Ibrani 6:12 - En Taar Weru a nunuwu' é Tontemboan

¹² Wo in taniitu kamu ra'ica mangenger. Taan en casalé' ami wosama' kamu mengaandé mangé a sé tou sé tumerima in janji i Amang Kasuruan ampa'paano im paémanen wo ing katalesenan éra imaento-ento' mai in janji-Na itu.

Ibrani 6:12 ပူးပေါင်းရင်းမြစ်များ

Matius 22:32

‘Yakuo si Amang Kasuruan si pengaapo'an i Abraham, i Ishak wo si Yakub.’ An tutuw i Amang Kasuruan icumua in itu, si Abraham, Ishak wo si Yakub imatéo, taan séra kasake' menonou mewali-wali wo Sia. Anaé, si Amang Kasuruan itu ra'ica Kasuruan é tou imatéo, taan Kasuruan é tou menonou.”

Matius 25:26

Wo icua i tuangna, ‘Éi, ata léwo' wo ra'ica kiim tumawoi. Kailekanmuo sa aku mengaupu' an uma si ra'ica winurasanku in lulumbo wo mengaindo im buéna an uma si ra'ica niusewanku.

Lukas 16:22

Wo si Lazarus itu maté wo sia iwali mangé é malaékat lumukut an diit i Abraham an sorga. Si tou siya' itu ka'i maté wo sia cubur é tou.

Lukas 8:15

Wo en lulumbo irumongkor an tana' kemel itu, ayandé sé tou ilumingao in Taar i Amang Kasuruan wo en Taar itu wutu-wutul ayéma' éra an untep in até akar séra méé wua'na ing kale'tekkan.”

Roma 12:11

Tioo eng kare'deman iow maina', taan mandéo taré kamu incaya' maselewir a si Casuruan ang karapi i roh si aiwéé-Na.

Roma 2:7

Sé tou le'tek mengaéma' sé loor sé masalé' makéré i rarayo wo in sisiri' wo ing katouan sé ra'ica maka'pu, séra wéan-Na oka ing katouan akar ing kauré-uré.

Roma 4:12

Si Abraham ka'i mamuali amang é tou sé sinunato. Sia imamuali amang éra ra'ica ampa'paan séra mengakiit in atoran-atoran sunat, taan ampa'paan séra maéman a si Amang Kasuruan, meputé si Abraham imaémano an tutuw sia ra'ipé' sinunat.

1 Tesalonika 1:3

Susur ami sumombayang a si Amang Kasuruan Amangta, pena'né-na'néien ami em pakaselewir iow ampa'paan kamu maéman a si Yesus. Kata'néian ami tambisa kamu maselewir a sé tou walina ampa'paan séra icaupus iow. Kata'néiané' ami mandé ka'i kamu talesen meta'up ing kawenduan, pengaraméjin iow mengaéma' sé loor ampa'paan maara-arapke' a si Yesus Kristus Apo'ta.

2 Tesalonika 1:4

Ampa'paan in itu, kami arui masisil a sé jamaat in andumoro' icamu, ampa'paan kamu kasake' maéman a si Yesus wo kasake' talesen mandé ka'i kamu mendam in okoi wo ing kawenduan.

Ibrani 1:14

Sa taniitu, si séi réén sé malaékat itu? Séra sé roh mengaéma' sapa sé airu'du' i Amang Kasuruan, sé ayutus-Na en tumawang sé tou sé makéré oka ing kalowiran.

Ibrani 10:36

Anaé, intarépé' kamu musti malese-lesen sa meta'up ing kawenduan, wosama' kaémaan iow eng kasalé'an i Amang Kasuruan. Wo in taniitu kamu ro'na tumerima sapa sé aijanji-Na.

Ibrani 11:33

Ampa'paan séra im baya awéan paémanen, akar awéan en icumala sé kakolanoan, awéan sé maperénta ang karapi ra'ica marapit, awéan sé makéré sapa si aijanjio i Casuruan, wo awéan ka'i sé kumetep im ba'ba' é singa,

Ibrani 12:1

Tumo'tolke' mai indior, keli en tou sé imamuali sairi im paémanen éra torona icita. Kita pakali'ciren é tou keli itu tanuoka ing kambung makali'cir icita. Ampa'paan in ituo mayoo tiya'ta waya em pamuléngen wo ing kamesé-meséaan si makaléngkété' ai cita, wo kasake' talesen am pekowaan si pakasarunta.

Ibrani 13:7

Ta'néien angé sé kikiiten iow sé icumuao in Taar i Amang Kasuruan ai camu. Séréno sumama-sama' tambisa eng katouan éra akar séra maté, wo andéano mangé em paémanen éra.

Ibrani 5:11

Keliané' sé musti icua ami in andumoro' in itu, taan susa en sumisil ampa'paan kamu ngenger makailek.

Ibrani 6:15

Si Abraham talesen keli mangento-ngento' in janji itu mamuali, wo in taniitu kinéréanna sapa si aijanjio i Amang Kasuruan ai sia.

Yakobus 1:3

Ampa'paan kailekan iow sa kamu tatap maéman a si Casuruan an tutuw iow meta'up i membam-balinaan pangepé'an, en itu méma' oka icamu makale'tek maéman.

2 Petrus 1:10

Ampa'paan in ituo é poo-poowku, kamu musti rumaméji tumuru' sapaoka kamu uli-ulit tinowa wo sinisir i Amang Kasuruan kumiit ai Sia. Sa émaan iow pakasa en itu, em paémanen iow a si Kristus makaketer wo ra'ica kawisa kamu lumepok ang kamesé-meséaan.

1 Yohanes 2:25

Wo si anioo en aijanji-Nao in esa ai cita: kita menonou oka akar ing kauré-uré.

Wahyu 13:10

“Si séi si aitantuo e mamuali tawanan, sia mamuali oka tawa- nan. Si séi si aitantuo patén in sa'bel sia patén oka in sa'bel.” Ampa'paan in ituo sé tou le'nas musti talesen wo le'tek maéman mandé meta'up ing kawenduan.