2 Tesalonika 3:3 - En Taar Weru a nunuwu' é Tontemboan

³ Taan si Casuruan itu le'tek. Keteran-Na oka mai en até miow wo téiran-Na oka kamu ang kaléwo-léwo'an.

2 Tesalonika 3:3 ပူးပေါင်းရင်းမြစ်များ

Matius 5:37

Sa ‘én’, musti icua miow, ‘én’, sa ‘ra'ica’, musti icua miow, ‘ra'ica’. Sapa en lumébémai asi itu, en itu asi kikiiten é sétang owo.”

Matius 6:13

Wo tioo woo iwali kami muntep am pangepé'an, taan iwekaro mai kami ang kawasa i léwo'. [Ampa'paan si Amango e makaanu ing kakolanoan wo ing kawasa, wo iparangka-rangka' akar ing kauré-uré. Ulit.’]

Lukas 11:4

Wo ampunganai eng kamesé-meséaan ami, ampa'paan kami ka'i mawéé ing kaampungan a si tou si méma' ing kameséaan ai cami. Wo ra'ica toro iwali kami muntep am pangepé'an.’ ”

Yohanes 17:15

Yaku ra'ica mangilek a si Amang wosama' indon i Amang séra asi cayo'baan anio', taan pangileken-Ku wosama' loindongenai i Amang séra asi kawasa i léwo' siao kikiiten é sétang,

1 Korintus 1:9

Si Amang Kasuruan le'tek. Tinowa-Nao kamu e meesa ang karapi i Toyaang-Na, si Yesus Kristus Apo'ta.

1 Korintus 10:13

Sé pangepé'an pinendam iow itu, pangepé'an sé manaramo pengasangkumen é tou. Wo si Amang Kasuruan kasake' le'tek an janji-Na, anaé kamu ra'ica iwaya-Na asé pangépé'an sé ra'ica kawooan iow mamuléng. Taan tutuw iow pinangepé'an, kamu wéan-Na oka lalan akar kamu makawoo sumaru im pangepé'an.

1 Tesalonika 5:24

Si Amang Kasuruano en itumowa icamu. Sia itu le'tek, tantu émaan-Na oka pakasa sé aicua-Nao ai cita.

2 Tesalonika 2:17

Pekiupusen ami a si Amang Kasuruan wo a si Yesus Kristus, Apo'ta e méé mai ing kaketeran wo ing kaincayaan an até miow wosama' kawooan iow méma' im pakasa sé loor wo manuwu' in andumoro' sé loor.

2 Timotius 4:18

Iwekar-Na oka ka'i aku asé tou sé mawasa-wasa in léwo' e méma' yaku icawangkur. Lowiren-Na oka ka'i aku akar muntep an sorga, asi tampa Sia Makakawasa tanu Kolano. Siao em patus iparayo-rayo wo pasiri-siriin akar ing kauré-uré! Ulit.

1 Petrus 5:10

Taan eng kawenduan si pendamen iow itu ra'ica uré. Kekawus in itu, émaan oka i Amang Kasuruan em paémanen iow makaleke-lekep wo émaan-Na oka en até miow makaketer wo émaan-Na ka'i kamu mauli-ulit maéman ai Sia. Ampa'paan Sia itu Amang Kasuruan si palemboian waya ing kamang aitambér wo itumowao icamu maéman a si Kristus, wosama' kamu kumiit mendam i rarayo wo en sisiri'-Na akar ing kauré-uré.

2 Petrus 2:9

Anaé, ro'na kailekanta sapaoka si Amang Kasuruan tumawang sé tou sé masiri' Sia an tutuw séra am pangepé'an, wo sume'sek sé tou léwo' in ukumen asi endo Sia mai makim pakasa in tou.

Yudas 1:24

Si Amang Kasuruanke' si makakawasa en tuméir icamu wosama' kamu ra'ica icasu'su'. Siao e makawoo maali icamu sé ra'ica wana kaséaan a si tampa-Na si parayo-rayo wo pasiri-siriin, wo am bitu oka kamu masalé-salé'.