Kisah Para Rasul 16:15 - En Taar Weru a nunuwu' é Tontemboan

¹⁵ Kekawus i Lidia wo sé am pamaléna nibaptis, icuana in tana'i ai cami, “Sa percayan iow aku anio' wutu-wutul maémano a si Casuruan, mayo lumosér am baléku.” Pelepé-lepéienna, akar kiniitan ami eng kasalé'anna en lumosér am baléna.

Kisah Para Rasul 16:15 ပူးပေါင်းရင်းမြစ်များ

Matius 10:41

Si séike' en sumungkul si esa nabi ampa'paan sia nabi, terimanna oka en laasa nabi. Wo si séike' en sumungkul si tou sama' ampa'paan sia itu sama', terimanna oka en laasa tanu tou sama'.

Matius 3:6

Séra mai mangaku ing kamesé-meséaan éra, wo baptisen i Yohanes séra an doyongan Yordan.

Lukas 14:23

Wo icua i tuang itu a si atana, ‘Mangém an lala-lalan wangko' wo an lala-lalan pesut ang kesot ing kota wo leséénai waya sé tou am bitu wosama' em palukutan mawuta.’

Lukas 24:29

Taan peleséén éra Sia wosama' tumuli. Icua éra, “Mentoo am bia'i mewali-wali wo icami, ampa'paan tawio mawengi wo ka'i mekeremo.” Wo si Yesus muntep am balé itu wo mento' mewali-wali wo iséra.

Kisah Para Rasul 11:14

Sia oka eng kumua in abar e méma' ico wo pakasa sé am pamalému malowir.’

Kisah Para Rasul 16:31

Isowat éra, “Maémano mangé a si Apo' Yesus Kristus wosama' ko malowir oka, taniitu ka'i pakasa sé am balému malowir.”

Kisah Para Rasul 16:33

Asi katoora im bengi ituke', iwali i capala im bui séra e mangé meresi im péla' éra. Asi témpo itu ka'i, si capala im bui wo pakasa sé am baléna méé in owak éra im baptisen.

Kisah Para Rasul 16:34

Kekawus in itu, séra in dua iwali i capala im bui mangé am baléna wo séra wéanna kanen. Sia wo sé am baléna arui keli ampa'paan séra im baya maémano a si Amang Kasuruan.

Kisah Para Rasul 18:8

Awéan si capala im balé paapo'an é agama Yahudi ang kota Korintus, makangaran Krispus. Sia wo pakasa sé tou am baléna maémano a si Apo' Yesus. Sé tou walina ang kota Korintus sé lumingao in sususuien i Paulus, imaémano ka'i a si Apo' Yesus wo pakasa séra méé in owak em baptisen.

Kisah Para Rasul 8:12

Taan intarépé' séra luminga si Filipus makua in Abar Kaaruien andumoro' si Amang Kasuruan Kumawasa tanu Kolano wo andumoro' i ngaran i Yesus Kristus. Kelinga éra in itu wo séra maéman wo méé in owak em baptisen, séra itu tuama wo wéwéné.

Kisah Para Rasul 8:38

Wo iru'du' i kikiiten itu yento' eng keréta wo séra in dua tumumpa an dano wo sia baptisen i Filipus.

Roma 16:23

Si Gayus ka'i méé mai in siri' ai camu. Yaku si Paulus winéanna kaloasan mento' am baléna, taniitu ka'i sé jamaat ami mengali'us maapo' am baléna. Si Erastus si tinokéan mengaurus in doit ing kota, wo si Kwartus poowta esa paémanen méé ka'i in siri' ai camu. [

2 Korintus 12:11

Yaku rumayoo in owakku in esa tanuoka sé tou bodok. Taan kamuo sé ilumesé' akar aku méma' tanu siitu. En ulitna icamuo si musti mengarayo yaku tanu siitu. Ampa'paan mandé ka'i aku anio' ipakua é tou ra'ica makailek in sapa-sapa, taan am baya-waya yaku ra'ica kaindoan é ruru'du'an wangko' itu.

2 Korintus 5:14

Niéma' ami waya en itu ampa'paan en upus i Kristus en icumawasa icami. Wo kailekan ami sa si esa tou maté torona im pakasa é tou, eng kaangéan in itu pakasa in tou imatéo.

Galatia 6:10

Ampa'paan in itu, ang karoro'anta winéané' témpo, mayoo émaanta sé loor a sé pakasa in tou, kataré-taré a sé poo-poowta an esa paémanen.

Efesus 1:1

En surat anio' a yaku owo Paulus, si mamuali ruru'du'an i Kristus Yesus kumiit ing kasalé'an i Amang Kasuruan. En surat anio' aipaticku ai camu tou le'nas an Efesus, sé le'tek maéman a si Kristus Yesus.

Filipi 1:7

Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

Filemon 1:17

Ampa'paano in itu, sa anggapenmu aku karapimu an esa paémanen, terimano mangé sia tanuoka ko tumerima yaku.

Ibrani 13:2

Tioo marua-rua até en tumerima si séike' en lumosér am balé miow mandé ka'i ra'ipé' katuusan iow. Ampa'paan ang karapi méma' in taniitu, awéan sé piraan tou indior ra'ica kinailekan éra itumerimao sé malaékat am balé éra.

1 Petrus 5:12

En surat kolek anio' aipaticku ai camu wo sinémbongan i Silas, si nianggapkuo poowku an esa paémanen. Sia itu le'tek am paémanen wo ro'na papercayan. Aipaticku en surat anio' en sumina'u wo méé kaincayaan ai camu wosama' ro'na percayan iow sapaoka sé aipaticku anio' uli-ulit abar wutul andumoro' ing kamang aitambér i Amang Kasuruan ai camu. Wo eng kamang itu musti timboian iow i mauli-ulit.

2 Yohanes 1:10

Sa awéan tou maai ai camu wo kumua in sususuien si ra'ica meputé wo in sususuien i Kristus, tioo teriman iow sia am balé miow kuma'pa sumiri' sia.

3 Yohanes 1:5

Poowku Gayus si caupusku, ico le'tek mengatawang am baya-waya a sé poo-poow an ésa paémanen sé mengakua in Abar Kaaruien andumoro' i Yesus Kristus, mandé ka'i séra ra'ipé' katuusanmu.

3 Yohanes 1:8

Anaé, séra musti teriman wo tawangenta, wosama' kita ro'na mamuali kara-karapi an tawoien en sumusui in sususuien wutul i Amang Kasuruan.