 17:33

Kekawus in itu, pakasa séra itela'u i Paulus.

Kisah Para Rasul 2:13

Taan sé walina asaloke' mengasindir, “Séra im baya linangu in anggor tombal.”

Kisah Para Rasul 24:25

Wo icua i Paulus tumambisa sé tou menonou wutul an dior i Amang Kasuruan, tumambisa eng kumawasa in owak wosama' ra'ica méma' ing kamesé-meséaan wo ka'i andumoro' in endo sé tou akimen i Amang Kasuruan. Kelingana in itu, sia makala'us maindé' wo icuana, “Taniitupé'owo, wo mangéo ko. Kawisa mangé sa awéano témpo loor towanku oka sumawel ko.”

Kisah Para Rasul 25:19

Séra asaloke' meindo-indoan roma' wo isia andumoro' in agama éra wo andumoro' si esa tou makangaran Yesus. Si Tou itu kiné imatéo, taan icua i Paulus si Tou itu itumou sumawel.

Kisah Para Rasul 26:8

Wo intarépé' wuéienku ai camu é tou Yahudi, kéitu réén ra'ica percayan iow sapaoka si Amang Kasuruan ro'na tumou sumawel sé tou imatéo?

1 Korintus 1:23

Taan kami anio' asalo makua in abar andumoro' i Kristus si maté ang kayu salip. En abar andumoro' i Kristus itu, asaloke' mamuali watu pasangkilan a sé tou Yahudi, akar séra ra'ica maéman a si Kristus. Wo sé tou ra'ica Yahudi, paweroten éra en abar itu abar ra'ica wana torona.

1 Korintus 15:12

Ipakua ami a sé tou sapaoka si Kristus tinouo sumawel am papaté. Taan kéitu réén awéan piraan tou ai camu makua sapaoka sé tou imatéo ra'io ka'i touen sumawel?

1 Korintus 4:10

Ampa'paan kami makua andumoro' i Kristus, paweroten é tou ing kayo'baan tanu tou bodok, taan kamu tirayo sapaoka kamu itu tou pinter ampa'paan maéman a si Kristus. Kami ka'i paweroten é tou ing kayo'baan tanu tou ra'ica keter em paémanen taan kamu marayo in owak sapaoka kamu ketero em paémanen. Kami pengawawa' é tou ing kayo'baan taan kamu iparayo-rayo é tou keli.

2 Korintus 6:2

Ampa'paan icua i Amang Kasuruan, “Asi témpo si sinisir-Kuo, ico lininga-Kuo, wo asi endo ing kalowiran, ico tinawang-Kuo.” Ta'néien iow sumama-sama', asi ya'sa anioo en témpo sinisir i Amang Kasuruan itu. Wo asi ya'sa anioo si endo ing kalowiran torona miow.

Ibrani 11:36

Awéan ka'i sé tou ipaséro' wo papasuten, wina'kes i ranté wo pakabuin.

Ibrani 13:13

Ampa'paano in itu, mayoo kita mangé meta'up wo Sia ang kesot in ténda, wo mendam im paséro' é tou kaputé si pinendam-Na.