Ibrani 2:10 - En Taar Weru a nunuwu' é Tontemboan

¹⁰ Si Amang Kasuruan iméma'o im baya-waya, wo pakasa sé niéma'-Na itu torona Sia wo icasalé'-Na e makawali sé tou keli a rarayo wo in sisiri'-Na. Wo pinusé'-Nao si Yesus mamuali Lumolowir si makaleke-lekep, en lalanna musti mendam owo ing kawenduan akar imaté. Si Yesus ituo e muka' in lalan torona é tou wosama' ro'na makéré ing kalowiran.

Ibrani 2:10 ပူးပေါင်းရင်းမြစ်များ

Lukas 13:32

Isowat i Yesus ai séra, “Mangém wo icuao mangé a si serigala itu, ‘Asi endo anio' wo woondo yusér-Ku sé roh léwo' wo sumama' sé tou sumakit, taan asi endo katelu, lekepen-Ku waya en tawoien-Ku.’

Lukas 2:14

“Irayoo wo siriino mangé si Amang Kasuruan an tampa rumangka-rangka'! Wo am bawo ing kayo'baan wéan-Na mai ing kaeluran a sé tou sé mengaarui in até-Na.”

Lukas 24:26

Ra'ica réén kailekan iow sapaoka si Kristus musti sumangkum owo waya ing kawenduan itu, kumawus in itu Sia tumerima i rarayo wo in sisiri'?”

Lukas 24:46

Wo icua-Na ai séra, “Aipatic ang Kitap Le'nas tana'i: Si Mesias, si Colano Lumolowir, musti mawendu wo maté wo asi endo katelu tumou sumawel an uner é tou imaté.

Yohanes 11:52

wo ra'ica asaloke' sé tou Yahudi, taan ka'i en lumi'us wo meesa sé toyaang i Amang Kasuruan sé imeseraro am pakasa ing kayo'baan.

Yohanes 19:30

Keepé'-Na in anggor esem itu, icua-Na, “Malekepo!” Wo icuru-Na en do'kos wo isarakan-Na e mu'kur-Na.

Kisah Para Rasul 3:15

Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

Kisah Para Rasul 5:31

Wo angkaien-Na mangé si Yesus ang karapi ing kama kakan-Na an tampa pasiri-siriin, wosama' sé tou Israel ro'na mape'dis wo makéré ing kaampungan ang kamesé-meséaan.

Roma 11:36

Ampa'paan si Amang Kasuruano e méma' im baya-waya, wo pakasa en itu Siake' en tumu'tul. Pakasa en itu niéma'-Na wosama' Sia irayo. Anaé, irayoo wo siriino mangé Sia akar ing kauré-uré! Ulit.

Roma 9:23

Sia talesen ai séra wosama' Sia ro'na tumuru' ing kawangko' i rarayo wo in sisiri'-Na a sé tou icaupus-Na, sé aitu'tul-Nao indioré' owo a sé tou en tumerima in itu.

1 Korintus 2:7

Sé ipakua ami itu kapinteran asi Amang Kasuruan owo. Eng kapinteran itu ra'ipé' kailekan é tou wo aicaenepé', taan en itu tinu'tulo i Amang Kasuruan an tutuw eng kayo'baan anio' ra'ipé' niéma' wosama' kéréanta em bagéan asi rarayo wo in sisiri'-Na.

1 Korintus 8:6

Taan ai cita anio', si Amang Kasuruan itu wayake' in esa, Siao si Amang si méma' im baya-waya. Torona Siake' kita menonou. Wo ka'i si Casuruan waya in esa, Siao si Yesus Kristus. Ampa'paano Sia em baya-waya niéma' wo ampa'paano Sia kita menonou.

2 Korintus 3:18

Intarépé' en amota im baya ra'io pakatutuwan ing kaéng wo icita masendot in télang i Casuruan. Wo ampa'paano in itu icita peroba-roban mamuali tanu Sia, menguré-uré icita makatélango. Eng katélang itu asi Casuruan owo, Siao e Roh.

2 Korintus 4:17

Wo eng kawenduan sé papendamen ami intarépé' ra'ica uter wo ang karoro'anke'. Taan teriman ami oka eng kaaruian si ra'io icakua wo eng kaaruian itu akar ing kauré-uré. Eng kaaruian itu ilumébé mai wo ing kawangko' sa ipeputé wo ing kawenduan si pinendam ami mai.

2 Korintus 5:18

Pakasa in itu tatawoi i Amang Kasuruan. Émaan-Na icita meeluran wo Sia ampa'paano i Kristus. Wo si Amang Kasuruan iméé in tawoien ai cita e makawali waya sé tou meeluran wo Sia.

2 Korintus 6:18

Wo Aku mamuali oka Amangmu, wo kamu mamuali oka toya-toyaang-Ku, taniituo en aicua i Amang Kasuruan si Makakawasa.”

