Galatia 3:2 - En Taar Weru a nunuwu' é Tontemboan

² Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?

Galatia 3:2 ပူးပေါင်းရင်းမြစ်များ

Kisah Para Rasul 15:8

Si Amang Kasuruan e makatuus in até é tou, aituru'-Na sapaoka Sia tumerimao sé tou ra'ica Yahudi itu. En itu aituru'-Nao ai cita an tutuw-Na méé i Roh Le'nas ai séra, tanu si aiwéé-Na ai cita.

Kisah Para Rasul 2:38

Isowat i Petrus ai séra, “Mape'diso wo terimano em baptisan a ngaran i Yesus Kristus wosama' eng kamesé-meséaan iow ampungan oka. Wo in taniitu teriman oka miow en tatambér-Na, siituo si Roh Le'nas.

Kisah Para Rasul 8:15

Icateka' mangé am bitu, sé rua ruru'du'an itu sumombayang wosama' sé tou Samaria sé maémano itu ro'na tumerima i Roh Le'nas.

Roma 1:17

Ampa'paan asi Abar Kaaruien itu, si Amang Kasuruan tumuru'o tumambisa sé tou nianggap-Na wutul. En lalanna musti maéman a si Kristus, ra'ica wana walina. En itu tanu in aipatic ang Kitap Le'nas in tana'i, “Si tou nianggap wutul i Amang Kasuruan ampa'paano im paémanenna, sia menonou oka!”

1 Korintus 9:21

Taniitu ka'i, an tutuwku mewali-wali wo sé tou ra'ica Yahudi, sé ra'ica makiit in ukum Torat, émaanku eng katouanku meputé wo iséra. Émaanku taniitu wosama' ro'na akinenku sé tou ra'ica Yahudi a si Kristus. Anaé, aku ra'ica toro ipeputé tanu tou sé ra'ica makiit im perénta-perénta i Amang Kasuruan, taan aku uli-ulit maéma' im perénta i Kristus.

2 Korintus 11:4

Ampa'paan kamu pakasérén talesenke' tumerima si esa tou mai wo masusui ai camu andumoro' in sususuien si ra'ica meputé wo sé ipasusui ami andumoro' i Yesus. Wo kamu ka'i tumerima i roh si ra'ica meputé wo i Roh Le'nas kuma'pa Abar Kaaruien si wutu-wutul ra'ica meputé wo in abar kaaruien si sumangkumo tinerima miow ai cami.

Galatia 3:14

Si Yesus Kristus pinatéo ang kayu salip wosama' eng kamang i Amang Kasuruan si aijanjio a si Abraham, iwéé a sé pakasa en tou sé maéman icauntep sé tou ra'ica Yahudi. Anaé, sa kita maéman a si Yesus si maté ang kayu salip, kita ro'na tumerima i Roh Le'nas si aijanjio i Amang Kasuruan indior.

Galatia 3:3

Kéitu réén kamu imabodoko tanu siitu? Indior aito'tol iow eng katouan weru ang karapi im paakinen i Roh Le'nas, kéitu réén intarépé' kamu asalo mamangén ang kaketeran iow in esa?

Galatia 3:5

Si Amang Kasuruan mééo mai i Roh Le'nas-Na ai camu ang karapi i mawuta-wuta, wo iméma'o ing kakaya'kaan an uner iow. Niéma' réén i Amang Kasuruan en itu ampa'paan kamu mengaéma' in ukum Torat? Tantu ra'ica. Taan ampa'paan kamu iluminga in Abar Kaaruien wo maéman a si Kristus.

Ibrani 2:4

Wo eng kasairian é tou itu kineter i Amang Kasuruan, ampa'paan séra winéan-Na kawooan iméma' in tuu-tuus wo membam-balinaan kakaya'kaan wo kawasa-kawasa wangko' wo mengawéténg in tatambér si aiwéé i Roh Le'nas kumiit ing kasalé'an i Amang Kasuruan in esa.

Ibrani 4:2

Ampa'paan en Abar Kaaruien itu ipakua-kuao ai cita, meputé sé aicuao a sé apo-apo'ta indior. En abar sé lininga é apo-apo'ta itu ra'ica wana torona ai séra, ampa'paan ra'ica percayan éra.

Ibrani 6:4

Ampa'paan sé tou isumangkumo maéman a si Kristus wo sé menonouo an sendot i Amang Kasuruan, imepé'o mai ing kama-kamang-Na, wo sumangkumo kinawasa i Roh Le'nas,

1 Petrus 1:12

Aicuao i Amang Kasuruan a sé nabi sapaoka sé ipakua éra itu ra'ica torona in owak éra in esa, taan torona miow intarépé'. Sé pakua éra itu, siituo en Abar Kaaruien andumoro' i Yesus Kristus. Wo intarépé' awéan sé tou kinawasa i Roh Le'nas an sorga owo, séra ituo sé tou makua in Abar Kaaruien itu ai camu. Sé malaékat ka'i masalé' makailek andumoro' ing kalowiran sé aicuao ai camu.