Kisah Para Rasul 13:43 - En Taar Weru a nunuwu' é Tontemboan

⁴³ Kumawusai i maapo', sé tou itu kumesot am balé paapo'an wo awéan sé icumiit si Paulus wo si Barnabas. Séra itu sé tou Yahudi wo ka'i sé tou ra'ica Yahudi sé imuntepo agama Yahudi. Si Paulus wo si Barnabas sumina'u ai séra wosama' kasake' i mamangén an upus aitambér i Amang Kasuruan.

Kisah Para Rasul 13:43 ပူးပေါင်းရင်းမြစ်များ

Matius 23:15

Icawangkuro mio' kamu sé makailek wutul in Torat wo sé tou Farisi! Kamu anio' tou punek. Icamu imaya'o tayang lumangkoi in ta'sic wo ing katanaan asalo i maéré-éré si esa tou eng kumiit in sususuien in agama miow. Taan an tutuw i tou itu icumi- ito in sususuien in agama miow, niéma' miow sia mamuali tou si sumiwak muntep an api ra'ica mape'de-pe'del akar ing kauré-uré, wo eng kaléwo'na makarua lumepet wo ing kaléwo' miow.

Kisah Para Rasul 11:23

An tutuw i Barnabas icateka' a mangé mbitu, sérénna sé tou maéman am bitu tinambéranai ing kamang i Amang Kasuruan, wo sia wutu-wutul arui. Wo sina'uenna séra im baya wosama' uli-ulit ang karapi in lekep en até, le'tek a si Apo' Yesus.

Kisah Para Rasul 13:50

Taan sé tou Yahudi sé cumélong in Taar i Amang Kasuruan itu, séra memaso-maso' in léwo' a sé wéwéné sé mengaapo' a si Amang Kasuruan sé awéan pengaru wo ka'i a sé kikiiten ang kota itu. Wo okoien éra si Paulus wo si Barnabas wo yusér éra en tumela'u in sangkum itu.

Kisah Para Rasul 14:22

An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

Kisah Para Rasul 14:3

Anaé, si Paulus wo si Barnabas mento' uré toyo' am bitu. Wo ang karapi in da'ica wana kaindé'an pengua-ngua éra en abar andumoro' in upus aitambér i Casuruan. Séra in dua winéan-Na kawasa e méma' in tuu-tuus sé ra'io icakua wo kakaya'kaan-kakaya'kaan.

Kisah Para Rasul 16:14

Esaan angé ai séra, sé iluminga icami mapaar, awéan esa wéwéné makangaran Lidia. Sia ang kota Tiatira owo, sia mawangkér ing kaéng pares. Si Lidia anio' tou ra'ica Yahudi taan sia mengaapo' a si Amang Kasuruan. Wo an tutuw i Paulus mapaar andumoro' si Yesus, en aténa winuka' i Amang Kasuruan akar tinerimana sapa em ipakua i Paulus.

Kisah Para Rasul 17:17

Ampa'paano in itu sia mangé am balé paapo'an é agama Yahudi, wo sia memaa-maar wo sé piraan tou Yahudi wo sé tou ra'ica Yahudi sé maapo' a si Amang Kasuruan. Wo susur in endo, si Paulus meta'up wo sé tou am pasar, sia ka'i memaa-maar wo iséra.

Kisah Para Rasul 17:34

Taan awéan piraan tou en cumiit si Paulus, ampa'paan séra maémano a si Yesus. Esaan ai séra itu makangaran Dionisius, esaan asé anggota majelis Areopagus. Wo awéan ka'i esa wéwéné makangaran Damaris wo ka'i sé tou walina sé kumiit mewali-wali wo iséra.

Kisah Para Rasul 17:4

Awéan piraan asé tou Yahudi itu mamuali maéman a si Yesus. Wo kelian tou Yunani sé maapo' a si Amang Kasuruan wo sé wéwéné sé awéan pengaru ang kota itu, séra im baya meesa ang karapi i Paulus wo si Silas.

Kisah Para Rasul 18:7

Kumawus in itu, si Paulus kumesot am balé paapo'an é agama Yahudi. Sia mangé am balé i Titius Yustus, em balé itu mendiitan wo em balé paapo'an é agama Yahudi itu. Si Titius itu ra'ica tou Yahudi taan sia maapo' a si Amang Kasuruan.

Kisah Para Rasul 2:10

Frigia wo Pamfilia, Mesir wo sé an sangku-sangkum in Libia si mentawian wo eng Kirene, sé tou imanangkéi a Roma,

Kisah Para Rasul 28:23

Wo séra tumantu esa endo e meta'up sumawel wo si Paulus. Wo asi endo itu kelian sé imai an tampa pakaento'anna. Wo sia kumua wo masairi ai séra andumoro' si Amang Kasuruan Kumawasa tanu Kolano. Sia ka'i maké in tuu-tuus an ukum Torat wo eng kitap é nabi e rumaméji wosama' kailekan éra wo émanen éra sa si Yesus itu si Mesias. En itu imamuali tumo'tol i mamoondo akar im bawaando.

Kisah Para Rasul 6:5

Pakasa sé jamaat tumerima in sama' sé aicua ai séra itu. Anaé, séra sumisir pitu tou anio': Si Stefanus si wutu-wutul maéman wo kinawasa i Roh Le'nas, si Filipus, si Prokhorus, si Nikanor, si Timon, si Parmenas wo si Nikolaus si ra'ica tou Yahudi taan imuntepo agama Yahudi, sia mai an Antiokhia owo.

