2 Tesalonika 3:6 - En Taar Weru a nunuwu' é Tontemboan

⁶ Poo-poow, peréntan ami kamu maké ing kawasa i Apo' Yesus Kristus, wosama' tumayango mangé kamu asé poo-poow sé ra'ica kiim tumawoi wo sé ra'ica makiit in sususuien si aiwééo ami ai camu.

2 Tesalonika 3:6 ပူးပေါင်းရင်းမြစ်များ

Matius 18:17

Taan sa sia ra'ica kiim luminga in sina'u éra, mangéo icua a sé jamaat em perkarana itu. Wo sa ra'ica linganna ka'i en sina'u é jamaat, anggapeno mio' sia tou ra'ica makatuus si Amang Kasuruan, kuma'pa sé matagi im pajak mengauwak sé tou.

Roma 16:17

Poo-poowku, sina'uenku kamu, mareti-retio mangé a sé tou sé masalé' mengaéma' ing kapetanéan, wo sé masalé' mengasélé'kow im paémanen é tou a si Amang Kasuruan. Séra mengasusui in sususuien sé membalinaan wo in sususuien wutul sé kinéréano miow. Anaé, tumayango mangé ai séra.

1 Korintus 11:2

Yaku Paulus marayo icamu é jamaat ang Korintus ampa'paan kamu mena'né-na'néi im pakasa sé pengaémaanku wo ka'i kasake' tumimboi in sususuien sé pasusuiku ai camu.

1 Korintus 5:4

An tutuw iow mali'u-li'- us ang karapi i ngaran i Apo' Yesus, anggapeno mio' aku an unero miow wo eng kawasa i Yesus Apo'ta ang karapi miow am bitu.

1 Korintus 5:9

Asi suratku indior, aipatickuo ai camu wosama' kamu tioo mengakarapi wo sé tou cabul.

2 Korintus 2:10

Sa ampungan iow si tou iméma'o ing kaséaan ai camu, ampunganku ka'i si tou itu. Ampa'paan sapa sé niampungankuo, sa wutul awéan em perlu ampungan, en itu ampunganku an dior i Kristus torona ing kalooran iow.

Efesus 4:17

Ampa'paan in itu, icuaku wo ita'néiku mangé ai camu ang karapi ing kawasa si aiwéé i Casuruan: Kamu ra'io toro menonou kaputé é tou sé ra'ica makatuus si Amang Kasuruan, sé asalo mawerot andumoro' sé ra'ica wana en torona.

Kolose 3:17

Wo sapake' mangé en émaan iow kuma'pa icua miow, émaano mangé waya en itu kumiit ing kasalé'an i Apo' Yesus, ang karapi i makua makapulu'sama' a si Amang Kasuruan, Amangta, ampa'paano i Yesus Kristus.

1 Tesalonika 4:1

Poo-poow, aisusuio ami ai camu tambisa em peri mengaarui in até i Casuruan, wo kamu wutu-wutul menonouo tanu siitu. Wo intarépé' pangileken ami ai camu ang karapi ing kawasa i Apo' Yesus, wosama' kamu rumaméjipé' mangé menonou mengaarui si Amang Kasuruan.

1 Tesalonika 4:11

Rumaméjio mio' kamu menonou mensan-samaan wo tioo icarambét an urusan é tou walina, taan aweso taré kamu tumawoi mangéré ing kakanen iow in esa tanu si sumangkumo aitaar ami ai camu.

1 Tesalonika 5:14

Pangileken ami ka'i ai camu é poo-poow, pengaromaan angé in sama' sé tou ra'ica kiim tumawoi, keteran angé en até é tou toloindé', tawangen angé sé tou patus tawangen wo malese-lesen angé a sé im pakasa é tou.

2 Tesalonika 2:15

Ampa'paan ito é poo-poow, male'te-le'teko am paémanen wo timboien sumama-sama' en sususuien si aisusuio ami ai camu ang karapi in surat kuma'pa sé nuwu' sé lininga miow ai cami.

2 Tesalonika 3:7

Ampa'paan kailekan iow in esa tambisa e musti kumiit ing katouan ami, ampa'paan an tutuw kita mewali-walipé', kami re'dem matawoi.

1 Timotius 5:21

Timotius, iwééku en tawoien anio' ai co an dior i Amang Kasuruan wo si Kristus Yesus wo sé malaékat sé sinisir-Nao. Pangilekenku ai co wosama' émaano waya sé aicuaku anio' an jamaat wo ra'ica marapit.

1 Timotius 6:5

meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

2 Timotius 3:5

Sa asalo suméré im paémaan éra, séra itu tanuoka woo mengaapo' wutul a si Amang Kasuruan, taan en ulitna séra ra'ica masalé' maké ing kawasa i Casuruan. Anaé, séra ra'ica wutul makiit si Casuruan. Ampa'paan in itu tumayango mangé ai séra!

2 Timotius 4:1

Si Kristus Yesus maai oka sumawel wo Sia mai kumawasa tanu Kolano. Siao e makim sé tou menonoué' wo sé tou imatéo. Ampa'paano in itu intarépé' an dior i Amang Kasuruan wo si Kristus Yesus, uli-ulit icuaku ai co é Timotius wosama':

2 Yohanes 1:10

Sa awéan tou maai ai camu wo kumua in sususuien si ra'ica meputé wo in sususuien i Kristus, tioo teriman iow sia am balé miow kuma'pa sumiri' sia.