Efesus 1:4 - En Taar Weru a nunuwu' é Tontemboan

⁴ Ra'ipé' niéma' i Amang Kasuruan eng kayo'baan anio', sinisir-Nao kita wosama' meesa ang karapi i Kristus wo mamuali anu-Na si ra'ica wana kaséaan sapa-sapa an dior-Na.

Efesus 1:4 ပူးပေါင်းရင်းမြစ်များ

Matius 24:22

Wo sa sé endo kawenduan itu ra'ica koleken i Amang Kasuruan, ra'ica wana mandé esake' tou e malowir. Taan ampa'paano ing kaupusan-Na a sé tou sé sinisir-Nao, akar sé endo kawenduan itu koleken-Na oka.

Matius 24:24

Ampa'paan sé kristus ra'ica wutul wo sé nabi ra'ica wutul mapaturu' oka. Émaan éra oka en tuu-tuus wo kakaya'kaan sé ra'io icakua en sumélé'kow sé tou, sa woo ro'na ka'i, isélé'kow éra sé tou sinisiro i Amang Kasuruan.

Matius 24:31

Wo iru'du'-Na oka sé malaékat-Na kumesot sumengo in trompét taténgé keli, wo ipapali'us-Na ai séra pakasa sé tou sé sinisir-Nao am bisa-wisake' asi kayo'baan anio' tumo'tol asi tempok in langit akar asi tempok in langit.

Matius 25:34

Wo si Toyaang i Tou si tanu Kolano itu kumua oka a sé tou ang kakan-Na, ‘Mayo sumusuto mai kamu sé kinamango i Amang-Ku! Muntepo mai ang Kakolanoan si aitu'tulo ai camu tumo'tolai eng kayo'baan anio' niéma'.

Yohanes 10:16

Taan Yaku awéané' ka'i domba walina sé ra'ica asi kurungan anio', sé domba itu musti ka'i akinen-Ku wo lingan oka éra en suara-Ku. Wo séra mamuali oka sangareru' wo sé domba-Ku ang kurungan anio', wo makaanu esa gembala, siituo Aku.

Yohanes 15:16

Ra'ica icamu en isumisir Yaku, taan Yakuo en isumisir icamu mamuali murit-Ku. Kamu winéan-Kuo tawoien, wosama' kamu mangé wo méé wua'na kumeli-keli sé ra'ica maka'pu. Anaé, sapake' em pangileken iow a si Amang-Ku a ngaran-Ku, en itu iwéé-Na oka ai camu.

Yohanes 17:24

O Amang, icasalé'-Ku wosama' sé tou sé aisarakan i Amang a Yaku awéan mewali-wali wo Yaku asi tampa angéan-Ku. Icasalé'-Ku taniitu wosama' ro'na kaséréan éra e rarayo wo en sisiri'-Ku, siituo e rarayo wo en sisiri' si aiwééo i Amang a Yaku ampa'paan si Amang mengaupuso Yaku an tutuw ra'ipé' niéma' eng kayo'baan anio'.

Kisah Para Rasul 13:48

Kelinga in itu, pakasa é tou sé ra'ica Yahudi arui keli wo rumayo sumiri' in Taar i Casuruan itu. Wo sé tou sinisiro i Amang Kasuruan makéré oka ing katouan akar ing kauré-uré, séra itu mamuali maéman.

Kisah Para Rasul 15:18

si cumuao im basa-Na itu indioré'wo.’ ”

Kisah Para Rasul 18:10

Yaku mewali-wali wo ico, wo ra'ica wana esaan tou e ro'na misu' wo mokoi ico, ampa'paan keli tou ang kota anio' maéman a Yaku.”

Roma 8:33

Si séi réén e ro'na méé séa' a sé tou sinisiro i Amang Kasuruan? Sé tou sinisir-Na nianggap-Na wutul, ra'ica wana e ro'na mukum séra?

