Kisah Para Rasul 15:20 - En Taar Weru a nunuwu' é Tontemboan

²⁰ Taan, lébé loor sa ipaticta surat wo iwéé ai séra, wosama' séra ra'ica toro kuman ing kakanen najis sé ayumpero a sé opo-opo', ra'ica toro kuman in sama'na é binatang sé pinaté ampa'paan kiniselan eng kolot, kuma'pa kuman in enda', wo ka'i ra'ica toro mengabersina.

Kisah Para Rasul 15:20 ပူးပေါင်းရင်းမြစ်များ

Kisah Para Rasul 15:29

Kamu ra'ica toro kuman ing kakanen si ayumpero a sé opo-opo', ra'ica toro kuman sé binatang imaté ampa'paan kiniselan eng kolot, wo ra'ica toro kuman in enda', wo ka'i ra'ica toro mabersina. Sa pakasa en anio' itayang iow, kamu méma'o in loor. Akaré' am bia'i owo en surat ami anio', siri' ai cami owo.”

Kisah Para Rasul 21:25

Taan andumoro' é tou ra'ica Yahudi sé maémano, séra kinirimano ami surat andumoro' sé pinusé' amio. Em pinusé' ami itu tana'i: séra ra'ica toro kuman ing kakanen sé ayumpero a sé opo-opo', ra'ica toro kuman in enda' kuma'pa kuman sé binatang imaté ampa'paan kinisel, wo ra'ica toro mengabersina.”

1 Korintus 5:11

Em paangé-angénku, tioo mengakarapi wo sé tou sé mengakua sapaoka sia itu poowta an esa paémanen taan em pengaémaanna cabul, rakus, mengaapo' a sé opo-opo', mengawuruk i ngaran é tou walina, lalangun kuma'pa mengauwak. Kumanke' mako mewali-wali wo sia ra'ica toro.

1 Korintus 6:13

Awéan ka'i makua, “Eng kakanen torona im poot wo em poot torona ing kakanen,” rua-rua itu terin oka i Amang Kasuruan. Si aicua miow itu wutul. Taan mandé ka'i en owak é tou terin oka, ra'ica toro pakén iow en owak e méma' in cabul. Taan pakéno en owakta asaloke' in sumelewir a si Amang Kasuruan, ampa'paan en owakta piniara-Na.

1 Korintus 6:18

Tumayango mangé i mengéma-ngema' in cabul! Eng kamesé-meséaan walina sé pengaémaan é tou, ra'ica wana eng kasiwakan an owakna. Taan si tou mengaéma' in cabul, sia méma'o ing kamesé-meséaan si awéan eng kasiwakan an owakna in esa.

1 Korintus 6:9

Ra'ipé' réén kailekan iow sapaoka sé tou mengaéma' sé ra'ica wutul séra ra'ica mamuali tou i Amang Kasuruan ang Kakolanoan-Na? Ampa'paan in itu tioo kamu kauwakan. Sé tou cabul, maapo' a sé opo-opo', sé tou mabersina wo si ra'ica penanaanna, mengacabul wo sé kakélé tuama,

1 Korintus 7:2

taan ampa'paan sé tou taporak katawéran mengaéma' in cabul, aweso taré sé tuama makapenanaan esa wo sé wéwéné ka'i makapenanaan esa.

1 Korintus 8:1

Poo-poowku, intarépé' icasalé'ku icua ai camu andumoro' ing kakanen iparagés a sé opo-opo'. Awéan sé tou makua in tana'i: “Kita im baya sé maéman makaileko andumoro' in itu.” Eng kakailekan tanu siitu mengaéma' icamu makatirayo, taan en upus ro'na méé ing kaketeran a sé tou walina.

2 Korintus 12:21

Em paindé-indé'ku an tutuwku maai sa, yaku iwawa' i Amang Kasuruan an dior iow wo aku mawendu ampa'paan kelian sé an uner iow indior sé mengaéma' ing kamesé-meséaan wo ra'ipé' mape'dis mengéma-ngéma' sé karican, mengabersina, wo mengaéma' ing kasalé'an in owak sé ra'ica wutul.

