Efesus 3:4 - En Taar Weru a nunuwu' é Tontemboan

⁴ Sa binacao miow si aipaticku itu, ro'nao kaangéan iow sapa sé kinailekankuo andumoro' im pawasa-wasan i Amang Kasuruan andumoro' i Kristus.

Efesus 3:4 ပူးပေါင်းရင်းမြစ်များ

Matius 13:11

Isowat i Yesus, “Si Amang Kasuruan imééo mai ing kamang tatambér ai camu e makailek in sususuien sé icaenepé' andumoro' ing Kakolanoan in Sorga, taan ai séra ra'ica.

Lukas 8:10

Wo icua-Na, “Kamu intarépé' winéan i Amang Kasuruan kamang tatambér e makailek andumoro' ing Kakolanoan in Sorga. Taan a sé tou walina andumoro' ing Kakolanoan in Sorga itu, icua-Ku maké in andéan wosama', ‘Mandé sinéré éra, taan ra'ica kaangéan éra sapa en sinéré, wo mandé ka'i lininga éra, taan ra'ica kaangéan éra sapa en lininga.’

Roma 11:25

Poo-poow esa paémanen, icuaku ai camu sé icaenepé' wosama' kamu ra'ica matirayo. Si anioo em pawasan i Amang Kasuruan sé icaenepé' itu: Kelian sé tou Israel imamualio keté ro'kos taan séra mamuali taniitu ra'ica akar ing kauré-uré, taan akarke' i malekep eng kakelina é tou ra'ica Israel sé maéman a si Kristus sé aitantuo i Amang Kasuruan.

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

1 Korintus 13:2

Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

1 Korintus 4:1

Poo-poow, anggapeno mai kami tou sé matawoi maselewirke' a si Kristus, sé tinokéan makua in abar andumoro' im pawasa-wasan i Amang Kasuruan en lumowir sé tou. Em pawasa-wa- san itu ra'ipé' kailekan é tou walina.

2 Korintus 11:6

Mandé ka'i aku ra'ica pinter maroma', taan andumoro' ing kakailekan yaku ra'ica tou bodok. Aituru'o ami en itu ai camu am pakasa in témpo wo am baya-waya.

Efesus 1:9

Intarépé' em pawasa-wasan itu aicua-Nao ai cita kumiit ing kasalé'an-Na, siituo si pawasan indior si pakaenepé' a sé tou. Wo em pawasa-wasan-Na itu pinusé'-Nao lekepen oka i Kristus.

Efesus 3:3

Si Amang Kasuruan in esa en icumua a yaku andumoro' im pawasa-wasan-Na sé aicaenepé', tanu si aipaticku asi suratku anio' mandé ka'i ing kolekke'.

Efesus 3:9

wo tumuru' im pawasa-wasan i Amang Kasuruan a sé pakasa in tou. Em pawasa-wasan-Na itu maatu-atus ngata'un eng kauréna si ayenep-Na si méma' im baya-waya.

Efesus 5:32

En sususuien andumoro' é mempenanaan anio', eng kaangéanna rarem keli. Em paangé- angénku tumuru' in ubungan i Kristus wo sé jamaat.

Efesus 6:19

Wo ipengasombayang angé ka'i aku, wosama' an tutuwku i rumoma' wéan i Amang Kasuruan aku nunuwu' isumoma, akar ra'io wana eng kaindé'anku ing kumua in Abar Kaaruien en andumoro' i Yesus Kristus. En Abar Kaaruien itu indior ra'ipé' aicua a sé pakasa en tou, taan intarépé' aicuao ai séra.

Kolose 1:26

En Taar-Na itu indior aicaenepé' asé im pakasa é tou maatu-atus ngata'un eng kauréna, taan intarépé' aipapaturu'o i Amang Kasuruan a sé tou le'nas.

Kolose 2:2

Yaku rumaméji tanu siitu wosama' en até éra kaiboran wo meesa ang kaupusan akar séra makasiya' ang kakailekan andumoro' sé wutul wo uli-ulit maéman. Wo in taniitu kakailekan éra oka em pawasan i Amang Kasuruan sé indior icaenepé'. Em pawasan-Na itu tumuru' a si Kristus.

Kolose 4:3

Wo isombayang ka'i mangé kami wosama' wukaan-Na mai en lalan ai cami eng kumua in abar si indior aicaenepé' andumoro' i Kristus. Ampa'paan i méma' in itu akar aku ayuntep am bui.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

1 Timotius 3:9

Séra musti menonou ang karapi in até weresi wo uli-ulit makiit in sususuien si aituru'o i Casuruan.