Roma 11:6

Sinisir-Na séra ampa'paan in upus si aitambér-Nao, ra'ica ampa'paan im pengaémaan éra. Sa séra sinisir-Na ampa'paan im pengaémaan éra, eng kaangéanna, Sia sumisir séra en sumuli' im pengaémaan éra ra'ica ampa'paan in upus aitambér-Na.

Roma 3:24

Taan ampa'paano in upus aitambér i Amang Kasuruan sé tou anggapen-Na wutul an dior-Na ampa'paan eng kamesé-meséaan éra tinu'buso i Kristus Yesus.

Roma 5:2

Wo ampa'paan kita maéman a si Yesus, kita imakéré in upus aitambér i Amang Kasuruan. Wo ampa'paan in upus aitambér ituo kita menonou intarépé'. Wo kita maaru-arui ampa'paan makaanu im paarapen sapaoka kita makéré oka bagéan a rarayo wo in sisiri' asi Amang Kasuruan owo.

Roma 5:21

Anaé, kita musti maté ampa'paan kita mengaéma' ing kamesé-meséaan. Taan si Amang Kasuruan itumambéro mai in upus-Na ai cita ampa'paano i Yesus Kristus Apo'ta akar kita nianggap wutul i Amang Kasuruan wo makéré ing katouan akar ing kauré-uré.

2 Korintus 5:11

Kailekan ami sapa eng kaangéan i maindé' a si Amang Kasuruan, ampa'paan in iituo raméjin ami méé ing kapercayaan a sé tou andumoro' in owak ami. Kailekan wutul i Amang Kasuruan sé an untep in até ami. Wo paarapenku kakailekan iow en até ami.

2 Korintus 6:1

Ampa'paan kami matawoi mewali-wali wo si Amang Kasuruan, pekiupusen ami imauli-ulit ai camu wosama' tioo paepesen iow im beren en upus aitambér i Amang Kasuruan si tinerimao miow itu.

Galatia 5:1

Si Kristus iméma'o icita ra'io ka'i ang kakawasaan in ukum Torat, wosama' kita ra'io pakawa'kesen in ukum Torat. Ampa'paano in itu timboieno sumama-sama' eng kaloasan itu, wo tioo maréng menonou tanuoka ata si pakawa'kesen in ukum Torat.

Galatia 5:4

Sa kamu rumaméji nianggap-Na wutul ampa'paan mengaéma' in ukum Torat, kamu aicatanéo wo si Kristus. Wo in taniitu icélong iow en upus aitambér i Amang Kasuruan.

Efesus 2:8

Ampa'paan kamu linowir in upus aitambér i Amang Kasuruan an tutuw iow maéman. Eng kalowiran itu asalo aitambér i Amang Kasuruan, ra'ica wuéna im pakasa sé loor sé pinengaéma' miow.

Filipi 3:16

Em penting keli kita menonou kiit asé sapa sé kinéréantao akar intarépé'.

Filipi 4:1

Ampa'paano in itu, é poo-poow sé icaupusku wo sé pengalelonku, pangilekenku entééno mangé em paémanen iow a si Apo' Yesus tanu in tou si uli-ulit keter makatulung. Icamuo eng kaaruianku wo eng katirayoanku si tanu mahkotaku.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

Kolose 1:28

Anaé, si Kristus ituo sé ipakua ami a sé im pakasa in tou. Kami masina'u wo masusui iséra ang karapi wuta ing kapinteran asi Amang Kasuruan owo, wosama' kami ro'na makawali pakasa in tou wutu-wutul lekep ampa'paan meesao wo si Kristus.

Titus 2:11

Ampa'paan si Amang Kasuruan itumambéro mai in upus-Na en lumowir waya sé tou.

Ibrani 12:15

Mareti-retio mangé oréoka awéan esaan ai camu kumélong in upus aitambér i Amang Kasuruan. Ampa'paan sa awéan tou tanu siitu, sia mamuali tanu in tinanem racung an uner iow akar méma' ing kasusaan wo en racungna luméwo' sé tou keli.

Ibrani 13:9

Tioo kamu isélé'kow in sususuien sé membam-balinaan sé ra'ica meputé wo in sususuien i Kristus. Lébé loor en até miow keteren ampa'paan kamu asalo makawangén asi upus aitambér i Amang Kasuruan. Sé atoran andumoro' ing kakanen, mandé kiiten iow, en itu ra'ica méé katoronaan ai camu.

1 Petrus 5:12

En surat kolek anio' aipaticku ai camu wo sinémbongan i Silas, si nianggapkuo poowku an esa paémanen. Sia itu le'tek am paémanen wo ro'na papercayan. Aipaticku en surat anio' en sumina'u wo méé kaincayaan ai camu wosama' ro'na percayan iow sapaoka sé aipaticku anio' uli-ulit abar wutul andumoro' ing kamang aitambér i Amang Kasuruan ai camu. Wo eng kamang itu musti timboian iow i mauli-ulit.

2 Petrus 3:14

Ampa'paan in ituo é poo-poow sé caupusku, ang karoro'an iow maento-ento' im pakasa itu mamuali, kamu musti rumaméji menonou le'nas wo ra'ica wana kaséaan an dior i Amang Kasuruan wo meeluran ang karapi-Na.

1 Yohanes 2:28

Anaé intarépé', toya-toyaangku, menonouo mangé meesa wo si Kristus, wo in taniitu, kita ra'ica oka maindé' wo ra'ica malawi' meta'up wo Sia an tutuw-Na maai sumawel.

2 Yohanes 1:9

Si tou ra'io ka'i makiit in sususuien i Kristus wo makiit oka in sususuien walina, sia itu ra'ica makaanu si Amang Kasuruan. Taan si tou makiit in sususuien i Kristus, sia itu makaanu si Amang wo ka'i si Toyaang.