Efesus 5:3 - En Taar Weru a nunuwu' é Tontemboan

³ Tioo kamu kawera-werake' in cabul, mengéma-ngéma' sé karican oka mai, kuma'pa masalé-salé'ke' in anu é tou walina. Ipepaarke' ka'i en itu ra'ica toro, ampa'paan ra'ica patus émaan é tou le'nas.

Efesus 5:3 ပူးပေါင်းရင်းမြစ်များ

Matius 15:19

Ampa'paan an até owo lumembo mai waya em bewerot léwo', mengapaté tou, mengasina, mengacabul, mengarombit, mengasairi in towo wo mengaojat.

Lukas 12:15

Wo icua-Na a sé pakasa in tou sé imali'us am bitu, “Maté-téiro mangé wo mareti-retio kamu oréoka kamu mamuali tou longi'. Ampa'paan eng katouan é tou, ra'ica asalo mamangén ang kasiyaan, mandé ka'i eng kasiyaanna itu ilumébé-lébéo.”

Lukas 16:14

Pakasa sé aicua i Yesus itu, pakalingan é tou Farisi sé masalé-salé'ke' in doit itu. Wo icé'ké' éra Sia.

Kisah Para Rasul 15:20

Taan, lébé loor sa ipaticta surat wo iwéé ai séra, wosama' séra ra'ica toro kuman ing kakanen najis sé ayumpero a sé opo-opo', ra'ica toro kuman in sama'na é binatang sé pinaté ampa'paan kiniselan eng kolot, kuma'pa kuman in enda', wo ka'i ra'ica toro mengabersina.

Kisah Para Rasul 20:33

Yaku ra'ica kawisa masalé' i mas, pérak kuma'pa karai asi séike' mangé.

Roma 1:29

En até éra wuta ing kabengisan wo wuta ing kaléwo'an. Séra wuta ing kalongi'an wo ing kawurukan, wuta im panganaten, masalé' mengapaté tou, masalé' meindo-indoan roma', tampenguwak wo ra'ica makiit ing kasalé'an i Amang Kasuruan.

Roma 16:2

An tutuw sia maangé ai camu sungkuleno mangé sia ang karapi in arui en até ampa'paan sia tou maéman a si Casuruan, tanu siituo em patus émaan é tou le'nas. Wo pangilekenku ai camu, patawangen angé sia sapake' em paperlunna. Ampa'paan kelio sé aiwééna en tumawang sé tou keli wo ka'i a yaku.

Roma 6:13

Wo tioo isarakan iow sé an owak iow mamuali pakakas eng kawasan ing kamesé-meséaan e méma' ing kaléwo-léwo'an. Taan isarakano mio' en owak iow a si Amang Kasuruan ampa'paan kamu ra'io pakakawasaan im papaté wo menonou ang katouan weru. Wo isarakano mio' pakasa sé an owak iow a si Amang Kasuruan em pakén torona méma' in sususuien wutul-Na.

1 Korintus 10:8

Wo kita ka'i tioo mengaéma' in cabul kaputé im paémaan é piraan ai séra itu. Eng kasiwakan im pinengaéma' éra itu, an sangando rua ngapulu' telu ngariwu tou mengapaté.

1 Korintus 5:1

Poo-poow, awéan sé tou mai cumua a yaku sapaoka awéan tou an jamaat iow manaramo mengaéma' in cabul. Si tuama itu mengacabul ang karapi i penanaan i amangna karua. Sédangkan taré si tou ra'ica maéman a si Amang Kasuruan ra'- ica mengaéma' tanu siitu.

1 Korintus 6:13

Awéan ka'i makua, “Eng kakanen torona im poot wo em poot torona ing kakanen,” rua-rua itu terin oka i Amang Kasuruan. Si aicua miow itu wutul. Taan mandé ka'i en owak é tou terin oka, ra'ica toro pakén iow en owak e méma' in cabul. Taan pakéno en owakta asaloke' in sumelewir a si Amang Kasuruan, ampa'paan en owakta piniara-Na.

