Ibrani 4:12 - En Taar Weru a nunuwu' é Tontemboan

¹² En Taar i Amang Kasuruan itu menonou wo makakawasa. Wo en Taar itu ilumébé mai ing katelew in sa'bel rua telewa, ro'na tumopok rarem keli akar tumané i mu'kur wo e roh, wunak wo wuku-wuku in du'i, wo ro'na kailekan-Na waya sé an untep im bewerot wo im paaté-atén é tou.

Ibrani 4:12 ပူးပေါင်းရင်းမြစ်များ

Lukas 8:11

Tana'i eng kaangéan in andéan itu: En lulumbo itu, siituo en Taar i Amang Kasuruan.

Yohanes 12:48

Taan si séike' eng kumélong Yaku wo ra'ica tumerima sé ipakua-Ku, séra ukumen oka i Amang Kasuruan asi endo kaka'puan kiit i nunuwu' sé aicua-Kuo.

Yohanes 6:51

Yakuo eng kakanen si mawéé ing katouan si tumumpao mai an sorga owo. Sa si tou kuman ing kakanen anio', sia menonou oka akar ing kauré-uré. Eng kakanen si wéé-Ku itu, siituo en owak-Ku si iwéé-Ku oka a sé tou ang kayo'baan wosama' séra ro'na menonou akar ing kauré-uré.”

Kisah Para Rasul 2:37

An tutuw éra luminga waya in itu, en até éra mendam i manesel wo séra mamuéi a si Petrus wo sé ruru'du'an walina, “Poo-poow, sapa réén e musti émaan ami?”

Kisah Para Rasul 4:31

Makasombayangai séra, en tampa lini'usan éra itu mangéro'. Wo séra kawasan i Roh Le'nas wo tumo'tolo makua in Taar i Amang Kasuruan ang karapi wuta ing kabranian.

Kisah Para Rasul 5:33

Kelinga in itu, sé anggota Mahkamah Agama mae'bow keli. Wo séra mawasa e maté sé ruru'du'an itu.

Kisah Para Rasul 7:38

Si Musa anio' si mewali-wali wo sé apo-apo'ta tou Israel an tana' kapayasan. An tutuw ang kuntung Sinai, awéan malaékat mai mepaar wo isia en icua a sé apo-apo'ta, siituo en taar i Amang Kasuruan si tinerimana si méma' icita menonou.

Roma 1:16

Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

1 Korintus 1:24

Taan sé tou tinowao i Amang Kasuruan, tou Yahudi kuma'pa ra'ica Yahudi, séra ro'na makailek andumoro' ing kawasa i Amang Kasuruan wo eng kapinteran-Na, asi abar i Kristus itu.

2 Korintus 2:17

Kami ra'ica meputé wo sé kinakelian tou sé mengakua in abar i Amang Kasuruan e mangéré ing kauntungan in esa. Em paangé-angén ami lekep en até, ampa'paan si Amang Kasuruan e rumu'du' icami. Wo si Amang Kasuruan in esa en suméré sapaoka icami makua in abar itu tanu ata-ata i Kristus.

2 Korintus 4:2

Ra'ica kiim ami iméma' in tawoien anio' maké ing kanaramen sé ipaene-enep wo sé kalawiin. Wo ra'ica kiim ami matawoi ang karapi imauwak wo mengasélé'kow in Taar i Amang Kasuruan. Taan sé ipakua ami andumoro' sé wutul an dior i Casuruan, wo in taniitu icami maarap wosama' pakasa in tou numilai sumama-sama' ai cami an dior i Amang Kasuruan iciit in até weresi éra.

Efesus 5:13

Taan sapa-sapake' sé ang kariréimbengan, kaséré-séréan keli sa kinatélangano in sendot, ampa'paan en sendot itu tumuru' im baya-waya.

Efesus 5:26

Niéma'-Na en itu wosama' Sia lume'nas sé jamaat kekawus éra wineresi-Na in dano wo in Taar,

Efesus 6:17

Kamu linowiro i Amang Kasuruan, pakénno mangé eng kalowiran iow itu tanu pengaloindong an do'kos iow. Wo ka'i terimano mangé en Taar i Amang Kasuruan tanu sa'bel si aiwéé i Roh Le'nas en sumundur sé kaséké'.

