Kisah Para Rasul 12:5 - En Taar Weru a nunuwu' é Tontemboan

⁵ Taniituo si Petrus tinang am bui. Taan sé tou maéman ra'ica mento' menomba-nombayang a si Amang Kasuruan torona i Petrus.

Kisah Para Rasul 12:5 ပူးပေါင်းရင်းမြစ်များ

Matius 18:19

Icua-Ku ka'i ai camu, ang kayo'baan anio' sa an uner iow awéan rua tou meesa mangilek sapake' mangé, em pinangilek iow itu tantu énan i Amang-Ku an sorga.

Lukas 18:1

Icua i Yesus esa andéan a sé murit-Na en sumusui séra wosama' ra'ica mengasuut mengasombayang a si Amang Kasuruan.

Kisah Para Rasul 12:12

Kekawusna memero-merot toyo', wo sia mangé am balé i Maria inang i Yohanes. Si Yohanes itu pengatuulen ka'i Markus. Am bitu kelian tou imali'us wo masombayang.

Kisah Para Rasul 12:4

Kekawus ako si Petrus tinangka', sia iru'du' i Herodes en yuntep am bui. Wo iru'du'na ka'i epat regu suraro mensan-sawelan tuméir si Petrus. Esa regu epat suraro. Si Petrus yuntepna am bui wosama' sa icumawuso en endo wangko' Paska, akimenna si Petrus an dior é tou keli.

Kisah Para Rasul 12:6

Asi sanga wengi, an tutuw ra'ipé' niakim i Herodes si Petrus an dior é tou keli, si Petrus tumekel an uner é rua suraro wo eng kamana wina'kes in dua ranté mewali-wali wo iséra. Awéan ka'i suraro makatéir an dior im papalen im bui.

1 Korintus 12:26

Anaé, sa esaan sé an owak mawendu, pakasa sé an owak itu ka'i kumiit mawendu. Sa esaan sé an owak makéré rarayoan, pakasa sé an owak ka'i maarui.

2 Korintus 1:11

Pekiupusen ami ai camu atasanai in sombayang wosama' si Amang Kasuruan tumawang icami. Wo in taniitu sowaten i Amang Kasuruan en somba-sombayang akar keli en tou kumua makapulu'sama' a si Amang Kasuruan ampa'paan ing kamang sé tinerima ami wo ampa'paan in sombayang é tou keli.

1 Tesalonika 5:17

wo musti menomba-nombayang.

Ibrani 13:3

Ta'néieno mangé sé kakélé miow sé an untep im bui, tanuoka kamu ka'i pakabuin mewali-wali wo iséra. Wo ta'néien ka'i sé kakélé miow paokoien, tanuoka kamu ka'i paokoien mewali-wali wo iséra.

Yakobus 5:16

Ampa'paan in ituo, mangakuo mangé ing kamesé-meséaan asi esa wo si esa wo menson-sombayangano mangé wosama' kamu masama'. En sombayang é tou mengaéma' im butul uli-ulit wangko' eng kawasana.