Kisah Para Rasul 13:14 - En Taar Weru a nunuwu' é Tontemboan

¹⁴ Wo am Perga itu, si Paulus wo sé kara-karapina lumala'us ka'i im bawayaan éra akar icateka' an Antiokhia an sangkum im Pisidia. Asi endo Sabat séra muntep wo lumukut am balé paapo'an é agama Yahudi.

Kisah Para Rasul 13:14 ပူးပေါင်းရင်းမြစ်များ

Lukas 4:16

Asi makasa si Yesus mai a Nazaret si tampa winangko'an-Na. Imamualio kanaramen-Na asi endo Sabat, Sia muntep am balé paapo'an é agama Yahudi. Am bitu Sia tumulung e maca ing Kitap Le'nas.

Kisah Para Rasul 13:42

Kekawus i masusui, si Paulus wo si Barnabas kumesot am balé paapo'an itu. Taan sé tou am bitu mekiupus ai séra wosama' maréngai sumawel asi endo Sabat asi duminggu maai en sumusui ka'i andumoro' in taar itu.

Kisah Para Rasul 13:44

Asi endo Sabat kumiitai in itu, tawi pakasa sé tou ang kota Antiokhia mai mali'us en luminga si Paulus wo si Barnabas kumua andumoro' in taar i Amang Kasuruan.

Kisah Para Rasul 13:46

Taan ang karapi in da'ica wana kaindé'an, icua i Paulus wo si Barnabas, “Mémang wutul, en Taar i Amang Kasuruan itu musti icuao owo ai camu. Taan ra'ica kiim iow mercaya, kamu mawerot en owak iow ra'ica patus makéré ing katouan akar ing kauré-uré. Ampa'paano in itu, kamu itela'u ami wo kami maangé a sé tou ra'ica Yahudi eng kumua in taar i Casuruan itu.

Kisah Para Rasul 13:5

Icateka' mangé an Salamis am pulou Siprus, séra in dua kumua in Taar i Amang Kasuruan am balé-walé paapo'an é tou Yahudi. Asi témpo itu kumiit ka'i si Yohanes si patowan Markus, en sumémbonga i séra.

Kisah Para Rasul 14:19

Wo asi témpo itu mayo sé tou Yahudi a mangé en Antiokhia wo an Ikonium owo. Séra memaso-maso' in léwo' a sé tou keli itu akar si Paulus wangkilen éra im batu wo wésoon éra icesot ang kota, ampa'paan paweroten éra sia imatéo.

Kisah Para Rasul 16:13

Asi endo Sabat, kami kumesot am papalen wangko' ing kota. Kami kumiit an tembir in doyongan wo mangéré in tampa pengasombayangan é tou Yahudi, ampa'paan paweroten ami en tampa itu am bitu. An tutuw ami icateka' mangé an tampa pengasombayangan itu, kami meta'up wo sé wéwéné sé mali'us am bitu, kami lumukut wo mapaar andumoro' i Apo' Yesus ai séra.

Kisah Para Rasul 17:2

Tanu ing kanaramen, si Paulus muntep am balé paapo'an é agama Yahudi itu. Wo makatelu in endo Sabat mengking-kiitan, sia muntep am balé paapo'an memaa-maar wo sé tou andumoro' im bagéan-bagéan ing Kitap Le'nas.

Kisah Para Rasul 18:4

Susur in endo Sabat, si Paulus memaa-maar a sé tou Yahudi wo sé tou Yunani am balé paapo'an é agama Yahudi. Am bitu, raméjinna séra wosama' maéman a si Yesus.

Kisah Para Rasul 19:8

Telu ngaserap eng kauréna, si Paulus mengauntep am balé paapo'an é agama Yahudi. Am bitu sia maroma' ang karapi in da'- ica wana kaindé'an wo meindo-indoan roma' wo sé tou Yahudi wosama' percayan éra andumoro' ing kakolanoan i Amang Kasuruan.

Kisah Para Rasul 9:20

Asi témpo ituke', sia muntep am balé-walé paapo'an é agama Yahudi wo makua a sé tou sa si Yesus itu Toyaang i Amang Kasuruan.

2 Timotius 3:11

Kailekanmu ka'i tambisa sé tou mokoi yaku ang kota Antiokhia, an Ikonium wo an Listra akar aku mawendu ulit. Taan aku aiwekar i Casuruan am pakasa in itu.