2 Timotius 2:18 - En Taar Weru a nunuwu' é Tontemboan

¹⁸ Séra in dua itu isumélé'kowo a si sususuien wutul. Pengasusui éra sapaoka sé tou imatéo, tinouo sumawel i Amang Kasuruan, anaé ra'io wana tou en touené' sumawel. Wo em pengasusui éra itu, lumicokoo piraan tou sé maémano a si Yesus.

2 Timotius 2:18 ပူးပေါင်းရင်းမြစ်များ

Matius 15:13

Isowat i Yesus, “Pakasa en tinanem sé ra'ica ayusew i Amang-Ku an sorga kémbuten oka akar in a'mu-a'mutna.

Matius 22:29

Wo isowat i Yesus ai séra, “Isuméa' keli kamu, ampa'paan ra'ica pangartian iow eng Kitap Le'nas wo ka'i ra'ica kailekan iow eng kakawasaan i Amang Kasuruan.

Lukas 8:13

En lulumbo irumongkor an tana' wawatuan ayandé sé tou ilumingao in Taar i Amang Kasuruan ang karapi in arui en até. Taan en Taar itu ra'ica imaa'mut sama' an untep in até éra. Sé tou tanu siitu tumarépé'anke' maéman wo an tutuw imeta'- up im pangepé'an, séra ra'io ka'i maéman a si Amang Kasuruan.

Kisah Para Rasul 5:39

Taan sa en itu asi Amang Kasuruan owo, ra'ica kawooan iow sumundur iséra. Ra'ica kawooan iow eng kuma'pu iséra taan taré icamu in esao wona' en sumundur si Amang Kasuruan.” Kelinga éra in itu, sé anggota Mahkamah Agama tumerima in sama' pakasa sé aicua i Gamaliel.

1 Korintus 11:19

Wutul musti awéan papetanéan an uner iow, wosama' kaséréan oka sa si séi ai camu sé wutu-wutul le'tek maéman a si Amang Kasuruan.

1 Korintus 15:12

Ipakua ami a sé tou sapaoka si Kristus tinouo sumawel am papaté. Taan kéitu réén awéan piraan tou ai camu makua sapaoka sé tou imatéo ra'io ka'i touen sumawel?

Kolose 3:1

Poo-poow, si Kristus itumouo sumawel, anaé kamu sé maéman ai Sia tanuoka aitou sumawel ang katouan weru mewali-wali wo Sia. Ampa'paano in itu rumaméjio mangé kamu mangéré andumoro' sé an sorga. Asi tampa itu si Kristus makalukut ang kakan i Amang Kasuruan.

1 Timotius 1:19

Ico ka'i musti tatap maéman a si Apo' Yesus karapi in até weresi wo le'nas. Ampa'paan awéan tou ra'io mengakiit in até weresina akar em paémanen éra materi.

1 Timotius 6:10

Icuaku in taniitu ampa'paan, sa sé tou longi' in doit, am bituo en tino'tolan ing kaléwo-léwo'an. Séra ka'i ra'io masalé' kumiit in sususuien i Yesus ampa'paan séra rumaméji masiya'. Wo eng kasiwakanna séra makéré keli kawenduan e méma' in até éra sumakit.

1 Timotius 6:21

Awéan piraan tou makiit in sususuien sé pakua éra “kapinteran”, ampa'paan ituo séra ra'io maéman ka'i a si Yesus. Pangilekenku a si Amang Kasuruan wosama' Sia tumambérai ing kamang ai camu.

2 Timotius 2:14

Pokéiano mangé sé tou maéman andumoro' im pakasa sé aicuaku ai co. Icua mangé ai séra ang karapi i mauli-ulit an dior i Amang Kasuruan sapaoka séra ra'ica toro meindo-indoan roma' andumoro' ing kaangéan i nunuwuun itu, ampa'paan en itu ra'ica wana torona wo asalo lumicoko sé tou iluminga in itu.

Titus 1:11

Sé tou tanu siitu musti iru'du'mu menes wosama' séra ra'io mengasusui sé ra'ica wana en torona. Ampa'paan sé pengasusui éra itu mengauwak sé tou wosama' séra ro'na makéré roit. Wo en sususuien éra itu lumicokoo sé keli pamalé'.

Ibrani 3:10

Siituo e mangémai séra ica'ebow-Ku keli, wo icua-Ku, ‘En até éra mengii-ngiitke' in lalan si mengasélé'kow. Séra ra'ica kiim kumiit in lalan-Ku.’

Yakobus 5:19

Poo-poowku, sa awéan esaan angé ai camu, indior makiit in sususuien wutul i Casuruan taan intarépé' isumélé'kowo asi sususuien wutul itu, uli-ulit loor woo sa awéan tou en tumawang isia e maréng sumawel a si sususuien wutul i Casuruan itu.

1 Yohanes 2:19

Mémang séra itu tou an unerta owo, taan séra itu ra'ica touta. Ampa'paan sa séra itu touta, tantu séra kasake' mewali-wali wo icita. Taan ampa'paan séra itumanéo wo icita, en itu mamuali tuus sa séra itu ra'ica touta.