Kisah Para Rasul 14:26 - En Taar Weru a nunuwu' é Tontemboan

²⁶ A mangé em bitu oka séra suméngkot angé an Antiokhia. Indior séra ayutus é jamaat itu eng kumua in Abar Kaaruien itu. Sé jamaat ituo ka'i en sumombayang sumarakan iséra in dua a si Amang Kasuruan wosama' Sia tumambérai in upus-Na ai séra en tumo'tol in tawoien. Intarépé' séra mangé am bitu ampa'paan linekepo éra en tawoien.

Kisah Para Rasul 14:26 ပူးပေါင်းရင်းမြစ်များ

Kisah Para Rasul 11:19

Kekawus i Stefanus pinaté, sé poo-poow esa paémanen tumincas icasera-serar am bisa-wisa ampa'paan im paoko-okoien. Awéan sé tumincas am Fenisia, am pulou Siprus, an Antiokhia an Siria. Taan séra mengakua in Abar Kaaruien andumoro' i Yesus Kristus taan wayake' a sé tou Yahudi.

Kisah Para Rasul 11:20

Taan an uner éra awéan ka'i piraan tou Siprus wo Kirene sé imangé an Antiokhia. A mangé mbitu icua éra ka'i en Abar Kaaruien andumoro' i Yesus a sé tou ra'ica Yahudi.

Kisah Para Rasul 11:23

An tutuw i Barnabas icateka' a mangé mbitu, sérénna sé tou maéman am bitu tinambéranai ing kamang i Amang Kasuruan, wo sia wutu-wutul arui. Wo sina'uenna séra im baya wosama' uli-ulit ang karapi in lekep en até, le'tek a si Apo' Yesus.

Kisah Para Rasul 11:26

Wo sia meta'up wo si Saulus, kumawus in itu iwalina si Saulus an Antiokhia. Séra in dua mento' mewali-wali wo sé jamaat a mangé mbitu sangata'un eng kauréna. Séra ka'i mengasusui a sé tou keli andumoro' i Yesus. An Antiokhia anioo sé tou makiit in sususuien i Yesus kumataré-taré patuulen Krésten.

Kisah Para Rasul 11:27

Asi témpo itu, awéan piraan nabi an Yerusalem owo mai an Antiokhia.

Kisah Para Rasul 14:19

Wo asi témpo itu mayo sé tou Yahudi a mangé en Antiokhia wo an Ikonium owo. Séra memaso-maso' in léwo' a sé tou keli itu akar si Paulus wangkilen éra im batu wo wésoon éra icesot ang kota, ampa'paan paweroten éra sia imatéo.

Kisah Para Rasul 14:21

An Derbe, si Paulus wo si Barnabas ka'i kumua in Abar Kaaruien andumoro' i Yesus Kristus, wo keli tou maémano a si Yesus. Kekawus in itu séra in dua maréng sumawel an Listra, wo melala'- us an Ikonium wo ka'i an Antiokhia an sangkum im Pisidia.

Kisah Para Rasul 14:23

Wo séra in dua sumisir sé penatua torona é jamaat itu. Séra sumombayang wo muasa en sumarakan sé penatua itu a si Casuruan si paémanen éra.

Kisah Para Rasul 15:22

Kumawus in itu pinusé' é ruru'du'an wo sé penatua wo ka'i pakasa en tou maéman an Yerusalem en sumisir piraan tou ai séra. Sé tou sé kinasisiran itu ayutus eng kumiit si Paulus wo si Barnabas mangé an Antiokhia. Sé sinisir éra itu, si Yudas si pengatuulen ka'i Barsabas wo si Silas. Sé tou maéman an Yerusalem mengasiri' ai séra in dua.

Kisah Para Rasul 15:30

Kumawus in itu, si Yudas wo si Silas mangé an Antiokhia. Am bitu towan éra pakasa sé tou maéman e mali'us wo en surat itu iwée i Yudas wo si Silas ai séra.

Kisah Para Rasul 15:40

Taan si Paulus isumisir si Silas. An tutuw éra i maangém, sé poo-poow maéman an Antiokhia mangilek a si Casuruan wosama' téiran-Na wo ituru'-Na en upus aitambér ai séra in dua.

Kisah Para Rasul 20:32

Intarépé', isarakanku kamu a si Amang Kasuruan wosama' kamu téiran-Na. Wo musti ka'i pena'né-na'néien iow en Abar Kaaruien andumoro' in upus tatambér-Na ai camu. En abar itu e méé ing kaketeran am paémanen iow wo ka'i si méé oka ing kamang si aijanji-Nao iwéé a sé pakasa sé tou si niéma'-Nao le'nas.

Roma 15:19

wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

2 Korintus 1:12

Kami marayo, sapaoka eng katouan ami asi cayo'baan anio', linangkoio ami ang karapi in lekep en até wo rondor en até. Kami menonou tanu siitu wuntulke' im paesaan wo icamu. Siituo eng kasairian in até weresi ami. Niéma' ami en itu, ra'ica ang karapi ing kapinteran é tou, taan ang karapi in upus aitambér i Amang Kasuruan.

Galatia 2:11

Taan an tutuw i Kefas mai an Antiokhia, sia sinundurku ampa'paan e niéma'na suméa'.

Kolose 1:25

Yaku imamualio tou si mengaselewir sé jamaat itu ampa'paan aku tinokéan i Amang Kasuruan in tawoien eng kumua im pakasa in Taar-Na ai camu.

Kolose 1:28

Anaé, si Kristus ituo sé ipakua ami a sé im pakasa in tou. Kami masina'u wo masusui iséra ang karapi wuta ing kapinteran asi Amang Kasuruan owo, wosama' kami ro'na makawali pakasa in tou wutu-wutul lekep ampa'paan meesao wo si Kristus.

Kolose 4:17

Wo icuao mangé a si Arkhipus, “Tawoieno mangé en tawoien si aiwéé mai i Casuruan ai co akar ing kumawus.”

2 Timotius 4:2

icuamuo mangé en Taar i Casuruan a sé tou, loor kuma'pa ra'ica loor en orasna, ko musti tu'tul e mengua-ngua in Taar itu. Sina'ueno mangé sé tou mengaéma' ing kameséaan, romaan angé séra ang karapi wuta ing katalesenan an tutuw ko mengasusui iséra.