Kisah Para Rasul 1:15 - En Taar Weru a nunuwu' é Tontemboan

¹⁵ Asi makasa, sé poo-poow esa paémanen a si Yesus imaumung mewali-wali. Eng kakeli éra wona' sangaatus rua ngapulu' tou. Wo si Petrus tumulung an uner éra wo kumua,

Kisah Para Rasul 1:15 ပူးပေါင်းရင်းမြစ်များ

Matius 13:31

Wo isisil ka'i i Yesus esa andéan walina ai séra, icua-Na, “Eng Kakolanoan in Sorga ayandé tanu im batuna si tumeki-tekic, niindo i esa tou wo mangé yusewna an umana.

Lukas 22:32

Taan aisombayang-Kuo ko é Simon, wosama' ko tatap maéman a Yaku. Kekawus im pangepé'an anio' wo sa ko mape'diso wo maémano sumawel a Yaku, ico musti méé ing kaincayaan a sé poo-poowmu akar em paémanen éra makaketer.”

Yohanes 14:12

En ulitna icua-Ku mangé ai camu, si séike' si maéman a Yaku, émaanna oka ka'i en tuu-tuus kakaya'kaan si meputé wo sé niéma'-Ku. Wo ka'i ro'na kaémaan-Na sé tuu-tuus kakaya'kaan sé wangko' mai wo sé niéma'-Ku itu, ampa'paan Aku maangém a si Amang-Ku.

Yohanes 21:23

Ampa'paano i nunuwu' i Yesus itu, akar icaseraro en abar a sé poo-poow itu sapaoka si murit itu ra'ica maté. En ulitna si Yesus ra'ica icumua sapaoka si murit itu ra'ica maté, taan aicua-Na, “Sa icasalé'-Ku sia imenonouke' melala'us akar Aku maai sumawel, en itu ra'ica urusanmu.”

Kisah Para Rasul 10:23

Wo pangileken i Petrus wosama' séra mento' am bitu. Mando mai, si Petrus tumu'tul wo mangé mewali-wali wo sé telu tou itu. Awéan ka'i piraan poow sé maéman an Yope sé icumiit wo sia.

Kisah Para Rasul 11:1

Sé ruru'du'an wo sé poo-poow esa paémanen an Yudea lumingao ka'i sapaoka awéan tou ra'ica Yahudi sé itumerimao in taar i Amang Kasuruan.

Kisah Para Rasul 11:12

Wo icua i Roh Le'nas a yaku, ‘Mangéo mewali-wali wo iséra. Tioo ko marua-rua wasa mandé séra ra'ica tou Yahudi.’ Kelinga in itu, yaku wo sé enem poow sé maémano anio', mewali-wali mangé ang Kaisarea. Icateka' mangé am bitu, kami muntep am balé i Kornelius.

Kisah Para Rasul 11:26

Wo sia meta'up wo si Saulus, kumawus in itu iwalina si Saulus an Antiokhia. Séra in dua mento' mewali-wali wo sé jamaat a mangé mbitu sangata'un eng kauréna. Séra ka'i mengasusui a sé tou keli andumoro' i Yesus. An Antiokhia anioo sé tou makiit in sususuien i Yesus kumataré-taré patuulen Krésten.

Kisah Para Rasul 11:29

Kumawus in itu, sé tou maéman an Antiokhia musé' en lumi'us roit patawang iwéé a sé poo-poow an esa paémanen an Yudea, iciit ing kawooan éra i esa wo si esa.

Kisah Para Rasul 12:17

Taan séinan i Petrus ing kama wosama' séra menes. Kumawus in itu isisilna ai séra tambisa si Casuruan makawali sia kumesot am bui. Wo icuana ai séra, “Icuao mangé pakasa en anio' a si Yakobus wo a sé poo-poowta walina sé maémano.” Wo sia kumesot am bitu wo mangé an tampa walina.

Kisah Para Rasul 14:2

Taan awéan tou Yahudi sé ra'ica kiim mercaya in aicua i Paulus wo si Barnabas, séra memaso-maso' in léwo' sé tou ra'ica Yahudi wosama' icasuut éra sé poo-poow esa paémanen itu.

Kisah Para Rasul 15:1

Awéan piraan tou an Yudea owo, mai an Antiokhia. Am bitu séra sumusui sé tou ra'ica Yahudi sé maémano in tana'i, “Sa kamu ra'ica sunaten iciit ing kanaramen si aisusui i Musa, kamu ra'ica malowir.”

Kisah Para Rasul 15:3

Wo séra iwali é tou maéman an Antiokhia akar ang kesot ing kota. Séra lumala'us im bawayaan lumangkoi im Fenisia wo in Samaria. An sangkum itu, ipakua éra ka'i sapaoka sé tou ra'ica Yahudi an tampa walina mape'diso wo maémano a si Yesus. En abar itu méé kaaruian a sé tou maéman am bitu.

