Galatia 2:4 - En Taar Weru a nunuwu' é Tontemboan

⁴ Awéan sé tou tanuoka woo maémano a si Yesus Kristus taan séra towo. Icasalé' éra pakasa sé tuama sunaten. Séra muntep ang karapi i maene- enep an jamaat en tumi'tir sa awéan tou sé ra'io ka'i mengakiit in ukum Torat ampa'paan maéman a si Yesus Kristus. Icasalé' éra wosama' sé tou maéman kasake' pakawa'kesen in ukum Torat wo kinawasa in ukum itu.

Galatia 2:4 ပူးပေါင်းရင်းမြစ်များ

Lukas 5:38

Anaé, en anggor weru musti ipumpun asi papumpunan in anggor weru.

Kisah Para Rasul 15:1

Awéan piraan tou an Yudea owo, mai an Antiokhia. Am bitu séra sumusui sé tou ra'ica Yahudi sé maémano in tana'i, “Sa kamu ra'ica sunaten iciit ing kanaramen si aisusui i Musa, kamu ra'ica malowir.”

Kisah Para Rasul 15:24

Aipatic ami en surat anio', ampa'paan lininga ami awéan piraan tou sé ai cami owo imangéo ai camu. Séra lumicoko i ngaas iow wo méma' icamu ra'io makaaté in sama' in sususuien éra. Sé tou itu ra'ica airu'du' ami mangé ai camu.

Kisah Para Rasul 20:30

Lébé-lébé an uner iow in esa maai oka sé tou eng kumua in sususuien sé ra'ica wutul. Émaan éra in taniitu wosama' sé tou sé maémano a si Yesus ra'io ka'i maéman wo kumiit oka iséra.

Roma 8:15

Ampa'paan e Roh aiwéé i Amang Kasuruan ai camu itu, ra'ica méma' icamu mamuali ata akar kamu menonou ang kaindé'an. Taan e Roh aiwéé i Amang Kasuruan itu, méma' icamu mamuali toya-toyaang i Amang Kasuruan. Wo e Roh i Amang Kasuruan itu maakin icita akar patowanta si Amang Kasuruan, “Amang, o Amangku!”

2 Korintus 11:13

Ampa'paan sé tou tanu siitu, sérao sé ruru'du'an ra'ica wutul. Séra matawoi mauwak ang karapi i mengaéma' in owak tanuoka woo ruru'du'an i Kristus.

2 Korintus 11:17

Ipatirayo-tirayoku sapa sé niéma'ku, wo sapa si aicuaku itu ra'ica airu'du' i Casuruan taan si aicuaku itu tanu ing kanaramen si pengakua i tou bodok e matirayo in owak in esa.

2 Korintus 11:20

Ipakawayake' miow sé tou sé mengaata icamu, sé mengaindo pakasa in anu miow, sé mengaindo ing kauntungan ai camu, sé mendam irumangka' mai wo icamu, wo sé ra'ica mindé' mengasepé' in amo miow.

2 Korintus 11:26

Am bawayaanku makakeli-keli mengakawali ang kawangkuran, tanu mai icawangkur an doyongan sumonop, pengakasua' asé marampok, ipengawangkur é touku Yahudi wo ka'i sé tou ra'ica Yahudi, icawangkur ang kota, icawangkur an tana' kapayasan, icawangkur an uner in ta'sic, wo ka'i pengawangkur é tou sé makua sapaoka séra poo-poowta esa am paémanen a si Kristus mandé en ulitna séra ra'ica maéman.

2 Korintus 3:17

Si Casuruan ituo e Roh. Wo am bisa en awéan Roh i Casuruan, am bitu ka'i awéan kaloasan.

Galatia 1:7

En ulitna ra'ica wana lalan walina e makéré ing kalowiran. Taan kamu tinawéro é tou sé mengalicoko icamu ang karapi in sususuien andumoro' in abar sé mengasélé'kow. Em peangé-angén éra en sumali'si' in Abar Kaaruien andumoro' i Yesus Kristus si pakua ami.

