Filipi 3:19 - En Taar Weru a nunuwu' é Tontemboan

¹⁹ Sé tou menonou tanu siitu ukumen oka i Amang Kasuruan akar ing kauré-uré. Séra menonou asaloke' makiit ing kasalé'an in owak éra in esa. Séra tirayo mengaéma' in sapa sé kalawiin. Séra mawerotke' andumoro' sé ang kayo'baan anio'.

Filipi 3:19 ပူးပေါင်းရင်းမြစ်များ

Matius 16:23

Wo si Yesus suméléng wo kumua a si Petrus, “Tumayango ko é sétang! Icoo si esaan watu masangkil Yaku, ampa'paan ico ra'ica mawerot in sapa em paweroten i Amang Kasuruan, taan sapa em paweroten é tou.”

Matius 25:41

Wo icua-Na oka ka'i a sé tou ang ka'biri-Na, ‘Kamu itu sé tou kinutuko. Tumayango mangé kamu an dior-Ku wo mangé muntep an api ra'ica mape'de-pe'del akar ing kauré-uré an tampa si aitu'tulo torona i kikiiten é sétang wo sé makiit sia.

Lukas 12:19

Wo icuaku an owakku in esa: Kelio eng kasiyaanku wo ra'ica maka'pu akar im pira ngata'un eng kauréna. Anaé, intarépé' aku ro'nao mena' an tawoienku wo asalo oka mengangan wo mengele-ngelep wo maaru-arui.’

Lukas 16:19

“Awéan esa tou siya' si memaké-maké in juba pares niéma' ang kaéng alus owo, susur in endo sia masalé-salé' ang kasiyaanna.

Lukas 18:4

Uré-uréanke' si akim itu ra'ica kiim tumawang si wéwéné balu itu. Taan ang kasomoianna si akim itu memero-merot in tana'i, ‘Mandé aku ra'ica maindé' a si Amang Kasuruan wo ra'ica mengasiri' sé tou,

Roma 16:18

Ampa'paan sé tou tanu siitu ra'ica matawoi sumelewir si Kristus Apo'ta, taan séra matawoi asalo makiit ing kasalé'an éra in esa. Séra maroma' mapaké i roroma' matawér wo nunuwu' sé manam palingan, akar séra imuwako sé tou sama' en até.

Roma 6:21

An tutuw itu sapa em buéna kinéréan iow? Tantu ra'ica wana! Kamu intarépé' malawi' mawerot in itu. Ampa'paan pakasa en itu asalo makawali am papaté.

1 Korintus 3:3

ampa'paan akar intarépé' kamu makiité' im pakawerot ing kayo'baan. Icuaku in taniitu, ampa'paan an uner iow awéané' sé kokanat wo meindo-indoan roma'. En itu mamuali tuus sapaoka kamu makiité' im pakawerot ing kayo'baan wo menonou asalo makiit ing kasalé'an in tou.

1 Korintus 5:2

Mandé ka'i an uner iow awéan tou maéma' ing kameséaan tanu siitu taan kamu tirayopé'. Si patus ai icamu, kamu musti masusa en até wo si tou maéma' ing kaléwo'an itu musti icesot iow an jamaat.

1 Korintus 5:6

Mandé ka'i awéan tou maéma' ing kamesé-meséaan an jamaat iow taan kamu marayopé' in owak. En itu ra'ica patus. Tantu kailekano miow si andéan anio': E ragi sangatekic ro'na méma' pakasa in adonan roti ruméis. Eng kaangéanna tana'i: mandé ka'i esake' tou an uner iow méma' ing kaléwo'an, sia itu ro'na tumawér pakasa in tou maéman walina akar kumiit méma' ing kaléwo'an.

2 Korintus 11:12

Sapa em pinengaéma'ku intarépé' si ra'ica tumerima in tatawang ai camu pengéma-ngémaanku oka. Wo in taniitu sé ruru'du'an wangko' itu ra'io toro ka'i rumayo in owak wo kumua em pengaémaan éra meputé wo sé niéma' ami.

2 Korintus 11:15

Anaé, tioo ka'i kamu mangaya'ka' sa sé mengaselewir asi kikiiten é sétang mengaéma' in owak tanuoka woo sé mengaselewir im butul. Eng kasiwakana séra tumerima in susuli' sé patus teriman éra kiit si pinengaéma' éra.

Galatia 6:13

Séra sé makiit in atoran sunat, ra'ica ka'i paémaan éra waya sé an ukum Torat. Taan icasalé' éra kamu sunaten wosama' séra ro'na tumirayo in owak ampa'paan kamu makiit in atoran sunat.

Filipi 2:21

Sé tou walina asalo mangéré ing katoronaan éra in esa, em paérén éra ra'ica ing katoronaan i Yesus Kristus.

Kolose 3:2

Anaé, weroteno mangé in andumoro' sé an sorga wo tioo memero-merotke' in andumoro' sé ang kayo'baan.

2 Tesalonika 1:9

Séra makéré oka ukuman asi Casuruan owo akar ing kauré-uré. Séra yusér i Casuruan tayang an dior-Na wo ra'io ka'i suméré ing kawangko' ing kawasa-Na.

2 Tesalonika 2:12

Niéma' i Amang Kasuruan in taniitu wosama' pakasa sé tou sé ra'ica kiim maéman in abar wutul andumoro' i Apo' Yesus wo masalé'ke' maéma' in léwo', séra itu ukumen.

