2 Timotius 3:5 - En Taar Weru a nunuwu' é Tontemboan

⁵ Sa asalo suméré im paémaan éra, séra itu tanuoka woo mengaapo' wutul a si Amang Kasuruan, taan en ulitna séra ra'ica masalé' maké ing kawasa i Casuruan. Anaé, séra ra'ica wutul makiit si Casuruan. Ampa'paan in itu tumayango mangé ai séra!

2 Timotius 3:5 ပူးပေါင်းရင်းမြစ်များ

Matius 7:15

“Maténga-téngamo mangé a sé nabi ra'ica wutul. Séra maai ai camu tanuoka domba, taan en ulitna séra itu serigala léwo'.

Efesus 4:14

Wo in taniitu, kita ra'io ka'i kaputé é toyaang sé taporakké' pauwaken wo ipawali-walipé' i membam-balinaan sususuien é tou sé ra'ica wutul. Séra mengasélé'kow sé tou ang karapi in sususuien sé mengauwak.

2 Tesalonika 3:14

Sa awéan tou ra'ica kiim kumiit sé aipatic ami an surat anio', kamu musti mareti-reti wo tioo makara-karapi wo si tou itu wosama' sia malawi'.

2 Tesalonika 3:6

Poo-poow, peréntan ami kamu maké ing kawasa i Apo' Yesus Kristus, wosama' tumayango mangé kamu asé poo-poow sé ra'ica kiim tumawoi wo sé ra'ica makiit in sususuien si aiwééo ami ai camu.

1 Timotius 4:7

Taan tumayang angé a sé tou sé masisil in sisisilen sé asalo niéma' é tou wo in sisisilen ra'ica wana torona. Aweso taré penganaramenmu sumama-sama' en owakmu mengaapo' a si Amang Kasuruan.

1 Timotius 4:8

Numaram in owak akar i maketer wayake' im pira eng katoronaan taan numaram in owak mengaapo' a si Amang Kasuruan, kelian eng katoronaanna. En itu tanu si aijanji-Na e maali mai ing kamang ang katouanta intarépé' asi cayo'baan anio' wo ka'i ang katouanta sa.

1 Timotius 5:8

Ampa'paan sa awéan tou ra'ica kiim murus sé poo-poowna wopé'ka'i kapoownapé' in esa, sia itu isumangkalo im paémanenna a si Yesus. Si tou itu lumébémai eng kaléwo' wo sé tou sé ra'ica maéman a si Casuruan.

1 Timotius 6:5

meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

2 Timotius 2:16

Ico ka'i tioo sumusut a sé tou mapaar im papaaren sé ra'ica wana torona wo a sé tou sé ra'- ica mengasiri' si Casuruan. Ampa'paan sé tou mapaar in taniitu méma'ke' taré iséra ra'ica maindé' ai Sia.

2 Timotius 2:23

Tioo ko meindo-indoan roma' andumoro' i roroma' sé ra'ica wutul wo ra'ica patus. Kailekanmu sa meindo-indoan roma' taniitu mengaéma' ing kaperéndéran é tou.

Titus 1:16

Séra ka'i mangaku makatuus si Amang Kasuruan taan sa sérén em paémaan éra, séra meputé wo sé tou makélong Sia. Séra karican oka mai wo ra'ica le'tek ampa'paan masundur im perénta i Amang Kasuruan wo ra'ica makawoo mengaéma' in sapake' mangé sé loor.

Titus 3:10

Musti ka'i romaanmu mangé si tou maéma' ing kapetanéan an jamaat. Sa makaruao sina'uenmu sia wo ra'ica kiimna luminga, tioo ko mekarapi wo isia.