1 Korintus 6:18

Tumayango mangé i mengéma-ngema' in cabul! Eng kamesé-meséaan walina sé pengaémaan é tou, ra'ica wana eng kasiwakan an owakna. Taan si tou mengaéma' in cabul, sia méma'o ing kamesé-meséaan si awéan eng kasiwakan an owakna in esa.

2 Korintus 12:21

Em paindé-indé'ku an tutuwku maai sa, yaku iwawa' i Amang Kasuruan an dior iow wo aku mawendu ampa'paan kelian sé an uner iow indior sé mengaéma' ing kamesé-meséaan wo ra'ipé' mape'dis mengéma-ngéma' sé karican, mengabersina, wo mengaéma' ing kasalé'an in owak sé ra'ica wutul.

Efesus 5:12

Ampa'paan pepaarke' sapa sé ipaene-enep éra itu kalawiin keli.

Efesus 5:5

Wéan iow rékén sumama-sama': sé tou mengabersina, sé mengéma-ngéma' sé karican kuma'pa masalé-salé'ke' in anu é tou walina, sé tou longi' am baya-waya si ro'na i peputé wo sé mengaapo' a sé opo-opo'. Sé tou tanu siitu ra'ica kawisa makéré im bagéan ang Kakolanoan i Yesus Kristus wo si Amang Kasuruan.

Filipi 1:27

Anaé, em penting keli kamu musti menonou kumiit in sapa sé aisusui an Abar Kaaruien andumoro' i Kristus. Wo in taniitu, aku maai meta'up wo icamu kuma'pa ra'ica, kailekanku oka sapaoka kamu enté' makatulung an esa wasa wo rumaméji mewali-wali an esa até torona im paémanen ampa'paan makiit in Abar Kaaruien.

Kolose 3:5

Ampa'paano in itu tiya'o waya eng kasalé-salé'an in owak ang katouan iow, tanumai, mabersina, najis, kasalé'an in owak andumoro' in cabul, kasalé'an léwo', longi' am baya-waya si ro'na ipeputé wo i mengaapo' a sé opo-opo'.

1 Tesalonika 4:3

Si anioo waya eng kasalé'an i Amang Kasuruan: menonouo mangé toronake' Sia, menonou le'nas wo ra'ica mengabersina.

1 Tesalonika 4:7

Kita tinowao i Amang Kasuruan e menonou ang kale'nasan wo ra'ica mengaéma' in andumoro' sé cabul sé karican oka mai.

1 Timotius 2:10

Taan aweso taré sé wéwéné itu mengapasung in owak éra ang karapi mengaéma' sé loor sé patus pengaémaan é wéwéné sé mangaku maapo' a si Amang Kasuruan.

1 Timotius 3:3

ra'ica lalangun, ra'ica tae'bow taan sama' a sé tou, masalé' meelu-eluran wo sé kakélé in tou wo ra'ica ata in doit,

1 Timotius 6:10

Icuaku in taniitu ampa'paan, sa sé tou longi' in doit, am bituo en tino'tolan ing kaléwo-léwo'an. Séra ka'i ra'io masalé' kumiit in sususuien i Yesus ampa'paan séra rumaméji masiya'. Wo eng kasiwakanna séra makéré keli kawenduan e méma' in até éra sumakit.

2 Timotius 3:2

Wo asé endo itu ka'i, sé tou asalo oka mengaupus in owak éra in esa wo mamuali ata in doit. Séra mengatowo oka wo mengatirayo in owak éra in esa, mengawuruk i ngaran é tou. Séra mengasundur sé matu'a, ra'ica makailek mengawéé i makapulu'sama' wo ra'ica mapandung i mengaapo' a si Casuruan.

Titus 1:11

Sé tou tanu siitu musti iru'du'mu menes wosama' séra ra'io mengasusui sé ra'ica wana en torona. Ampa'paan sé pengasusui éra itu mengauwak sé tou wosama' séra ro'na makéré roit. Wo en sususuien éra itu lumicokoo sé keli pamalé'.

