2 Tesalonika 2:14 - En Taar Weru a nunuwu' é Tontemboan

¹⁴ Torona ing kalowiran ituo, akar tinowa-Na kamu an tutuw ami makua in Abar Kaaruien andumoro' i Yesus Kristus ai camu. Wo in taniitu kamu ro'na makéré i rarayo wo in sisiri' ang karapi i Yesus Kristus, Apo'ta.

2 Tesalonika 2:14 ပူးပေါင်းရင်းမြစ်များ

Matius 25:21

Wo icua i tuangna, ‘Wutu-wutul loor e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' sé teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

Yohanes 17:22

Aiwéé-Kuo ka'i ai séra e rarayo wo in sisiri' si aiwééo i Amang a Yaku, wosama' séra meesa, kaputé Yaku wo si Amang esa.

Yohanes 17:24

O Amang, icasalé'-Ku wosama' sé tou sé aisarakan i Amang a Yaku awéan mewali-wali wo Yaku asi tampa angéan-Ku. Icasalé'-Ku taniitu wosama' ro'na kaséréan éra e rarayo wo en sisiri'-Ku, siituo e rarayo wo en sisiri' si aiwééo i Amang a Yaku ampa'paan si Amang mengaupuso Yaku an tutuw ra'ipé' niéma' eng kayo'baan anio'.

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

Roma 2:16

Tanu siituo e imamuali asi endo kaka'puan ing kayo'baan sa. Asi endo itu si Amang Kasuruan méé kawasa a si Kristus Yesus e makim waya sé icaenep an até é tou wo sé pawero-weroten é tou. Siituo sé ipakuaku iciit in Abar Kaaruien andumoro' i Yesus Kristus.

Roma 8:17

Wo sa kita toya-toyaang i Amang Kasuruan, kita awéan hak e makéré im bagéan asé im pakasa sé aitu'tulo i Amang Kasuruan torona é toyaang-Na. Wo terimanta oka en itu mewali-wali wo si Kristus. Wo sa kita mawendu meputé in sinangkumai i Kristus, kita ka'i tumerima oka i rarayo wo in sisiri' kaputé i Kristus.

Efesus 1:18

Isombayangku ka'i wosama' wukaan-Na mai en até miow akar kakailekan iow em paarapen si aiwéé-Na an tutuw iow tinowa-Na, wo akar kakailekan iow taloso wangko' eng kasiyaan im bagéan sé aitu'tul-Nao a sé tou le'nas.

1 Tesalonika 1:5

Kailekan ami en itu ampa'paan asi makasa kami mangé ai camu an Tesalonika e mangé kumua in Abar Kaaruien andumoro' i Yesus Kristus. An tutuw itu kami ra'ica asaloke' maké i nunuwu' ami, taan ang karapi ing kawasa i Casuruan wo ang karapi i Roh Le'nas si méma' icamu uli-ulit mercaya in Abar Kaaruien andumoro' i Yesus Kristus itu. Wo sinéréo ka'i miow em peri ami. Anaé, kailekano miow sapaoka en Abar Kaaruien itu wutul.

1 Tesalonika 2:12

Wo pangileken ami ai camu wosama' menonou angé makiit ing kasalé'an i Amang Kasuruan. Siao en itumowa icamu e muntep ang Kakolanoan-Na wo makéré i rarayo wo in sisiri'-Na.

2 Timotius 2:12

Sa kita kasake' le'tek maéman ai Sia, kita ka'i merénta oka sé tou mewali-wali wo Sia. Sa kita kumua ra'ica makatuus Sia, Icua-Na oka ka'i Sia ra'ica makatuus icita.

1 Petrus 5:10

Taan eng kawenduan si pendamen iow itu ra'ica uré. Kekawus in itu, émaan oka i Amang Kasuruan em paémanen iow makaleke-lekep wo émaan-Na oka en até miow makaketer wo émaan-Na ka'i kamu mauli-ulit maéman ai Sia. Ampa'paan Sia itu Amang Kasuruan si palemboian waya ing kamang aitambér wo itumowao icamu maéman a si Kristus, wosama' kamu kumiit mendam i rarayo wo en sisiri'-Na akar ing kauré-uré.

2 Petrus 1:3

Si Amang Kasuruan makaanu ing kawasa wangko', wo pakén-Na eng kawasa itu e méé im pakasa sé paperlunta wosama' kita menonou le'tek ai Sia. Pakasa sé paperlunta aiwéé-Na ampa'paan kita makatuuso ai Sia, si tumowao icita e makéré im bagéan a rarayo wo in sisiri'-Na wo ang kalooran-Na.

Wahyu 21:23

Eng kota itu ra'io ka'i maperlu si yéndo wo si serap en sumendot, ampa'paan si Amang Kasuruan si wuta in darayo wo in sisiri', iméé mai in sendot, wo si Toyaang i Domba ituo en sosoloanna.

Wahyu 3:21

Si tou muntung ilukut-Ku oka sia ang karapi-Ku asi palukutan pasiri-siriin-Ku, meputé wo Yaku si muntungo wo lumukut mewali-wali wo si Amang-Ku asi palukutan pasiri-siriin-Na.