Filipi 1:5 - En Taar Weru a nunuwu' é Tontemboan

⁵ Pengakuaku i makapulu'sama' a si Amang Kasuruan, ampa'paan tumo'tolke' mai asi endo kataré kamu luminga in Abar Kaaruien in andumoro' i Yesus Kristus akar intarépé', kamu tumawango in tawoienku mengakua in Abar Kaaruien.

Filipi 1:5 ပူးပေါင်းရင်းမြစ်များ

Kisah Para Rasul 2:42

Séra mengali'us mewali-wali wo le'tek mengalinga sé ruru'du'an mengasusui in andumoro' i Yesus. Wo séra tatap mengaéma' im perjamuan wo mengasombayang.

Roma 11:17

Anaé, em piraan pangana asi tuura in zaitun sé pinokolo, am bitu tampéngan im pangana asi tuura in zaitun walina, si ayandé icamu sé tou ra'ica Israel. Wo em panga-pangana walina itu aitampéng wosama' kumiit makéré kakanen asi a'mut in tuura in zaitun aseli si kumeli-keli seringa.

Roma 12:13

Tawangeno mangé sé tou le'nas sa awéan em paperlun éra, wo tatapke' materima sé tou sé masalé' lumosér am balé miow.

Roma 15:26

Ampa'paan sé jamaat a Makedonia wo an Akhaya lumi'uso roit em béé a sé tou lengéi an uner é tou le'nas an Yerusalem.

1 Korintus 1:9

Si Amang Kasuruan le'tek. Tinowa-Nao kamu e meesa ang karapi i Toyaang-Na, si Yesus Kristus Apo'ta.

2 Korintus 8:1

Poo-poow, icasalé' ami kailekan iow andumoro' tambisa en upus aitambér i Amang Kasuruan a sé jamaat a Makedonia.

Efesus 3:6

Wo si anioo em pawasa-wasan-Na sé icaenep itu: Sé tou ra'ica Yahudi kumiit makéré im bagéan asi Amang Kasuruan owo ampa'paan séra maéman in Abar Kaaruien andumoro' i Yesus Kristus. Wo séra imamualio esa owak, wo mekiit makéré ing kama-kamang sé aijanjio i Amang Kasuruan ampa'paan i Kristus Yesus.

Filipi 1:12

Poo-poow, icasalé'ku kailekan iow sapaoka aku ayuntep am bui anio', méma'ke' taré makaawes sé tou iluminga in Abar Kaaruien wo maéman a si Kristus.

Filipi 1:16

Sé tou mawasa in loor itu mengakua andumoro' i Kristus ampa'paan in upus a sé tou walina. Kailekan éra aku binui ampa'paan mengakua in Abar Kaaruien andumoro' i Yesus Kristus a sé tou sé mengasundur in Abar Kaaruien itu wo méé tuus sapaoka en Abar Kaaruien itu wutul.

Filipi 1:27

Anaé, em penting keli kamu musti menonou kumiit in sapa sé aisusui an Abar Kaaruien andumoro' i Kristus. Wo in taniitu, aku maai meta'up wo icamu kuma'pa ra'ica, kailekanku oka sapaoka kamu enté' makatulung an esa wasa wo rumaméji mewali-wali an esa até torona im paémanen ampa'paan makiit in Abar Kaaruien.

Filipi 1:7

Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

Filipi 2:12

Poo-poow sé icaupusku! Kailekanku an tutuwku ang karapi miow, kamu tatap le'tek a yaku. Taniitu ka'i intarépé' an tutuwku mentayangan wo icamu, pangilekenku tatap tawoien angé ang karapi mauli-ulit eng kalowiran iow wo ang karapi wuta ing kaindé'an a si Amang Kasuruan, wo menonou angé kiit in sapa si patus émaan é tou sé linowir-Nao.

Filipi 2:22

Taan kailekano miow eng kale'tekan i Timotius kinaujiano. Sia sumémbongo mai a yaku an tutuw imengua-ngua in Abar Kaaruien, tanu si esa toyaang masémbong a si amangna.

Filipi 4:3

Wo ico é Sunsugos karapiku si le'tek, pangilekenku wosama' tawangenmu sé rua wéwéné itu, ampa'paan séra imakepé-kepéo mai mewali-wali wo yaku makua in Abar Kaaruien andumoro' i Yesus Kristus. Séra matawoi mewali-wali wo si Klemens wo sé karapiku walina an esa tawoien. Pakasa e ngaran é tou sé masémbong a yaku anio' aipatic ang Kitap Katowan ampa'paan séra menonou oka akar ing kauré-uré.

Filemon 1:17

Ampa'paano in itu, sa anggapenmu aku karapimu an esa paémanen, terimano mangé sia tanuoka ko tumerima yaku.

Ibrani 3:14

Ampa'paan kita imeesao wo si Kristus, anaé timboienta sumama-sama' em paémanenta akar ing kaka'puan ing katouan, kaputé kita ing kataré-tarépé' maéman ai Sia.

2 Petrus 1:1

En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

1 Yohanes 1:3

Intarépé' icua ami ai camu sapa sé sinéréo wo liningao ami ai Sia. Wo in taniitu kamu ro'na menonou meesa wo icami. Wo kita im baya ka'i menonou meesa wo si Amang wo si Toyaang-Na Yesus Kristus.

1 Yohanes 1:7

Taan sa kita menonou an sendot meputé ka'i wo Sia an sendot, tantu kita menonou imeesa wo sé tou walina. Wo pakasa eng kamesé-meséaanta wu'asan oka in enda' i Yesus Toyaang-Na.