Ibrani 13:18 - En Taar Weru a nunuwu' é Tontemboan

¹⁸ Ipenomba-nombayango mangé kami. Ampa'paan percayan ami en até ami uli-ulit weresi, ampa'paan am baya-waya kami masalé' mengéma-ngéma' sapa sé loor.

Ibrani 13:18 ပူးပေါင်းရင်းမြစ်များ

Kisah Para Rasul 23:1

An tutuw i Paulus aisaru a sé anggota Mahkamah Agama, téintengenna séra wo kumua, “Éi poo-poow, akar asi endo anio' aku menonou ang karapi in até weresi an dior i Amang Kasuruan.”

Kisah Para Rasul 24:16

Ampa'paano in itu, yaku tatap rumaméji menonou ang karapi in até weresi an dior i Amang Kasuruan wo ka'i an dior é tou.

Roma 12:17

Tioo kamu mengasuli' in léwo' a sé tou sé mengaéma' in léwo' ai camu. Taan émaano mangé sapa sé paanggapen loor é pakasa in tou.

Roma 13:13

Mayoo kita menonou in loor, tanu sé tou menonou ang kasendotan. Tioo mengéma-ngéma' ing kasalé-salé'an ing kuman wo mengele-ngelep sé ra'io masoma wo malangu-langu, tioo mengéma-ngéma' andumoro' in sina wo makiit ing kasalé'an sé ra'ica loor, tioo meindo-indoan roma' wo mangana-nganat.

Roma 15:30

Poo-poowku an esa paémanen, ampa'paan kita maémano a si Apo'ta Yesus Kristus, siituo e mangémai e Roh Le'nas matawoi an atéta akar kita ro'na meupu-upusan si esa wo si esa. Anaé, pekiupusenku ai camu wosama' kamu uli-ulit rumaméji mewali-wali wo yaku en sumombayang a si Amang Kasuruan toronaku.

2 Korintus 1:12

Kami marayo, sapaoka eng katouan ami asi cayo'baan anio', linangkoio ami ang karapi in lekep en até wo rondor en até. Kami menonou tanu siitu wuntulke' im paesaan wo icamu. Siituo eng kasairian in até weresi ami. Niéma' ami en itu, ra'ica ang karapi ing kapinteran é tou, taan ang karapi in upus aitambér i Amang Kasuruan.

Filipi 4:8

Anaé, é poo-poow, icuaku mangé ai camu, pakasa sé paanggapen wutul i Amang Kasuruan, pakasa e rarayo wo in sisiri', pakasa sé ra'ica marapit, pakasa sé le'nas, pakasa sé loor, pakasa sé manam pengalingan, pakasa sé patus paangkaian im bawangko' wo patus iparayo, weroteno mangé sumama-sama' en itu.

Kolose 4:3

Wo isombayang ka'i mangé kami wosama' wukaan-Na mai en lalan ai cami eng kumua in abar si indior aicaenepé' andumoro' i Kristus. Ampa'paan i méma' in itu akar aku ayuntep am bui.

1 Tesalonika 4:12

Wo in taniitu, kamu siriin oka é tou sé ra'ica maéman a si Apo' Yesus, wo kamu ra'ica mengamangén a sé tou walina.

1 Tesalonika 5:25

Poo-poow, pangileken ami ai camu isombayang angé kami.

2 Tesalonika 3:1

Poo-poow, pangileken ami ai camu isombayang angé kami, wosama' en taar i Casuruan si pakua ami rior icaserar am bisa-wisa wo ro'na iparayo-rayo é tou tanu si mamuali ai camu indior.

1 Timotius 1:5

Sina'uku waya en anio' ai co wosama' sé tou meupu-upusan. Wo en upus itu musti lumembomai an até le'nas wo an até weresi owo wo am paémanen imauli-ulit.

1 Petrus 2:12

Em peri miow musti loor an dior é tou sé ra'ica makatuus si Amang Kasuruan. Mandé ka'i patudun éra kamu tou léwo', sérén éra oka sé pengaémaan iow loor wo in taniitu séra rumayo wo sumiri' oka si Amang Kasuruan, an tutuw maai en endo-Na sa.

1 Petrus 3:16

Sa kamu sumowat, musti uli-ulit ang karapi in até weresi, wosama' sé tou maroros icamu ampa'paan kamu makiit si Kristus, séra in esa e malawi' ampa'paan sé iparoros éra itu ra'ica wutul.

1 Petrus 3:21

Si sonop wangko' an tutuw itu, andéan im baptisan intarépé'. Em baptisan itu pengatuus sapaoka kamu linowiro i Amang Kasuruan ampa'paano tinou-Na sumawel si Yesus Kristus. Em baptisan itu ra'ica i meresi sé kotor an owak iow, taan i mangilek a si Amang Kasuruan wosama' en até miow weresi.