1 Tesalonika 2:13

An tutuw ipakua ami en taar i Amang Kasuruan, tinerimao miow en itu tanu nunuwu' i Casuruan ra'ica nunuwu' é tou. Wo en aisowat iow itu wutul, ampa'paan en taar i Amang Kasuruan itu ang karoro'ano i matawoi ang katouan iow sé maéman a si Apo' Yesus. Ampa'paan in ituo kami mengua-ngua i makapulu'sama' ai Sia.

1 Tesalonika 5:23

Pangileken ami a si Amang Kasuruan wosama' émaan-Na eng katouan iow male'nas. Siao ka'i méma' icita menonou ang kaeluran. Pangileken ami ka'i téiran-Na mai en owak, en até wo e mu'kur iow wosama' an tutuw si Apo'ta Yesus Kristus maai sumawel, kamu ra'ica wana kaséaan ampa'paan kamu ra'ica iméma' ing kameséaan sapa-sapa.

Ibrani 13:7

Ta'néien angé sé kikiiten iow sé icumuao in Taar i Amang Kasuruan ai camu. Séréno sumama-sama' tambisa eng katouan éra akar séra maté, wo andéano mangé em paémanen éra.

Ibrani 6:5

wo sumangkumo makailek sapaoka en Taar i Amang Kasuruan itu loor wo sumangkumo mepé' mai ing kawasa i Amang Kasuruan si kawasa ang kayo'baan weru sa,

Yakobus 1:18

Kita niéma'-Na mamuali toya-toyaang-Na ang karapi in Taar wutul kumiit ing kasalé'an-Na. En itu icasalé'-Na wosama' kita mamuali wuéna kataré-taré asé im pakasa sé niéma'-Na.

1 Petrus 1:23

Ampa'paan eng katouan weru si kinéréan iow ra'ica kinéréan iow asé tou si ro'na maté, taan kinéréan iow ampa'paan kamu maéman in Taar i Amang Kasuruan. En Taar ituo si Taar menonou wo awéan melala'us akar ing kauré-uré.

Wahyu 1:16

Wo eng kama kakan-Na makatimboi sé pitu sumesendot, wo am ba'ba'-Na makakesot esa sa'bel rua en telewa. Eng gio-Na matélang tanuoka si yéndo asi katoora in endo.

Wahyu 19:15

Wo am ba'ba'-Na makesotai esa sa'bel telew si kumala oka pakasa im bangsa. Peréntan-Na oka séra maké im beka' bési wo Sia in esa en tumepes im bua'na in anggor am patepesan ing kae'bowan i Amang Kasuruan Si Makakawasa.

Wahyu 19:21

Wo pakasa sé tou walina pinaté in sa'bel si makesotai am ba'ba'-Na si makalukut an licur i cawayo kulo' itu. Wo pakasa sé burung imawesu mengula-ngulat in sama'na éra.

Wahyu 2:16

Ampa'paan in itu mape'diso mio'! Sa kamu ra'ica mape'dis, yaku makala'us oka maai ai camu wo perangen-Ku oka sé tou itu maké in sa'bel makakesot am ba'ba'-Ku.

Wahyu 2:23

Wo patén-Ku oka sé toyaangna. Wo in taniitu kailekan oka waya é jamaat sapaoka Yakuo si makailek im bewerot wo in até é tou, wo suliin-Ku oka kamu si esa wo si esa iciit im paémaan iow.

Wahyu 20:4

Kekawus in itu sérénku em palukutan pasiri-siriin, wo sé makalukut am bawona. Séra winéan kawasa e makim. Wo sérénku ka'i sé mu'kur é tou sé imaté pinokolan in do'kos ampa'paan mengasairi in andumoro' i Yesus wo ka'i mengakua in Taar i Amang Kasuruan. Séra sé tou sé ra'ica makuru en sumiri' a si binatang itu wo im patongna, wo ra'ica tumerima in tuusna an tuintung wo ang kama éra. Séra itu tinou sumawel wo merénta mewali-wali wo si Kristus sangariwu ngata'un eng kauréna.