Kisah Para Rasul 14:27 - En Taar Weru a nunuwu' é Tontemboan

²⁷ Icatéka' mangé an Antiokhia, towan éra sé jamaat e maumung. Wo sisil éra in dua pakasa sé niéma' i Amang Kasuruan ai séra. Sisil éra ka'i tambisa si Casuruan muka' in lalan akar sé tou ra'ica Yahudi ro'na maéman a si Yesus.

Kisah Para Rasul 14:27 ပူးပေါင်းရင်းမြစ်များ

Yohanes 9:10

Wo icua éra ai sia, “Tumambisa réén akar ko ro'nao maséré intarépé'?”

Kisah Para Rasul 11:18

Kelinga in itu, sé tou Yahudi sé maémano a si Yesus ra'io ka'i tumantang si Petrus. Wo séra rumayo si Amang Kasuruan wo kumua, “Anaé, sé tou ra'ica Yahudi ka'i tinambérano mai i Amang Kasuruan kamang e mape'dis wo makéré ing katouan akar ing kauré-uré.”

Kisah Para Rasul 15:12

Kelinga in itu, pakasa sé tou am bitu makala'us menes. Wo lingan éra si Paulus wo si Barnabas sumisil andumoro' im pakasa in tuu-tuus sé ra'io icakua wo sé kakaya'kaan sé niéma' éra ampa'paano ing kawasa i Amang Kasuruan an uner é tou ra'ica Yahudi.

Roma 15:18

Taan aku ra'ica rumayo andumoro' in owakku, en rayoku asaloke' andumoro' sé niéma' i Kristus, akar ro'na iwaliku sé tou ra'ica Yahudi male'tek a si Amang Kasuruan ang karapi i nunuwu'ku wo im pengaémaanku,

1 Korintus 11:18

Kataré-taré em pinalingaku asé tou sapaoka an tutuw iow mengali'us i maapo' a si Amang Kasuruan, awéan kaperéndéran an uner iow akar kamu metané-tanéo. Wo sé pinalingaku itu werotenku awéan em butulna.

1 Korintus 14:23

Anaé, sa pakasa sé jamaat mali'usai mewali-wali esa wo si esa tou sé maroma' mapaké i nunuwu' i roh, wo muntepai ka'i sé tou ra'ica maéman kuma'pa sé tou ra'ica makailek andumoro' ing kamang tatambér i Amang Kasuruan, tantu cua éra kamu itu tou sé malicokoo e ngaas.

1 Korintus 15:10

Taan ampa'paan in upus si aitambér i Amang Kasuruan, yaku ro'na mamuali ruru'du'an tanu intarépé'. Wo en upus si aitambér i Amang Kasuruan itu uli-ulit awéan wuéna. Sé tinawoiku lumébé mai asé im pakasa é ruru'du'an. En itu ra'ica ampa'paan ing kaketeranku in esa, taan ampa'paano in upus aitambér i Amang Kasuruan mewali-wali wo yaku.

1 Korintus 16:9

ampa'paan keli en témpo loor eng kumua in Abar Kaaruien andumoro' i Yesus Kristus am bitu, mandé ka'i kelian tou masundur yaku.

1 Korintus 5:4

An tutuw iow mali'u-li'- us ang karapi i ngaran i Apo' Yesus, anggapeno mio' aku an unero miow wo eng kawasa i Yesus Apo'ta ang karapi miow am bitu.

2 Korintus 2:12

An tutuwku icateka'o mangé an Troas eng kumua in Abar Kaaruien andumoro' i Yesus Kristus, kinaséréankuo sapaoka si Amang Kasuruan imuka'o in lalan a yaku en sumelewir am bitu.

Kolose 4:3

Wo isombayang ka'i mangé kami wosama' wukaan-Na mai en lalan ai cami eng kumua in abar si indior aicaenepé' andumoro' i Kristus. Ampa'paan i méma' in itu akar aku ayuntep am bui.