1 Korintus 1:8

Sia oka ka'i e méma' mai im paémanen iow kasake' keter akar ing kaka'puan ing kayo'baan, akar kamu kéréan-Na ra'ica wana kaséaan asi endo si Apo'ta Yesus Kristus maai sumawel.

Galatia 5:13

Poo-poow, kamu tinowao i Amang Kasuruan mamuali tou sé ra'io ka'i pakakawasan in ukum Torat. Taan tioo pakén iow eng kaloasan itu imamuali alasan i menonou ang kamesé-meséaan. Taan aweso taré kamu si esa wo sé walina mensen-selewirano mangé ang karapi in upus.

Galatia 5:22

Taan sé tou pakaakinen i Roh Le'nas, wuéna ing katouanna tanu sé anio': awéan upus, kaaruian, kaeluran, katalesenan, kasamaan in até, kalooran, kale'tekkan,

Galatia 5:6

Ampa'paan torona é tou sé meesao wo si Kristus Yesus, sia sinunat kuma'pa ra'ica sinunat en itu ra'ica penting. Em penting am bia'i em paémanen si aituru' ang karapi in upus a sé tou walina.

Efesus 2:10

Ampa'paan si Amang Kasuruan in esa si iméma' icita mamuali tou weru an tutuwta maéman a si Kristus Yesus wo meesa wo Sia. Kita niéma'-Na tou weru wosama' émaanta sapa-sapake' sé loor sé aitantu-Nao tumo'tolke' mai indior wosama' émaanta waya sé loor.

Efesus 3:17

akar si Kristus mento' an até miow ampa'paan kamu maéman ai Sia wo eng katouan iow maa'mut wo tumuur a si upus-Na.

Efesus 4:2

Anaé, menonouo mangé ang karapi ing ko'kos en até, sama' en até a sé pakasa é tou wo talesen. Ituru'o mio' en upus iow ang karapi i mentan-tawangan si esa wo sé walina.

Efesus 5:2

Menonouo mangé ang karapi i meupu-upusan, kaputé i Kristus mengaupuso icamu. Sia sumarakano in owak-Na torona icita tanu raragésan si mawou manam torona i Amang Kasuruan.

Efesus 5:27

wosama' séra ro'na wéan-Na tampa an dior-Na tanu jamaat sé iparangka-rangka', ra'ica wana kaséaan kuma'pa icumeleso kuma'pa si kaputé in itu. Sé jamaat itu mamuali oka le'nas wo ra'ica wana e ro'na méé kaséaan.

Filipi 2:15

wosama' kamu menonou ang karapi in até weresi wo ra'ica wana kaséaan. Wo in taniitu, ituru' miow sapaoka kamu toya-toyaang i Amang Kasuruan sé ra'ica wana kaséaan an uner é tou léwo' wo a sé tou icasélé'kow. Anaé icamu oka e mamuali sendot an unér éra kaputé sé sumesendot mengatélang an untep ing kayo'baan.

Kolose 1:22

Taan intarépé' kamu niéma'o i Amang Kasuruan meelurano sumawel wo Sia ampa'paan im papaté in owak i Kristus, wosama' kamu menonou le'nas wo ra'ica wana kaséaan wo ra'ica wana e ro'na itudu an dior-Na.

Kolose 2:2

Yaku rumaméji tanu siitu wosama' en até éra kaiboran wo meesa ang kaupusan akar séra makasiya' ang kakailekan andumoro' sé wutul wo uli-ulit maéman. Wo in taniitu kakailekan éra oka em pawasan i Amang Kasuruan sé indior icaenepé'. Em pawasan-Na itu tumuru' a si Kristus.

Kolose 3:12

Ampa'paano in itu, kamu sé sinisiro i Amang Kasuruan wo sé line'nas-Nao wo ka'i sé icaupus-Na, ituru'o mangé eng kaupusan iow, mengaéma' mangé in loor, mengako'kos angé in até, tioo mengakasar a sé tou wo malese-lesen mengasaru ing kawenduan asi esa wo sé walina.

