Ibrani 1:3 - En Taar Weru a nunuwu' é Tontemboan

³ Asi Toyaang-Na ituo ro'na kaséréanta e rarayo wo in sisiri' i Amang Kasuruan, Siao em paséréan im peri wo ing kawasa i Amang Kasuruan in esa, Siao ka'i e makatéir im pakasa sé ang kayo'baan ang karapi in Taar-Na si wuta ing kawasa. Wo Siao ka'i e meresi ing kamesé-meséaan é tou, kekawus in itu Sia mangé an sorga wo lumukut ang kakan i Amang Kasuruan si Makakawasa, asi tampa irumangka-rangka'.

Ibrani 1:3 ပူးပေါင်းရင်းမြစ်များ

Matius 22:24

“Guru, aicua i Musa in tana'i, sa si esa tuama icumawéngo wo sia maté ra'ica imakéré toyaang, si tuama metuari wo sia itu musti kumawéng wo si wéwéné mabalu itu, wosama' si tuama imatéo itu ro'na imakéré taranak.

Markus 16:19

Makanuwu' mako si Apo' Yesus a sé murit-Na, Sia icaangkai angé an sorga wo lumukut ang kakan i Amang Kasuruan.

Yohanes 1:14

Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na.

Yohanes 1:29

Asi woondona mai sérén i Yohanes si Yesus mai ai sia wo icuana a sé tou, “Sérén, si anioo si Toyaang i Domba i Amang Kasuruan si mai misi ing kamesé-meséaan é tou ang kayo'baan.

Yohanes 1:4

En Taar itu palemboian ing katouan wo eng katouan itu si sendot en sumendot in até é tou.

Kisah Para Rasul 2:33

Intarépé', si Yesus niangkaio mangé i Amang Kasuruan ang kakan-Na an tampa pasiri-siriin wo tumerimao i Roh Le'nas si aijanji-Nao indior. E Roh Le'nas itu, iwéé-Nao ka'i ai cami, si sinéré wo liningao miow am bia'i.

Kisah Para Rasul 7:56

Wo icua i Stefanus, “Uli-ulit, kinaséréanku en langit imawuka' wo si Toyaang i Tou makatulung ang kakan i Amang Kasuruan.”

Roma 1:16

Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

Roma 8:34

Ra'ica wana tou e ro'na méé séa', ampa'paan bélan oka i Kristus Yesus an dior i Amang Kasuruan. Sia imatéo torona icita wo tinou sumawel, wo makalukut ang kakan i Amang Kasuruan wo mekiupus torona icita.

2 Korintus 4:4

Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

Kolose 3:1

Poo-poow, si Kristus itumouo sumawel, anaé kamu sé maéman ai Sia tanuoka aitou sumawel ang katouan weru mewali-wali wo Sia. Ampa'paano in itu rumaméjio mangé kamu mangéré andumoro' sé an sorga. Asi tampa itu si Kristus makalukut ang kakan i Amang Kasuruan.

Titus 2:14

Aiwéé-Nao en owak-Na mamuali raragés en tumu'bus waya ing kaléwo-léwo'anta wo émaan-Na kita mamuali tou-Na le'nas wo re'dem mengaéma' in loor.

Ibrani 1:13

Wo si Amang Kasuruan ra'ica kawisa mako kumua a sé malaékat meputé si aicua-Na a si Toyaang-Na, “Lumukuto mai asi tampa pasiri-siriin ang kakan-Ku, akar sé kaséké'-Mu iweta'-Ku am palara ing kécéi-Mu.”

Ibrani 10:12

Taan si Kristus si Imam Wangko'ta méé in owak-Na pinaté makasake' torona ing kaampungan ing kamesé-meséaan akar ing kauré-uré. Kumawus in itu Sia lumukut ang kakan i Amang Kasuruan.

Ibrani 12:2

Am papekowaan anio', mayoo kiitenta ang karapi im beren si asalo makatéinteng angé a si Yesus, ampa'paan Siao si maakin im paémanenta a si Amang Kasuruan wo si makawali im paémanenta makaleke-lekep. Sia talesen pengaokoien akar maté ang kayu salip, ra'ica pandungen-Na em pengaroros ampa'paan kailekan-Na sapaoka makasangkum ako im pakasa in itu awéan kaaruian si aitu'tulo ai Sia. Intarépé' Sia makalukut ang kakan im palukutan pasiri-siriin i Amang Kasuruan.