2 Tesalonika 2:8

An tutuw ituo si tou luméwo-léwo' itu mai mapaturu' in owakna. Taan si tou luméwo-léwo' itu patén oka i Apo' Yesus ang karapi in aseng-Na. Wo an tutuw i Apo' Yesus maai sumawel, teri-terin-Na oka ang karapi in télang an owak-Na.

1 Timotius 6:5

meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

2 Timotius 3:4

masalé' mengakianat sé tou, kolek em ipakawerot, mapa im pandéi, masalé'ke' maaru-arui kiit ing kasalé'an éra in esa ra'ica kiim kumiit ing kasalé'an i Amang Kasuruan.

Yakobus 4:16

Taan em pakanuwu' miow taloso taré tirayo e mengaangkai in owak iow in esa. Em pakanuwu' tanu siitu suméa'.

2 Petrus 2:1

Indior, an uner é tou i Amang Kasuruan, imapaturu'o sé nabi ra'ica wutul. Tanu siituo ka'i an uner iow, mapaturu' oka mai ka'i sé guru ra'ica wutul. Em paangé-angén éra en sumusui in sususuien mengasélé'kow si mengawali sé tou am papaté. Sé guru ra'ica wutul itu mengakélong si Apo' Yesus si Makakawasa si tumu'buso ing kamesé-meséaan éra. Ampa'paano in itu, séra makala'us oka patén.

2 Petrus 2:13

Wo sé guru ra'ica wutul itu makéré oka ing kawenduan tanu pepe'dis asi kaléwo-léwo'an sé niéma' éra. Mandé ka'i endo, icasalé' éra mengaéma' sé andumoro' ing kasalé'an in owak éra in esa sé ra'ica wutul. Séra itu tanuoka noo wo seringa sa séra lumukut kuman mewali-wali wo icamu, ampa'paan em peri éra karican oka mai.

2 Petrus 2:3

Ampa'paan sé guru ra'ica wutul itu longi' in doit, séra masisil in sisisilen sé niéma' éra in esa torona muwak icamu. Ampa'paano sé niéma' éra itu, en ukuman éra uréo keli aitu'tulo i Amang Kasuruan wo em papaté éra ra'io ipauré-uré.

Yudas 1:10

Taan sé guru ra'ica wutul mengaojat waya sé ra'ica kailekan éra. Séra mengaéma' andumoro' sé asalo kumiit ing kasalé'an éra in esa, en itu meputé wo sé binatang ra'ica ningaasan. Sé pinengaéma' éra ituo e makawali iséra am papaté.

Yudas 1:16

Séra itu mengimbuluke' wo mengawéé séa' a sé tou walina, taan séra in esa menonou makiit ing kasalé'an in owak éra mengaéma' ing kamesé-meséaan. Séra manuwu' mengaangkai in owak in esa wo manuwu' maarui sé tou walina e mekéré in untung.

Yudas 1:4

Icuaku in taniitu, ampa'paan awéan tou sé sumolisipo mai an uner iow. Séra itu sé tou ra'ica makiit in lalan i Casuruan. Séra itumerimao in upus aitambér i Amang Kasuruan taan ra'ica pengakiiten éra eng kasalé'an-Na, wo isuméa' mengapaké in upus aitambér-Na itu wosama' ro'na isalu éra eng kasalé'- an in owak éra sé ra'ica loor. Wo ka'i ra'ica pangakun éra sapaoka wayake' si Yesus Kristus si Makakawasa wo Apo'ta. Sé tou tanu isérao sé indioré'wo aitantuo makéré oka in ukuman.

Wahyu 18:7

Wéano mio' kaokoian wo kala'luan ai sia tanu ing kakeli i rarayo wo ing kasiyaan si pinendamnao. Ampa'paan sia icumua an untep in aténa: ‘Yaku makakawasa tanu ratu wo ra'ica balu, wo yaku ra'ica kawisa mala'lu.’

Wahyu 19:20

Wo si binatang itu mewali-wali wo si nabi ra'ica wutul tinangka'o. Si nabi ra'ica wutul ituo si sumangkumo méma' in tuu-tuus kakaya'kaan an dior i binatang itu, akar sia sumélé'kow sé tou sé itumerimao in tuus i binatang itu wo si kumuru en sumiri' im patongna. Wo si binatang itu mewali-wali wo si nabi ra'ica wutul itu imenonoué' aiténdélo an ta'sic api walélang wangker si mengembu-ngembung.

Wahyu 21:8

Taan sé tou toloindé' mengasairi andumoro' i Yesus, sé tou ra'ica maéman, sé tou mengaéma' ing kaléwo-léwo'an sé karican oka mai, sé tou mengapaté tou, sé tou mengasundal, sé tou mengasihir, sé tou mengaapo' a sé opo-opo' wo pakasa sé tou kotowo, séra im baya yuntep oka an untep in ta'sic api walélang si mengembu-ngembung. Si anioo em papaté karua.”

Wahyu 22:15

Sé tou makaperi tanu sé asu wo sé mengasihir, sé mengasundal, sé mengapaté tou, sé mengaapo' a sé opo-opo', wo sé masalé' mengatowo wo mengaéma' in towo, séra musti mento' ang kesot ing kota itu.