Kisah Para Rasul 10:38 - En Taar Weru a nunuwu' é Tontemboan

³⁸ Kailekan iow ka'i sapaoka si Amang Kasuruan imééo i Roh Le'nas wo eng kawasa-Na a si Yesus tou Nazaret, Sia mangé am bisa-wisa wo méma' sé loor wo sumama' pakasa in tou sé kinawasao i kikiiten é sétang ampa'paan si Amang Kasuruan mewali-wali wo Sia.

Kisah Para Rasul 10:38 ပူးပေါင်းရင်းမြစ်များ

Matius 12:15

Kailekan i Yesus em pinepaar éra, ampa'paan in itu itela'u- Na en tampa itu. Taan keli en tou sé makii-kiit Sia wo séra im baya sinama'Na.

Matius 12:28

Taan sa Aku musér si sétang maké ing kawasa i Roh i Amang Kasuruan, en ulitna si Amang Kasuruan Kumawasao tanu Kolano an uner iow.

Matius 9:19

Kelinga in itu tumulungo si Yesus, Sia wo sé murit-Na kumiito a si tou itu e maangé am baléna.

Matius 9:35

Wo si Yesus mangé lumi'cir im pakasa ing kota wo in doo-roong. Sia masusui am balé-walé paapo'an é agama Yahudi wo makua in Abar Kaaruien andumoro' ing Kakolanoan i Amang Kasuruan. Wo Sia ka'i sumama' sé tou sé membam-balinaan en sakit wo sé ra'ica lekep en owak.

Lukas 3:22

wo e Roh Le'nas si tanuoka mombo tumumpa mai ai Sia. Wo kalingaano en suara i Amang Kasuruan maroma' in tana'i, “Icoo si Toyaang-Ku si caupus-Ku. Icoo e mengaarui in até-Ku.”

Lukas 4:18

“E Roh i Amang Kasuruan a Yakuo ampa'paan Aku sinisir-Nao eng kumua in Abar Kaaruien a sé tou lengéi, wo Yaku ka'i ayutuso i Amang Kasuruan eng kumua a sé tou tana'i: sé tou ayuntep am bui iwekar-Na oka, sé tou wola émaan-Na oka ro'na maséré, sé tou paoko-okoien émaan-Na oka icawekar,

Lukas 9:42

An tutuw i toyaang itu mangé rumuru a si Yesus wo iwalintuang i sétang sia an tana' wo émaanna en owak i toyaang itu mene'da-ne'dai. Taan si sétang itu rinomaan i Yesus ang karapi in depet kumesot wo si toyaang itu makala'us masama'. Kumawus in itu isarakan sumawel i Yesus si toyaang itu a si amangna.

Lukas 9:56

Wo séra mangé an doong walina.

Yohanes 10:32

Icua i Yesus ai séra, “Kelian en tawoien loor asi Amang Kasuruan owo sé aituru'-Kuo ai camu. Asé pakasa in tawoien loor itu, si wisa réén si méma' icamu masalé' mangkil im batu a Yaku?”

Yohanes 16:32

Ta'néien! Maai oka en témpona, wo an témponao kamu icasera-serar oka e maréng an tampana i esa wo i esa, wo itela'u oka miow Yaku in esa. Taan en ulitna ra'ica Yakuke' in esa, ampa'paan Si Amang mewali-wali wo Yaku.

Yohanes 3:2

Asi sangawengi sia mai an tampa i Yesus, wo icuana ai Sia, “Guru, kailekan ami si Guru ayutus i Amang Kasuruan en sumusui ai cami. Ampa'paan, ra'ica wana tou e ro'na méma' sé kakaya'kaan kaputé sé niéma' i Guru, sa si Amang Kasuruan ra'ica mewali-wali wo isia.”

Yohanes 3:34

Ampa'paan si Yesus ayutus i Amang Kasuruan kumua in Taar-Na, ampa'paan winéan-Nao Roh ang karapi in da'- io icakua.

Yohanes 6:27

Tioo matawoi e makéré ing kakanen si ro'na maka'pu wo mawuruk, taan tumawoio mangé e makéré ing kakanen si ra'ica kawisa mawuruk wo si mawéé ing katouan akar ing kauré-uré. Si méé ing kakanen itu ai camu Yakuo si Toyaang i Tou, ampa'paan Aku aitantuo i Amang Kasuruan e méé ing kakanen itu.”

Kisah Para Rasul 10:37

Wo kailekan iow ka'i andumoro' im pakasa sé niéma' i Yesus tumo'tolai ang Galilea akar am pakasa in Yudea. En itu mamuali kekawus i Yohanes kumua a sé pakasa en tou sapaoka séra musti baptisen, tanu tuus imape'diso.

Kisah Para Rasul 2:22

Éi tou Israel, linganai sumama-sama' en cuaku anio'! Si Yesus tou Nazaret itu ayutuso mai i Amang Kasuruan. Wo kailekanta sapaoka si Amang Kasuruan maké Sia en tumuru' ing kawasa wo ing kakaya'kaan-kakaya'kaan wo tuu-tuus sé ra'io icakua sé mamuali an uner iow.

Ibrani 1:9

Ico masalé' sé ra'ica marapit, wo maréé sé mengaéma' in léwo' Siituo imangémai si Amang Kasuruan, Amang Kasuruan-Mu, isumisiro Ico, wo iméma'o Ico maaru-arui lébé arui wo sé kara-karapi-Mu.”

1 Petrus 5:8

Maténga-téngamo wo matéi-téiro mangé kamu! Ampa'paan si kikiiten é sétang si kaséké' miow itu mawaya-waya' tanu si singa mengua-nguang maéré-éré tou en lo'motenna.

1 Yohanes 2:20

Taan tinerimao miow e Roh Le'nas asi Yesus Kristus owo, ampa'paan in itu kamu im baya makaileko in sususuien wutul.

1 Yohanes 3:8

Taan si séi si mengéma-ngéma'pé' ing kamesé-meséaan, sia itu anu i kikiiten é sétang, ampa'paan si kikiiten é sétang itu tumo'tolke' mai indior mengéma-ngéma' ing kamesé-meséaan. Taan si Toyaang i Amang Kasuruan maai en tumeri im pakasa sé pengaémaan i kikiiten é sétang.