Galatia 4:25

Si Hagar itu ayandé tanu ing kuntung Sinai an tana' Arab. Wo en Yerusalem intarépé' kaputé ing kuntung Sinai an tana' Arab, ampa'paan sé tou Yerusalem imamualio ata an ukum Torat.

Galatia 4:3

Taniitu ka'i mai wo icita: An tutuw kita ra'ipé' makatuus si Kristus, kita pakaatané' é roh sé makakawasa ing kayo'baan anio'.

Galatia 5:1

Si Kristus iméma'o icita ra'io ka'i ang kakawasaan in ukum Torat, wosama' kita ra'io pakawa'kesen in ukum Torat. Ampa'paano in itu timboieno sumama-sama' eng kaloasan itu, wo tioo maréng menonou tanuoka ata si pakawa'kesen in ukum Torat.

Galatia 5:10

Taan ampa'paan i Apo' Yesus percayanku kamu ra'ica kumiit im pakawerot é tou walina taan makiitke' im pakawerotku. Wo si seike' si tou en lumicoko i ngaas iow, tanggongenna oka en ukuman i Amang Kasuruan.

2 Timotius 3:6

Ampa'paan awéan piraan tou an uner éra muntep maene-enep am balé é tou walina e matawér sé wéwéné bodok sé taporak katawéran ampa'paan sé wéwéné itu wutu-wutul mendam ing keli kamesé-meséaan wo kinawasapé' ing kasalé-salé'an in owak.

Yakobus 1:25

Taan en tou sé mati'tir in ukum si lumeke-lekep, awéan kawasa e mekar sé tou sé iméma' ing kamesé-meséaan, si tou itu kasake' le'tek an ukum itu wo ka'i pengaémaanna, ra'ica asalo iluminga wo ilupana. Si tou tanu siitu kamangen oka ampa'paan sapa sé paémaanna.

1 Petrus 2:16

Kamu anio' tou sé ra'io pakakawasan ing kamesé-meséaan ampa'paan kamu aiwekaro i Amang Kasuruan ang kakawasaan ing kamesé-meséaan, taan tioo pepaké-pakén eng kaloasan itu en tumutuw ing kaléwo-léwo'an iow. Taan menonouo mio' kamu tanuoka ata-Na.

2 Petrus 2:19

Sé guru ra'ica wutul itu jumanji sapaoka sa kiiten é tou en sususuien éra itu, sé tou itu ra'ica kawasan in atoran-atoran wo ro'na méma' sapake' sé icasalé' éra. Taan sé guru ra'ica wutul itu, séra in esa meputé wo sé ata' ampa'paan séra kinawasa ing kasalé'an in owak si léwo'. Si séi eng kinala i tou icumawasa, sia imamualio ata asi tou icumawasa itu.

1 Yohanes 4:1

Poo-poow sé icaupusku, ra'ica toro percayan iow sé im pakasa in tou sé mangaku sa séra awéan Roh i Amang Kasuruan. Taan aweso taré ujin owo mio' séra wosama' ro'na kakailekan sa e Roh ai séra itu uli-ulit asi Amang Kasuruan owo. Ampa'paan kelian nabi ra'ica wutul imapaturu'o wo isumeraro ang kayo'baan anio'.

Yudas 1:4

Icuaku in taniitu, ampa'paan awéan tou sé sumolisipo mai an uner iow. Séra itu sé tou ra'ica makiit in lalan i Casuruan. Séra itumerimao in upus aitambér i Amang Kasuruan taan ra'ica pengakiiten éra eng kasalé'an-Na, wo isuméa' mengapaké in upus aitambér-Na itu wosama' ro'na isalu éra eng kasalé'- an in owak éra sé ra'ica loor. Wo ka'i ra'ica pangakun éra sapaoka wayake' si Yesus Kristus si Makakawasa wo Apo'ta. Sé tou tanu isérao sé indioré'wo aitantuo makéré oka in ukuman.