1 Tesalonika 3:12

Pangileken ami wosama' émaan i Casuruan kamu meupu-upusan asi esa wo si esa wo mengawe-ngawes ka'i eng kaupusan iow a sé tou, meputé icami mengaupus ai camu.

1 Tesalonika 4:7

Kita tinowao i Amang Kasuruan e menonou ang kale'nasan wo ra'ica mengaéma' in andumoro' sé cabul sé karican oka mai.

2 Timotius 1:9

Aiwéé-Nao eng kalowiran ai cita wo tinowa-Na kita wosama' menonou le'nas kumiit ing kasalé'an-Na. Niéma'-Na waya en itu ra'ica ampa'paan kita maéma' ing kaloo-looran, taan ampa'paan pinewasa-Nao indior. An tutuw eng kayo'baan anio' ra'ipé' niéma'-Na, Sia mawasao tumambérai in upus-Na ai cita in tou ampa'paan i Kristus Yesus.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

2 Timotius 2:19

Taan em patuuran niéma' i Amang Kasuruan ulit keter. Em patuuran itu aipatic in tana'i, “Katuusan i Casuruan sé tou-Na” wo “Si séike' mangé sé maapo' a si Casuruan, mentoo mengéma-ngéma' in léwo'.”

Yakobus 2:5

Poo-poow sé icaupusku! Lingano mai en icuaku anio': Sinisiro i Amang Kasuruan sé tou sé paweroten ing kayo'baan anio' lengéi, wosama' séra masiya' am paémanen éra wo makaanu im bagéan ang kakolanoan-Na tanu si aijanji-Nao a sé pakasa in tou sé mengaupus Sia.

1 Petrus 1:2

Icamu sinisir i Amang Kasuruan, Amangta, tumo'tolke' mai indior kumiit im pawasa-wasan-Na. Wo kamu niéma' i Roh Le'nas mamuali le'nas wosama' kamu le'tek maéma' ing kasalé'an i Yesus Kristus wo eng kamesé-meséaan iow ka'i weresin-Na ang karapi in enda'-Na. Pekiupusenku a si Amang Kasuruan wosama' émaan-Na mai eng katouan iow elu-elur wo méé mai ing kamang si kumeli-keli ai camu.

1 Petrus 1:20

Si Kristus sinisiro i Amang Kasuruan an tutuw eng kayo'baan anio' ra'ipé' niéma'. Wo matawio ing kaka'puan ing kayo'baan anio', Sia imayo ang kayo'baan wosama' kamu im baya ro'na makéré ing kalowiran an ukuman ing kamesé-meséaan.

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

2 Petrus 3:14

Ampa'paan in ituo é poo-poow sé caupusku, ang karoro'an iow maento-ento' im pakasa itu mamuali, kamu musti rumaméji menonou le'nas wo ra'ica wana kaséaan an dior i Amang Kasuruan wo meeluran ang karapi-Na.

1 Yohanes 4:16

Kita makatuuso wo mercayao in upus i Amang Kasuruan ai cita. Si Amang Kasuruan itu e makaanu in upus. Si séi si mengaupus sé tou walina, sia itu imeesa wo si Amang Kasuruan, wo si Amang Kasuruan ka'i meesa wo sia.

Wahyu 13:8

Pakasa é tou sé menonou ang kayo'baan kumuru en sumiri' oka a si binatang itu. Sérao sé tou tumo'tolke' mai eng kayo'baan anio' niéma' e ngaran éra ra'ica aipatic ang kitap ing katouan i Toyaang i Domba si pinatéo.

Wahyu 17:8

Si binatang si sinérému itu, indior awéan taan intarépé' ra'io wana. Wo sia mapaturu' oka ang kepal im papaté wo sia maangém am papaté. Sé tou i menonou ang kayo'baan e ngaran éra ra'ica aipatic an untep ing kitap ing katouan tumo'tolai eng kayo'baan anio' niéma', séra mangaya-ngaya'ka' oka an tutuw suméré si binatang itu, ampa'paan si binatang itu indior awéan taan intarépé' ra'io wana, taan mapaturu' oka sumawel.