Galatia 5:19

Sé tou makiit ing kasalé'an in owak kaséréan asé im paémaan éra, tanu mai: mengabersina, mengaéma' sé karican, mengaéma' ing kasalé'an in owak sé ra'ica wutul,

Efesus 5:3

Tioo kamu kawera-werake' in cabul, mengéma-ngéma' sé karican oka mai, kuma'pa masalé-salé'ke' in anu é tou walina. Ipepaarke' ka'i en itu ra'ica toro, ampa'paan ra'ica patus émaan é tou le'nas.

Kolose 3:5

Ampa'paano in itu tiya'o waya eng kasalé-salé'an in owak ang katouan iow, tanumai, mabersina, najis, kasalé'an in owak andumoro' in cabul, kasalé'an léwo', longi' am baya-waya si ro'na ipeputé wo i mengaapo' a sé opo-opo'.

1 Tesalonika 4:3

Si anioo waya eng kasalé'an i Amang Kasuruan: menonouo mangé toronake' Sia, menonou le'nas wo ra'ica mengabersina.

Ibrani 12:16

Matéi-téiro mangé wosama' ra'ica wana esaan ai camu sé mengaéma' andumoro' sé sundal wo ra'io masiri' si Amang Kasuruan meputé wo si Esau, si mangkér in hakna tanu toyaang luluna ampa'paan in esa piring kakanen.

Ibrani 13:4

Pakasa in tou musti sumiri' ing kawéng wo sé mempenanaan musti le'tek esa wo si esa. Ukumen oka i Amang Kasuruan sé tou sundal wo sé tou mabersina.

1 Petrus 4:3

Ampa'paan indior keliano en témpo pinaké miow mengéma-ngéma' sé ra'ica loor meputé im pengaémaan é tou sé ra'ica makatuus si Amang Kasuruan. An tutuw itu kamu menonou tanu sia'i: makiit ing kasalé'an in owak, kasalé'an maéma' in léwo', malangu-langu, maéma' ing kasalé-salé'an mengele-ngelep in elepen mengalangu, wo mengaapo' a sé opo-opo' si ra'ica toro émaan iow.

Wahyu 10:2

Eng kamana makatimboi ing gulungan kitap teké' si makawuka'. Eng kécéi kakanna am bawo in ta'sic wo eng kécéi ka'birina am bawo ing katanaan.

Wahyu 10:8

Wo en suara si liningakuo an langit itu icumua ka'i a yaku, “Mangéo indon eng gulungan kitap si makawuka' ang kama i malaékat si makatulung am bawo in ta'sic wo am bawo ing katanaan itu.”

Wahyu 2:14

Taan awéan piraan sé ra'ica icasalé'-Ku ai camu: An uner iow awéan sé makiit im pasusui i Bileam. Si Bileam masusui a si Balak tumambisa en tumawér sé tou Israel kuman ing kakanen sé ayumpero a sé opo-opo', wo mengabersina.

Wahyu 2:20

Taan iséro'-Ku kamu, ampa'paan aiwayake' miow si esa wéwéné makangaran Izebel. Si wéwéné itu matuul in owakna nabi i Amang Kasuruan, taan sia masusui wo mengasélé'kow sé ata-Ku mengabersina wo mengakan ing kakanen sé ayumpero a sé opo-opo'.

Wahyu 9:20

Taan sé tou walina sé ra'ica imaté ing kawangkuran itu, ra'- ica kiim mape'dis mengéma-ngéma' sé léwo'. Séra ka'i ra'ica kiim mento' makuru en sumiri' a sé roh léwo' wo a sé patong-patong tanumai patong mas, pérak, tambaga, watu wo kayu sé ra'ica maséré, malinga, kuma'pa ka'i mawaya'.