Titus 1:7

Sé mengatilik an jamaat en tawoienna mengatu'tul sé jamaat i Amang Kasuruan, sia musti menonou ra'ica wana e ro'na méé kaséaan, ra'ica tirayo, ra'ica tae'bow, ra'ica lalangun, ra'ica tampenokolen wo ra'ica ata in doit.

Titus 2:3

Taniitu ka'i sé wéwéné matu'ao, sina'uenmu mangé séra wosama' musti mengaapo' kumiit ing kasalé'an i Casuruan. Séra ka'i ra'ica toro mengawuruk i ngaran é tou wo ra'ica tansaléén in elepen mengalangu. Aweso taré séra itu mengasusui angé sé loor a sé tou.

Ibrani 12:16

Matéi-téiro mangé wosama' ra'ica wana esaan ai camu sé mengaéma' andumoro' sé sundal wo ra'io masiri' si Amang Kasuruan meputé wo si Esau, si mangkér in hakna tanu toyaang luluna ampa'paan in esa piring kakanen.

1 Petrus 5:2

Téiran iow sé tou maéman a si Yesus sé aitoké i Amang Kasuruan ai camu. Téiran iow séra kaputé i gembala matéir sé dombana. Téiran iow séra ra'ica ampa'paan pinelesé' taan ang karapi in arui en até, kumiit ing kasalé'an i Amang Kasuruan. Wo tioo ampa'paan maéré-éré ing kalébéan, taan ang karapi i mauli-ulit tumawang iséra.

2 Petrus 2:10

Wo eng kataré-taré akimen-Na, sé tou sé asalo makiit ing kasalé'an in owak sé ra'ica wutul ampa'paan kasalé'an in esa wo maroros ing kawasa i Amang Kasuruan. Sé guru ra'ica wutul itu ra'ica wana eng kaindé'an wo tirayo akar séra ra'ica maindé' maroros pakasa sé menonou an sorga sé iparayo wo pasiriin.

2 Petrus 2:14

Em beren éra masalé' menéré-néré sé wéwéné akar masalé' mengabersina wo ra'ica mengasuut mengaéma' ing kamesé-meséaan. Wo séra matawér sé tou ra'ipé' talos maéman a si Apo' Yesus wosama' icasélé'kow. En até éra itu manaramo menonou ang kalongi'an. Wo séra ituo sé tou kinutuk.

2 Petrus 2:3

Ampa'paan sé guru ra'ica wutul itu longi' in doit, séra masisil in sisisilen sé niéma' éra in esa torona muwak icamu. Ampa'paano sé niéma' éra itu, en ukuman éra uréo keli aitu'tulo i Amang Kasuruan wo em papaté éra ra'io ipauré-uré.

Wahyu 2:14

Taan awéan piraan sé ra'ica icasalé'-Ku ai camu: An uner iow awéan sé makiit im pasusui i Bileam. Si Bileam masusui a si Balak tumambisa en tumawér sé tou Israel kuman ing kakanen sé ayumpero a sé opo-opo', wo mengabersina.

Wahyu 2:21

Winéan-Kuo témpo si wéwéné itu e mape'dis, taan ra'ica yento'na mengéma-ngéma' sé andumoro' in cabul.

Wahyu 21:8

Taan sé tou toloindé' mengasairi andumoro' i Yesus, sé tou ra'ica maéman, sé tou mengaéma' ing kaléwo-léwo'an sé karican oka mai, sé tou mengapaté tou, sé tou mengasundal, sé tou mengasihir, sé tou mengaapo' a sé opo-opo' wo pakasa sé tou kotowo, séra im baya yuntep oka an untep in ta'sic api walélang si mengembu-ngembung. Si anioo em papaté karua.”

Wahyu 22:15

Sé tou makaperi tanu sé asu wo sé mengasihir, sé mengasundal, sé mengapaté tou, sé mengaapo' a sé opo-opo', wo sé masalé' mengatowo wo mengaéma' in towo, séra musti mento' ang kesot ing kota itu.

Wahyu 9:21

Séra ka'i ra'ica kiim mape'dis mengéma-ngéma' sé léwo' walina tanumai mapaté tou, mariara, mabersina wo marombit.