Efesus 2:12 - En Taar Weru a nunuwu' é Tontemboan

¹² An tutuw itu kamu ra'ipé' maéman a si Kristus. Kamu ra'ipé' aicauntep a sé tou sé sinisir i Amang Kasuruan wo ra'ica tumerima pakasa sé aijanji-Na a sé tou-Na Israel. Wo kamu menonou ang kayo'baan anio' ra'ica wana em paarapen wo ka'i ra'ica makatuus si Amang Kasuruan.

Efesus 2:12 ပူးပေါင်းရင်းမြစ်များ

Lukas 1:72

en tumuru' ing kaupusan-Na a sé apo-apo'ta wo pena'né-na'néien-Na en janji-Na sé le'nas.

Yohanes 10:16

Taan Yaku awéané' ka'i domba walina sé ra'ica asi kurungan anio', sé domba itu musti ka'i akinen-Ku wo lingan oka éra en suara-Ku. Wo séra mamuali oka sangareru' wo sé domba-Ku ang kurungan anio', wo makaanu esa gembala, siituo Aku.

Yohanes 15:5

Yakuo en tuura in anggor, wo icamuo em panga-panganana. Si séike' si menonou meesa wo Yaku, Yaku ka'i meesa wo isia, sia méé oka keli wua'na. Ampa'paan sa sia ra'ica meesa wo Yaku, sapa-sapake' ra'ica kaémaanna.

Yohanes 4:22

Kamu tou Samaria, kamu mengaapo' a si Amang Kasuruan taan ra'ipé' katuusan iow wutu-wutul si séi Sia, taan kami tou Yahudi mengaapo' a si Amang Kasuruan si wutu-wutul katuusano ami si séi Sia. Ampa'paan aijanjio i Amang Kasuruan sapaoka an uner ami tou Yahudi awéan esa Tou si lumowir oka pakasa in tou.

Kisah Para Rasul 2:39

Ampa'paan sé aijanjio i Amang Kasuruan itu torona pakasa in tou sé tinowa-Na, icauntep icamu wo sé taranak iow wo ka'i pakasa en tou sé maento' an tampa-tampa tayang.”

Kisah Para Rasul 28:20

Ampa'paan in ituo pinangilekku kamu meta'up wo mepaar ang karapiku wosama' kailekan iow sa pakasa en aitudu éra a yaku ra'ica wutul. Ampa'paan aku maarap wo maéman a si Mesias si aijanji i Amang Kasuruan ai cita tou Israel, ampa'paan in ituo aku pakawa'kesen tanu sia'i.”

Kisah Para Rasul 3:25

Airior érao ing kumua a sé apo-apo' miow en janji i Amang Kasuruan en andumoro' i Mesias. Wo kamu im baya makéré oka bagéan an janji itu. Indior aicua-Nao a si Abraham in tana'i, ‘Asi taranakmu oka, pakasa sé bangsa ang kayo'baan kamangen oka.’

Roma 9:8

Eng kaangéanna, ra'ica pakasa sé taranak i Abraham mamuali toya-toyaang i Amang Kasuruan. Taan sé toyaang itumou ampa'paan in janji i Amang Kasuruan sérao sé patuulen toya-toyaang-Na.

Galatia 4:8

Indior an tutuw iow ra'ipé' makatuus si Amang Kasuruan, kamu mengaata in owak a sé opo-opo' sé wutu-wutul ra'ica Amang Kasuruan.

Efesus 2:19

Wo in taniitu, kamu sé tou ra'ica Yahudi ra'io ka'i tanu sé tou imanangkéi, taan intarépé' kamu imamualio tou le'nas wo ayuntepo am pamalé-Na.

Efesus 4:18

Em bewerot éra imariréimbengo, wo séra menonou tayang wo si Amang Kasuruan, ampa'paan séra bodok wo en até éra keté.

Kolose 1:21

Indior, kamu ka'i menonou tayang asi Amang Kasuruan wo mamuali kaséké'-Na an untep in até wo e ngaas iow en tuusna em pengaémaan iow léwo'.