Galatia 3:26

Kamu im baya imamualio toya-toyaang i Amang Kasuruan ampa'paan maéman a si Yesus Kristus.

Efesus 2:7

Niéma' i Amang Kasuruan pakasa en itu wosama' asi témpo maai sa, ituru'-Na oka eng kawangko' in upus-Na si mawuta-wuta kiit ing kasamaan-Na ai cita sé meesao ang karapi i Kristus Yesus.

Efesus 3:10

Em basa-Na en tumuru' im pawasa-wasan ing kapinteran-Na si wangko' itu a sé malaékat sé maperénta wo sé makakawasa an sorga. Wo eng kapinteran-Na intarépé' icua oka é jamaat ai séra.

Kolose 3:4

Si Kristuso em palemboian ing katouan iow. Wo sa Sia maai sumawel ang kayo'baan ang karapi i rarayo wo in sisiri'-Na, kamu ka'i kaséréan oka wo pekiit irayo wo in siriin mewali-wali wo Sia.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

Ibrani 12:2

Am papekowaan anio', mayoo kiitenta ang karapi im beren si asalo makatéinteng angé a si Yesus, ampa'paan Siao si maakin im paémanenta a si Amang Kasuruan wo si makawali im paémanenta makaleke-lekep. Sia talesen pengaokoien akar maté ang kayu salip, ra'ica pandungen-Na em pengaroros ampa'paan kailekan-Na sapaoka makasangkum ako im pakasa in itu awéan kaaruian si aitu'tulo ai Sia. Intarépé' Sia makalukut ang kakan im palukutan pasiri-siriin i Amang Kasuruan.

Ibrani 6:20

Wo si Yesus imuntepo am bitu rumior angé ai cita, an tutuw-Na mamuali Imam Wangko' akar ing kauré-uré kaputé i Melkisedek indior.

Ibrani 7:26

Anaé, si Yesus ituo si Imam Wangko' si paperlunta. Sia itu le'nas, Sia ra'ica wana kaséaan wo ra'ica wana e ro'na méé kaséaan. Sia aitané asé tou sé iméma' ing kamesé-meséaan, wo niangkai angé asi tampa pasiri-siriin an sorga.

Ibrani 7:28

Iciit in ukum Torat, si imam wangko' pengaangkaien asé tou biasa sé ra'ipé' lekep. Taan kekawus in ukum Torat, si Amang Kasuruan mangkai si Toyaang-Na maké in sumpa, wo si Toyaang-Na niéma'o mamuali Imam Wangko' si lekep akar ing kauré-uré.

1 Petrus 1:12

Aicuao i Amang Kasuruan a sé nabi sapaoka sé ipakua éra itu ra'ica torona in owak éra in esa, taan torona miow intarépé'. Sé pakua éra itu, siituo en Abar Kaaruien andumoro' i Yesus Kristus. Wo intarépé' awéan sé tou kinawasa i Roh Le'nas an sorga owo, séra ituo sé tou makua in Abar Kaaruien itu ai camu. Sé malaékat ka'i masalé' makailek andumoro' ing kalowiran sé aicuao ai camu.

1 Petrus 5:1

Yaku ka'i penatua an jamaat kaputé miow. Yaku anio' sairi an tutuw i Kristus pengaokoien. Wo an tutuw i Kristus maai sumawel ang karapi i rarayo wo in sisiri'-Na, yaku icauntep asé tou sé makéré oka bagéan asi rarayo wo in sisiri' si ituru' oka itu. Anaé, sina'uenku kamu sé penatua katawoiku:

1 Petrus 5:10

Taan eng kawenduan si pendamen iow itu ra'ica uré. Kekawus in itu, émaan oka i Amang Kasuruan em paémanen iow makaleke-lekep wo émaan-Na oka en até miow makaketer wo émaan-Na ka'i kamu mauli-ulit maéman ai Sia. Ampa'paan Sia itu Amang Kasuruan si palemboian waya ing kamang aitambér wo itumowao icamu maéman a si Kristus, wosama' kamu kumiit mendam i rarayo wo en sisiri'-Na akar ing kauré-uré.

Wahyu 4:11

“O, Kasuruan! O, Amang Kasuruan ami! Wayake' Ico em patus makéré in darayo, wo in sisiri' wo ing kawasa. Ampa'paan si Casuruan méma'o im baya-waya, wo ampa'paano ing kasalé'an-Mu pakasa en itu niéma'o wo awéan.”

Wahyu 7:9

Kekawus in itu, sérénku ka'i sangareru' tou sé ra'io karékénan eng kakelina. Séra itu asé im pakasa im bangsa, in suku, i negara, wo i nunuwu'. Séra makatulung an dior im palukutan pasiri-siriin wo an dior i Toyaang i Domba itu. Séra mekarai ing kulo' wo eng kama éra makatimboi in lala-lalaina im palem.