Ibrani 10:5 - En Taar Weru a nunuwu' é Tontemboan

⁵ Ampa'paan in itu tutuw si Kristus mai ang kayo'baan anio', Icua-Na in tana'i, “Si Amang Kasuruan ra'ica masalé' sé binatang pinokol wo i raragés, taan aitu'tulo i Amang Kasuruan en owak-Ku e iragés.

Ibrani 10:5 ပူးပေါင်းရင်းမြစ်များ

Matius 11:3

wo iru'du'na sé muritna mangé mamuéi a si Yesus, “Amang, si Amang réén si tou aijanjio i Amang Kasuruan si maai itu? Kuma'pa tou walina e musti entoon ami maai?”

Lukas 1:35

Isowat i malaékat itu ai sia, “E Roh Le'nas maai oka ai co wo eng kawasa i Amang Kasuruan Si Rumangka-rangka' maai lumoindong oka ico. Ampa'paano in itu si toyaang tumou ai ico itu sa, Le'nas wo pengatuulen oka Toyaang i Amang Kasuruan.

Lukas 7:19

wo towanna rua tou asé muritna wo iru'du'na séra mangé mamuéi a si Apo' Yesus, “Amang, si Amang réén si tou aijanjio i Amang Kasuruan maai itu? Kuma'pa tou walina e musti entoon ami?”

Yohanes 1:14

Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na.

Galatia 4:4

Taan asi oras aitantuo i Amang Kasuruan, yutus-Na si Toyaang-Na ang kayo'baan. Si Toyaang-Na tumou asi esa wéwéné wo menonou le'tek mengaéma' in ukum Torat tanu tou Yahudi.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

Ibrani 1:6

Taan, an tutuw si Amang Kasuruan imutusai si Toyaang-Na luluna mai ang kayo'baan anio', icua-Na in tana'i, “Pakasa sé malaékat i Amang Kasuruan musti kumuru en sumiri' Sia.”

Ibrani 10:10

Ampa'paan ing kasalé'an i Amang Kasuruan tanu siitu, kita line'naso torona ing kauré-uré an tutuw i Yesus Kristus rumagés in owak-Na wayake' i makasa.

Ibrani 10:7

Wo icua-Ku, ‘Si anioo Aku, é Amang Kasuruan! Yaku imai e méma' ing kasalé'an-Mu, tanu si aipatic andumoro' Yaku ang Kitap Le'nas.’ ”

Ibrani 10:8

Si aicua i Kristus kataré-taré an dangka' in tana'i, “Si Amang Kasuruan ra'ica masalé' sé raragés binatang pinokol wo i raragés walina, wo sé binatang pinokol tinunu wo sé binatang pinokol torona ing kaampungan ing kamesé-meséaan.” Mandé ka'i sé raragés itu airagés makiit in atoran an ukum Torat.

Ibrani 2:14

Sé tou patuulen i Yesus toya-toyaang itu, séra asaloke' tou si ro'na maté. Anaé, si Yesus imamuali tou wo menonou meputé wo sé tou, wosama' em papaté ro'na sangkumen-Na kaputé in tou. Wo ampa'paano im papaté-Na itu, ro'na kalan-Na si kikiiten é sétang si makakawasa im papaté.

Ibrani 5:7

An tutuw i Yesus menonou tanu tou ang kayo'baan, Sia masombayang wo mapekiupus ang karapi imaangko' maamé' a si Amang Kasuruan si makawoo lumowir Sia am papaté. Ampa'paan Sia le'tek wo wuta in siri' a si Amang Kasuruan, akar en sombayang-Na lininga.

Ibrani 8:3

Susur imam wangko', aitantu e méé i raragés binatang pinokol wo raragés walina. Taniitu ka'i wo si Yesus Imam Wangko'ta, Sia musti makaanu sapa sé ro'na iragés.

1 Petrus 2:24

Sia in esa imuléngo ing kamesé-meséaanta an owak-Na, an tutuw-Na imaté ang kayu salip. Wo in taniitu kita icawekar asi kawasa ing kamesé-meséaan, wo menonou e méma' ing kasalé'an i Amang Kasuruan. Sé péla-péla'-Na ituo e iméma' icita masama'.

2 Yohanes 1:7

Kelio tou sé mengasélé'kow imapaturu'o wo isumeraro ang kayo'baan anio'. Séra itu ra'ica kiim mangaku sapaoka si Yesus Kristus imayo ang kayo'baan tanu in tou. Sérao sé mengauwak wo kaséké' i Kristus.