Kisah Para Rasul 1:8 - En Taar Weru a nunuwu' é Tontemboan

⁸ Taan an tutuw i Roh Le'nas tumumpa mai ai camu, kamu makéré oka kawasa. Wo kamu mamuali oka sairi andumoro' Yaku an Yerusalem, am pakasa in Yudea wo an Samaria wo akar an tempok ing kayo'baan.”

Kisah Para Rasul 1:8 ပူးပေါင်းရင်းမြစ်များ

Matius 24:14

Wo en Abar Kaaruien andumoro' ing Kakolanoan in Sorga ipakua-kua oka am bisa-wisa asi kayo'baan anio', e mamuali kasairian a sé pakasa é tou. Kumawus in itu maayo en endo kaka'puan ing kayo'baan.”

Matius 28:19

Ampa'paano in itu, mangém am pakasa im bangsa, wo émaano mangé séra mamuali murit-Ku. Baptiseno mangé séra ang karapi ngaran i Amang, i Toyaang wo i Roh Le'nas.

Markus 16:15

Wo icua-Na ai séra, “Mangém kamu am pakasa ing kayo'baan, wo icuao mangé en Abar Kaaruien-Na a sé im pakasa in tou.

Lukas 1:35

Isowat i malaékat itu ai sia, “E Roh Le'nas maai oka ai co wo eng kawasa i Amang Kasuruan Si Rumangka-rangka' maai lumoindong oka ico. Ampa'paano in itu si toyaang tumou ai ico itu sa, Le'nas wo pengatuulen oka Toyaang i Amang Kasuruan.

Lukas 10:19

Wéan rékén sumama-sama', winéan-Kuo kawasa kamu en luméak si ula' rumacu-racung wo si kalajengking wosama' ka'i ro'na kalan iow pakasa eng kawasa i kikiiten é sétang, akar ra'ica wana e ro'na méma' icamu cawangkur.

Lukas 24:29

Taan peleséén éra Sia wosama' tumuli. Icua éra, “Mentoo am bia'i mewali-wali wo icami, ampa'paan tawio mawengi wo ka'i mekeremo.” Wo si Yesus muntep am balé itu wo mento' mewali-wali wo iséra.

Yohanes 15:27

Wo icamu ka'i musti méé ing kasairian a sé tou walina andumoro' Yaku, ampa'paan kamu mewali-walio wo Yaku tumo'tolke' mai asi kataré.”

Kisah Para Rasul 1:22

tumo'tolai an tutuw i Yesus nibaptis i Yohanes akar Sia icaangkai angé an sorga tumela'u icita. Si tou itu musti mengasairi mewali-wali wo icita sapaoka si Yesus itumou sumawel asi papaté.”

Kisah Para Rasul 1:5

Si Yohanes Mabaptis, mengabaptis sé tou maké in dano, taan ra'- io uré ka'i kamu baptisen oka i Roh Le'nas.”

Kisah Para Rasul 13:31

Piraan ngando eng kauréna si Yesus mapaturu' in owak-Na a sé murit-Na, sé sumangkumo kumiit Sia ang Galilea owo wo mangé an Yerusalem. Sérao intarépé' sé mamuali sairi-sairi-Na a sé tou Israel.

Kisah Para Rasul 2:32

Si Yesus anioo si tinou sumawel i Amang Kasuruan. Wo icamio im baya e mamuali sairi andumoro' in itu.

Kisah Para Rasul 22:15

Ampa'paan ko musti mamuali sairi-Na wo icuamu oka a sé pakasa in tou sapa en sinéré wo en liningamu.

Kisah Para Rasul 3:15

Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

Kisah Para Rasul 4:33

Wo ang karapi ing kawasa wangko', sé ruru'du'an méé kasairian andumoro' i Apo' Yesus si tinou sumawel am papaté. Wo séra im baya menonou an upus si aitambér i Amang Kasuruan si ra'io icakua.

Kisah Para Rasul 5:32

Wo icamio e mamuali sairi andumoro' waya in itu, wo ka'i e Roh Le'nas si aiwéé i Amang Kasuruan a sé pakasa en tou sé le'tek ai Sia.”

Kisah Para Rasul 6:8

Si Amang Kasuruan tumambérai in upus wo ing kawasa-Na a si Stefanus, ampa'paan in ituo sia méma' ing kakaya'kaan wo in tuu-tuus sé ra'io icakua an uner é tou keli.

Roma 10:18

Taan wuéienku: Ra'ipé' réén sumangkum ako sé tou Israel luminga in Abar Kaaruien andumoro' i Yesus Kristus? Tantu séra sumangkumo luminga. Ampa'paan ang Kitap Le'nas aipatic in tana'i, “En suara é tou mengakua in abar, imakaro am pakasa ing kayo'baan, wo e nunuwu' éra imakaro a sé im pakasa é tou.”

Roma 15:19

wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.