Filipi 2:16 - En Taar Weru a nunuwu' é Tontemboan

¹⁶ Ang karoro'an in itu turu'o miow ka'i ai séra en Taar si mawéé ing katouan. Wo in taniitu an tutuw i Kristus maai sa, yaku ro'na tumirayo ampa'paan pakasa sé pinaraméjianku a si tawoienku ra'ica mara'i-ra'i wo sé pinala'lé-la'léanku mai awéan en torona.

Filipi 2:16 ပူးပေါင်းရင်းမြစ်များ

Matius 10:27

Sapa sé aicua-Ku ai camu ang kerapi im paene-enep, musti mangé cua miow in da'ica ipaene-enep. Wo sapa sé aicewit-Ku an lunteng iow, musti mangé icua miow en itu am bawo im balé.

Lukas 12:8

“Si séi e mangaku an dior é tou sapaoka sia makiit Yaku, sia ka'i pangakun oka i Toyaang i Tou an dior é malaékat i Amang Kasuruan.

Yohanes 6:63

Sé tou ra'ica makawoo méma' in owakna menonou akar ing kauré-uré. Wayake' i Roh i Amang Kasuruan e méma' si tou ro'na menonou akar ing kauré-uré. E nunuwu' sé aicua-Ku itu, nunuwu' i Roh-Na wo sé nunuwu' itu iméma' sé tou menonou oka akar ing kauré-uré.

Yohanes 6:68

Isowat i Simon Petrus ai Sia, “Tuang, asi séi oka en angéan ami? Wayake' si Apo' Yesus e mengakua in Taar andumoro' tumambisa kami menonou akar ing kauré-uré.

Kisah Para Rasul 13:26

Poo-poowku sé icauntep an taranak i Abraham wo ka'i sé tou ra'ica Yahudi sé maapo' a si Amang Kasuruan! En abar ing kalowiran itu aicuao ai cita im baya.

1 Korintus 1:8

Sia oka ka'i e méma' mai im paémanen iow kasake' keter akar ing kaka'puan ing kayo'baan, akar kamu kéréan-Na ra'ica wana kaséaan asi endo si Apo'ta Yesus Kristus maai sumawel.

1 Korintus 9:26

Ampa'paan in ituo aku tuméron angé a si esa angé- an si wutul. Yaku tanuoka si petinju si ra'ica asalo karuki-ruki.

2 Korintus 1:14

Intarépé', mandé kamu ra'ipé' talos makailek andumoro' icami, taan an tutuw i Apo' Yesus maai sumawel, kamu tirayo oka ampa'paan kami taniitu ka'i kami tirayo oka ampa'paan icamu.

Galatia 2:2

Yaku mangé an Yerusalem ampa'paan si Amang Kasuruan icumuao a yaku e musti maangé. Wo an tutuwku a mangé mbitu, yaku meta'up wuntulke' a sé tou sé nianggap pasiriin an jamaat. Wo ipepaarku a sé kikiiten an jamaat itu en Abar Kaaruien andumoro' i Yesus Kristus sé ipakua-kuakuo a sé tou ra'ica Yahudi, wosama' kakailekan é kikiiten sapaoka en tawoienku wutu-wutul mééo im buéna. Wo in taniitu em paraméjianku mengakua in Abar Kaaruien itu a sé tou ra'ica Yahudi indior wo intarépé' ra'ica mara'i-ra'i.

Galatia 4:11

En icaindé'ku oréoka pakasa sé pinakepé-kepéanku mai mengakua in andumoro' i Yesus ai camu mara'i-ra'ike'.

Filipi 1:10

akar ro'na sisiren iow si loor. Wo in taniitu, akar asi endo i Kristus maai sumawel eng katouan iow weresi wo ra'ica wana kaséaan.

Filipi 1:6

Si Amang Kasuruan in esao en tumo'tol in tawoien loor itu an uner iow, anaé wutu-wutul percayanku ilala'us-Na oka en tawoien anio' akar asi endo i Kristus Yesus maai sumawel.

1 Tesalonika 2:19

Kami maangé ai camu, ampa'paan icamuke' e mamuali arapan wo kaaru-aruian ami. Anaé, sa si Yesus Apo'ta itu imayo sumawel tantu kita sumaru Sia wo icamuo itu e mamuali kaaru-aruian ami an dior-Na.

1 Tesalonika 3:5

Ampa'paan in ituo ayutus ami si Timotius ai camu ampa'paan kami ra'io makatang sa ra'io luminga in abar andumoro' icamu. Icasalé'ku makéré abar, sapaoka kamu maémané' a si Yesus kuma'pa ra'io. En icaindé'ku oréoka kamu katawérano i kikiiten é sétang wo ra'io maéman a si Yesus. Sa wutu-wutul mamuali taniitu, ra'- ica wana en torona sé tinawoi ami indior.

Ibrani 4:12

En Taar i Amang Kasuruan itu menonou wo makakawasa. Wo en Taar itu ilumébé mai ing katelew in sa'bel rua telewa, ro'na tumopok rarem keli akar tumané i mu'kur wo e roh, wunak wo wuku-wuku in du'i, wo ro'na kailekan-Na waya sé an untep im bewerot wo im paaté-atén é tou.

1 Petrus 1:23

Ampa'paan eng katouan weru si kinéréan iow ra'ica kinéréan iow asé tou si ro'na maté, taan kinéréan iow ampa'paan kamu maéman in Taar i Amang Kasuruan. En Taar ituo si Taar menonou wo awéan melala'us akar ing kauré-uré.

1 Yohanes 1:1

En surat anio' andumoro' in Taar si mengawéé ing katouan. En Taar anio' awéano asi kataré-taré si liningao wo sinéréo ami in esa. Wo tinimboiano ami ka'i ing kama ami in esa.

Wahyu 22:17

Wo e Roh i Amang Kasuruan wo si pengantén wéwéné itu kumua, “Mayoo!” Wo si séike' sé luminga in anio', sia ka'i musti kumua, “Mayoo!” Si séi e maré'om, mayoo! Wo si séi e masalé', mayoo mindo in dano katouan si asaloke' aitambér.