Filipi 1:13 - En Taar Weru a nunuwu' é Tontemboan

¹³ Ampa'paan intarépé' pakasa é suraro sé matéir an istana i Kaisar wo sé tou walina makaileko sapaoka aku binui ampa'paan i Kristus.

Filipi 1:13 ပူးပေါင်းရင်းမြစ်များ

Kisah Para Rasul 26:29

Wo isowat i Paulus, “Yaku masalé' sumombayang a si Amang Kasuruan wosama' si colano maéman a si Yesus, wo ka'i pakasa in tou am bia'i wo sé imakalinga in aicuaku, rior kuma'pa uré, mamuali puté wo yaku. Taan ra'ica mamuali tou pakawa'kesen tanu yaku intarépé'.”

Kisah Para Rasul 26:31

Ang karoro'an i makesot am bitu, séra mengkung-kuanan, “Si tou itu ra'ica iméma' ing kameséaan sapa-sapa e méma' sia patus makéré in ukuman patén kuma'pa yuntep am bui.”

Kisah Para Rasul 28:17

Teluo ngando kami am bitu wo enoten i Paulus sé tou Yahudi sé pasiri-siriin e meta'up wo sia. Wo an tutuw éra imali'uso, icuana ai séra, “Poo-poow! Yaku am bia'i ampa'paan tinangka' é tou Yahudi an Yerusalem wo isarakan éra aku a sé pemerénta Romawi. Taan aku ra'ica iméma' kaséaan sapa-sapa en sumundur sé taranakta wo ka'i ra'ica kumélong ing kanaramen é apo-apo'ta.

Kisah Para Rasul 28:20

Ampa'paan in ituo pinangilekku kamu meta'up wo mepaar ang karapiku wosama' kailekan iow sa pakasa en aitudu éra a yaku ra'ica wutul. Ampa'paan aku maarap wo maéman a si Mesias si aijanji i Amang Kasuruan ai cita tou Israel, ampa'paan in ituo aku pakawa'kesen tanu sia'i.”

Kisah Para Rasul 28:30

Si Paulus mento' asi walé si sinéwana itu rua ngata'un eng kauré. Pakasa en tou sé mengaai ai sia pengaterimanna.

Efesus 3:1

Yaku Paulus binui ampa'paan makua in Abar Kaaruien andumoro' i Yesus Kristus ai camu tou ra'ica Yahudi.

Efesus 4:1

Yaku Paulus si binui ampa'paan maselewir si Casuruan, sina'- uenku kamu sé tinowao i Amang Kasuruan wosama' kamu menonou kumiit in totowa itu.

Efesus 6:20

Yaku ayutus mengakua in Abar Kaaruien itu, wo ampa'paano in Abar Kaaruien ituo, akar in intarépé' aku pakabuin. Isombayang angé, wosama' ra'io wana eng kaindé'anku makua in Abar Kaaruien itu, tambisa si musti cuaku a sé tou.

Filipi 1:30

Wo eng kawenduan sé ang karoro'an im pamendamen iow meputé wo ing kawenduan si pinendamkuo mai, tanu sé sinéréo miow a yaku indior. Wo liningao miow in esa ka'i sapaoka aku mawendupé' akar intarépé'.

Filipi 1:7

Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

Filipi 4:22

Pakasa in tou le'nas am bia'i, lébé-lébé ka'i séra sé an istana i Kaisar méé mai in siri' ai camu.

2 Timotius 2:9

Ampa'paano aku makua in Abar Kaaruien itu, yaku pengaokoien é tou, pengawa'kesen éra i ranté tanuoka tou léwo', taan en taar i Amang Kasuruan ra'ica toro kawa'kesan.