Filipi 4:5 - En Taar Weru a nunuwu' é Tontemboan

⁵ Iwayao mio' eng kasamaan in atému kakailekan é pakasa in tou. Si Apo' Yesus ra'io uré maai sumawel.

Filipi 4:5 ပူးပေါင်းရင်းမြစ်များ

Matius 6:25

“Ampa'paan in itu, icua-Ku mangé ai camu, tioo maindé-indé' andumoro' ing katouan iow, andumoro' ing kakanen iow kuma'pa in elepen, wo tioo maindé-indé' andumoro' in owak iow, andumoro' in sapa em pakén iow. Ra'ica réén eng katouan si lébé pentingai wo ing kakanen wo en owak itu si lébé pentingai wo ing karai?

Matius 6:34

Anaé, tioo kamu maindé-indé' andumoro' si endo woondo, ampa'paan si endo woondo awéan eng kaindé-indé'ana in esa. Eng kasusaan sangando aweske' in sangando.”

Lukas 21:34

Wo icua i Yesus, “Téirano mangé sumama-sama' en owak iow, tioo en até miow wuta ing kasalé-salé'an sé ra'io masoma wo mengele-ngelep akar i malangu wo tioo kamu maindé-indé' andumoro' ing kaperluan iow susur in endo. Sa kamu mengéma-ngéma'ke' tanu siitu, an tutuw si Toyaang i Tou maai sumawel, kamu ra'ipé' tu'tul. Ampa'paan si endo itu tumarépé'anke'mai, tanuoka in ta'kong ipatangka' sé binatang.

1 Korintus 16:22

Si tou ra'ica mengaupus si Apo' Yesus, sia itu tenan ing kutuk. Maranata!

1 Korintus 6:7

Awéanke' kaperéndéran an uner iow tou maéman, en itu tumuru' icamu meséa'o. Sa awéan tou e méma' ra'ica adil ai camu, aweso taré iwayao mio' sia méma' in taniitu kuma'pa icamu e marugi.

1 Korintus 8:13

Anaé, sa eng kakanen si ayumpero a sé opo-opo' itu iméma'ke taré si poowku esa paémanen méma' ing kamesé-meséaan, ra'io kiimku ka'i kuman in sama'na, sa ampa'paan yaku akar si poowku esa paémanen lumepok ang kamesé-meséaan. En itu meputéo aku mamualike' watu pasangkilan ai sia.

1 Korintus 9:25

Susur in tou sé kumiit mekowa' musti tumang in owak am baya-waya. Sia méma' tanu siitu ampa'paan sia masalé' makéré mahkota si rior maweles. Taan kita anio' talesen matang in owak am baya-waya ampa'paan kita masalé' makéré mahkota si ra'ica maweles akar ing kauré-uré.

2 Korintus 10:1

Awéan ai camu makua sapaoka aku toloindé' en tumegor sa ang karapi miow, taan branike' tumegor sa mentayangan wo icamu. Ampa'paan in ituo ita'néiku ai camu ang karapi i ngaran i Kristus si ko'kos en até wo sama' en até,

2 Tesalonika 2:2

wosama' kamu ra'ica toro taporak mabingo wo ra'io makaaté in sama' sa kamu luminga in abar sapaoka an orasnao si Apo' Yesus maai sumawel. Wo awéan wona' e maanggap sa si Casuruan cumuao ai cami sapaoka Sia imayo sumawel. Kuma'pa awéan wona' ka'i maanggap sapaoka kami in esao eng kumua kuma'pa e matic in abar itu. En ulitna ra'ica.

Titus 3:2

Musti ita'néimu mangé ai séra, ra'ica toro mengawuruk i ngaran é tou walina wo ra'ica toro meindo-indoan roma'. Aweso taré em peri éra musti loor wo ka'i ko'kos en até a sé im pakasa in tou.

Ibrani 10:25

Tioo kita tumayang am pengali'usan i mengaapo', tanu ing kanaramen im paémaan é piraan tou. Taan mayoo taré kita mare'de-re'dem mengali'us mewali-wali i maapo' wosama' membém-béan angé ing kaketeran am paémanen, ampa'paan kailekanta en endo si Apo' Yesus maai sumawel makatawio.

Ibrani 10:37

Ampa'paan awéan aipatic ang Kitap Le'nas in tana'i, “Ra'io uré Sia si maai itu maayo, wo ra'io mauré-uré.

1 Petrus 1:11

Wo pati'tiren éra ka'i, kawisa wo tumambisa en itu mamuali, siituo em paangé-angén i Roh i Kristus si an untep in owak éra. An tutuw itu e Roh i Amang Kasuruan méé kasairian andumoro' ing kawenduan-kawenduan sé sangkumen oka i Kristus wo andumoro' i rarayo wo in sisiri' si kumiitai kekawus ing kawenduan itu.

1 Petrus 4:7

En endo kaka'puan ing kayo'baan makatawio. Ampa'paano in itu, musti kawasan iow en owak asé kaléwo-léwo'an wo elur em bewerot wosama' kamu ro'na sumombayang.

Wahyu 22:20

Sia en icumua a yaku andumoro' im pakasa in anio', icua-Na, “Én, Yaku makala'us oka maai!” Ulit, mayoo, é Apo' Yesus!

Wahyu 22:7

Icua i Yesus, “En ulitna, ra'io uré ka'i Aku maai. Pakakama- ngen sé tou sé makiit i nunuwu-nunuwu' asi Amang Kasuruan owo sé an untep ing kitap anio'.”