Kisah Para Rasul 16:2

Sé tou maéman an Listra wo an Ikonium, makailek wutul si Timotius anio' tou sama'.

Kisah Para Rasul 16:40

Kekesot éra am bui itu, si Paulus wo si Silas mangé am balé i Lidia. Am bitu séra meta'up wo sé tou maéman wo wéan éra kaincayaan sé poo-poow itu. Kumawus in itu, séra in dua kumesot ang kota itu.

Kisah Para Rasul 17:10

Asi wengi ituke', sé tou maéman an Tesalonika rumu'du' si Paulus wo si Silas mangé am Berea. Wo an tutuw éra icateka' mangé am bitu, séra mangé am balé paapo'an é agama Yahudi.

Kisah Para Rasul 17:14

Ampa'paan in itu sé tou maéman ang kota itu rumu'du' si Paulus e mario-rior mangé an ta'sic. Taan si Silas wo si Timotius makaento'pé' am Berea.

Kisah Para Rasul 17:6

Taan ra'ica kinéréan éra si Paulus wo si Silas am bitu. Ampa'paano in itu wésoon éra si Yason wo piraan tou sé maéman wo iwali éra a sé makakawasa ing kota itu. Wo ipaangko' éra, “Sé tou mengalicoko am bisa-wisa imayo ang kota anio',

Kisah Para Rasul 18:18

Si Paulus mento'pé' ka'i piraan ngando ang Korintus. Wo sia mekiupus en tumela'u sé poo-poow maéman am bitu wo suméngkot angé an sangkum in Siria mewali-wali wo si Priskila wo si Akwila. Ra'ipé' mangé am bitu, si Paulus kumunting im buukna akar i mala'ngas ang kota Kengkera. Sia méma' in taniitu e mamuali tuus in janjina indior a si Amang Kasuruan, niéma'nao.

Kisah Para Rasul 18:27

Kekawus in itu si Apolos masalé' mangé an Akhaya. Anaé, sé tou maéman an Efesus kumirim surat a sé tou maéman an Akhaya wosama' ro'na sumungkul sia. Wo an tutuw i Apolos icateka' an Akhaya, sia wutu-wutul tumawang sé tou maéman ampa'paan in upus tatambér i Amang Kasuruan.

Kisah Para Rasul 21:17

An tutuw ami icateka' an Yerusalem, pakasa en tou maéman sumungkul icami ang karapi in arui en até.

Kisah Para Rasul 21:20

Kelinga in itu, séra rumayo wo sumiri' si Amang Kasuruan. Wo icua éra a si Paulus, “Éi poow! Musti kailekanmu sapaoka mariwuo eng kakeli é tou Yahudi maémano wo re'dem makiit in ukum Torat.

Kisah Para Rasul 21:7

Tela'u ami en Tirus wo sumaké kapal e mangé am Ptolemais. Kami tumumpa am bitu wo tumuli a sé poo-poow sé maémano wo méé in siri' ai séra wo mento' sangando am bitu mewali-wali wo iséra.

Kisah Para Rasul 22:5

Sé niéma'ku itu, kailekan i imam wangko' wo sé anggota i Mahkamah Agama, séra oka e méé kasairian ai camu sapaoka en itu wutul. Wo isérao itu ka'i e méé in surat kawasa a yaku em paalin a sé tou Yahudi an Damsyik. Anaé, ang karapi in surat kawasa itu, yaku ro'na tumangka' sé tou makiit in sususuien i Yesus sé an Damsyik. Kekawus in itu iwaliku mangé séra an Yerusalem en ukumen.

Kisah Para Rasul 28:14

Am bitu, kami meta'up wo sé tou maéman a si Yesus wo enoten éra kami mento' ang karapi éra pitu ngando eng kauréna. Kekawus in itu kami suméngkot mangé a Roma.

1 Korintus 15:6

Kumawus in itu Sia mangé ka'i mapaturu' in owak-Na a sé lima ngaatus lébé poo-poow maéman. Wo kinakelian asé tou itu menonoué' akar intarépé' wo sé piraan ai séra imatéo.

Wahyu 11:13

An tutuw ituke' mangéroo mai repet. Sangapepulu' ing kota itu materi, wo pitu ngariwu tou imaté ampa'paan im pangéro' itu. Wo sé tou walina maindé' keli, wo séra rumayo wo sumiri' si Amang Kasuruan an sorga.

Wahyu 3:4

Taan an Sardis awéané' sé tou sé ra'ica kumotor ing karai éra. Séra maya' oka mewali-wali wo Yaku mekarai ing karai kulo', ampa'paan séra patus tumerima in itu.