Ibrani 4:14

Kita intarépé' makaanuo Imam si Mangko-wangko' si mangéo muntep an sorga wo an dioro i Amang Kasuruan en tumawang icita. Sia ituo si Yesus, Toyaang i Amang Kasuruan. Ampa'paan in ituo mayoo kita mauli-ulit tumimboi im paémanenta a si Yesus meputé im paémanen si pengaakunta.

Ibrani 7:27

Si Yesus ra'ica meputé wo sé imam wangko' walina, si susur in endo musti meméé-méé i raragés binatang pinokol torona ing kamesé-meséaan éra in esa wo ka'i torona ing kamesé-meséaan é tou éra. Sia iméé i raragés makasake' torona ing kauré-uré, an tutuw-Na irumagés in owak-Na in esa.

Ibrani 8:1

Si penting keli asé im pakasa sé pepaarenta anio', sapaoka kita makaanu Imam Wangko' si ra'io cakua si makalukut ang kakan im palukutan pasiri-siriin i Amang Kasuruan si Mangko-wangko' an sorga.

Ibrani 9:16

Sa awéan surat wasiat, musti ka'i awéan tuus sapaoka si tou e méma' in surat wasiat itu imatéo.

Ibrani 9:26

Ampa'paan sa si Kristus menguri-nguri maragés in owak, tantu tumo'tolke' mai eng kayo'baan niéma' Sia musti menguri-ngurio masangkum ing kawenduan. Taan asi endo-endo ka'kapuan ing kayo'baan anio' Sia mai wayake' i makasa e rumagés in owak-Na in esa en tumu'bus ing kamesé-meséaan é tou.

1 Petrus 1:21

Ampa'paan e niéma' i Kristus ituo, kamu maéman a si Amang Kasuruan, Siao en tumou sumawel si Kristus an unér é tou imaté wo ka'i méma' si Kristus iparayo-rayo wo pasiri-siriin. Wo in taniitu em paémanen iow wo em paarapen iow toronake' i Amang Kasuruan.

1 Petrus 3:22

Intarépé' si Yesus Kristus imangém an sorga wo lumukut ang kakan i Amang Kasuruan. Wo pakasa sé malaékat, pakasa sé makakawasa wo pakasa ing kaketeran, pakasa in itu an darem ing kakawasaan-Na.

2 Petrus 1:16

Aisusuio ami ai camu andumoro' ing kawasa i Apo'ta Yesus Kristus wo andumoro' ka'i Sia maai sumawel. Sapa sé aisusui ami itu ra'ica sisisilen sé asalo niéma' é tou, ampa'paan icamio in esa en suméré ing kawangko'-Na.

2 Petrus 1:17

Sinéré amio tumambisa si Yesus makéré i rarayo wo in sisiri' asi Amang Kasuruan owo. An tutuw itu kalingaan ami en suara i Amang Kasuruan si pasiri-siriin wo iparayo-rayo makua ai Sia tana'i, “Si anioo si Toyaang-Ku, si ipaupu-upus-Ku. Siao si mengaarui in até-Ku.”

1 Yohanes 1:7

Taan sa kita menonou an sendot meputé ka'i wo Sia an sendot, tantu kita menonou imeesa wo sé tou walina. Wo pakasa eng kamesé-meséaanta wu'asan oka in enda' i Yesus Toyaang-Na.

1 Yohanes 3:5

Kailekan iow sapaoka si Yesus imayo en tumu'bus ing kamesé-meséan, wo ai Sia ra'ica wana kamesé-meséaan.

Yudas 1:25

Wayake' Sia in esa, si lumowir icita ampa'paano i Yesus Kristus Apo'ta. Sia em patus tumerima i rarayo wo in sisiri', ampa'paan ing kawangko'-Na wo ing kawasa-Na en tumu'tul wo merénta im baya-waya tumo'tolai indior, intarépé' wo akar ing kauré-uré. Ulit.

Wahyu 3:21

Si tou muntung ilukut-Ku oka sia ang karapi-Ku asi palukutan pasiri-siriin-Ku, meputé wo Yaku si muntungo wo lumukut mewali-wali wo si Amang-Ku asi palukutan pasiri-siriin-Na.

Wahyu 4:11

“O, Kasuruan! O, Amang Kasuruan ami! Wayake' Ico em patus makéré in darayo, wo in sisiri' wo ing kawasa. Ampa'paan si Casuruan méma'o im baya-waya, wo ampa'paano ing kasalé'an-Mu pakasa en itu niéma'o wo awéan.”