Kolose 1:27

Wo Sia masalé' kumua a sé tou-Na sapaoka sé icaenepé' itu uli-ulit loor wo wangko' asé pakasa in tou sé ra'ica Yahudi. Sé ipakaenep itu tana'i, si Kristus an atéo miow, eng kaangéanna kamu awéan paarapen makéré im bagéan asi rarayo wo in sisiri' asi Amang Kasuruan owo.

Kolose 1:5

Kamu maéman wo mengaupus taniitu ampa'paan kamu maarap wo mengento-ngento' sapa sé aitu'tu'o i Amang Kasuruan torona miow an sorga. Em paarapen itu liningao miow an tutuw in sususuien wutul ipakua-kuao ai camu. Siituo en Abar Kaaruien andumoro' i Yesus Kristus.

1 Tesalonika 4:13

Poo-poow, sa awéan tou maté, ra'ica kiim ami kamu mawendu keli kaputé sé tou ra'io wana em paarapen. Ampa'paan in itu, icasale' ami kumua ai camu sapa si mamuali oka a sé tou matéo.

1 Tesalonika 4:5

Tioo kamu menonou kumiit ing kasalé'an in owak sé ra'ica wutul, wayake' sé tou ra'ica makatuus si Amang Kasuruan si mengaéma' in tanu siitu.

2 Tesalonika 2:16

Si Apo'ta Yesus Kristus wo si Amang Kasuruan, Amangta mengaupuso mai cita. Aitambér-Nao mai en upus-Na ai cita wosama' ro'na méé ing kaketeran an até akar ing kauré-uré, wo méé mai im paarapen ai cita e makéré oka sé loor.

1 Timotius 1:1

En surat anio' a yaku owo Paulus, si mamualio ruru'du'an i Kristus Yesus kumiit im perénta i Amang Kasuruan Si Lumolowirta wo si Kristus Yesus si paarapenta.

Ibrani 11:34

awéan sé me'del in api mengembu-ngembung si ra'io icakua, awéan sé pinarak in sa'bel taan icaséip. Awéan sé lembi maketero, wo awéan ka'i sé maketero am paperangan akar icumala sé suraro sé am banua walina owo.

Ibrani 6:18

Anaé, si Amang Kasuruan imééo in janji wo in sumpa-Na. Sé rua itu ra'ica kawisa maroba, ampa'paan si Amang Kasuruan ra'ica kawisa tumowo. Ampa'paan in ituo, kita sé mengaéré in loindongen i Amang Kasuruan, makéré ing kaincayaan keter e mauli-ulit tumimboi im paarapen si an diorta.

Ibrani 8:6

Taan intarépé' si Yesus imakéréo tawoien tanu imam si lébé iparayo wo pasiriin wo in tawoien é imam indior. Ampa'paan Sia maali mai im perjanjian si lumoorai wo im perjanjian uré, ampa'paan si Amang Kasuruan ijumanjio andumoro' sé lébé loorai.

1 Petrus 1:21

Ampa'paan e niéma' i Kristus ituo, kamu maéman a si Amang Kasuruan, Siao en tumou sumawel si Kristus an unér é tou imaté wo ka'i méma' si Kristus iparayo-rayo wo pasiri-siriin. Wo in taniitu em paémanen iow wo em paarapen iow toronake' i Amang Kasuruan.

1 Petrus 1:3

Irayoo mangé si Amang Kasuruan! Sia itu Amang i Apo'ta Yesus Kristus. Irayota Sia ampa'paan taloso wangko' eng kaupusan-Na ai cita akar kita imakéréo ing katouan weru, si katouan wuta im paarapen. Kita ro'na makéré ing katouan weru itu ampa'paan indior si Yesus Kristus itumouo sumawel am papaté.

1 Petrus 3:15

Taan irayoo wo siriino mangé si Kristus an até miow wo émaano Sia merénta ai camu. Wo kamu musti tu'tul en sumowat kawisake' mangé sa awéan tou mamuéi andumoro' sapa si paara-arapen iow asi Apo' Yesus. Wo sowateno mangé séra ang karapi ing ko'kos en até wo ang karapi in siri'.

1 Yohanes 3:3

Sé tou maarap tanu siitu ai Sia, musti téiranna sumama-sama' eng katouanna wosama' le'nas meputé wo si Kristus itu le'nas.