2 Petrus 2:4 - En Taar Weru a nunuwu' é Tontemboan

⁴ Sé malaékat indior sé mengaéma' ing kamesé-meséaan ra'ica ampungan i Amang Kasuruan, taan iténdél-Na séra an api si ra'ica mape'de-pe'del akar ing kauré-uré. Séra yuntep ang kepal rarem wo riréimbeng en se'sek am bitu akar asi endo Sia mai makim pakasa in tou.

2 Petrus 2:4 ပူးပေါင်းရင်းမြစ်များ

Matius 25:41

Wo icua-Na oka ka'i a sé tou ang ka'biri-Na, ‘Kamu itu sé tou kinutuko. Tumayango mangé kamu an dior-Ku wo mangé muntep an api ra'ica mape'de-pe'del akar ing kauré-uré an tampa si aitu'tulo torona i kikiiten é sétang wo sé makiit sia.

Matius 8:29

Wo séra ka'i mangko', “Sapa en urusan-Mu wo icami, éi Toyaang i Casuruan? Mai-Mu réén okoien kami mandé ra'ipé' an témpona?”

Markus 5:7

Kumawus in itu, si tou itu mangko' repet, “Sapa en urusan-Mu wo yaku éi Yesus, Toyaang i Amang Kasuruan Si Rumangka-rangka'? Pekiupusenku ai Co ang karapi i ngaran i Amang Kasuruan, tioo okoien-Mu aku!”

Lukas 10:18

Icua i Yesus ai séra, “Én. Sinéré-Kuo si kikiiten é sétang ilumepok an langit owo tanuoka kilat.

Lukas 8:31

Kumawus in itu sé sétang itu mekiupus a si Yesus wosama' ra'ica yusér-Na séra mangé muntep ang kepal im papaté.

Yohanes 8:44

Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

Roma 11:21

Ampa'paan sa ra'ica icaupus-Na sé panga-pangana aseli, Sia ka'i ra'ica mengaupus icamu.

Roma 8:32

Si Toyaang-Na in esa ra'ica pena-nangen-Na en sumangkum ing kawenduan taan aisarakan-Na torona kita im baya. Sa taniitu, tantu iwéé-Na oka ai cita em baya-waya mewali-wali wo Sia.

2 Petrus 2:11

Sédangkan sé malaékat, mandé eng kaketer éra wo eng kawasa éra ilumébé mai wo sé guru ra'ica wutul itu, séra ra'ica brani tumudu mapaké i nunuwu' maojat a sé pakasa sé menonou sé iparayo-rayo wo pasiri-siriin an sorga an dior i Amang Kasuruan.

2 Petrus 2:5

Taniitu ka'i sé tou indior an jaman i Nuh, sé ra'- ica makiit ing kasalé'an i Amang Kasuruan, séra niukum-Na ang karapi in sonop wangko'. Wo sé tou linowir-Na wayake' si Nuh ang karapi é pitu tou, ampa'paan sia makua in sususuien wutul i Amang Kasuruan wosama' sé tou musti menonou kumiit ing kasalé'an i Amang Kasuruan.

2 Petrus 2:9

Anaé, ro'na kailekanta sapaoka si Amang Kasuruan tumawang sé tou sé masiri' Sia an tutuw séra am pangepé'an, wo sume'sek sé tou léwo' in ukumen asi endo Sia mai makim pakasa in tou.

1 Yohanes 3:8

Taan si séi si mengéma-ngéma'pé' ing kamesé-meséaan, sia itu anu i kikiiten é sétang, ampa'paan si kikiiten é sétang itu tumo'tolke' mai indior mengéma-ngéma' ing kamesé-meséaan. Taan si Toyaang i Amang Kasuruan maai en tumeri im pakasa sé pengaémaan i kikiiten é sétang.

Yudas 1:13

Séra itu tanuoka in sempa' wangker si tumela'u in lewa' wo i noo an ta'sic. Séra itu ka'i tanuoka sé sumesendot sé ra'ica metu'tul si asalo mengéra-ngéra en tampana. En tampa é tou itu tinu'tulo i Amang Kasuruan asi tampa uli-ulit riréimbeng akar ing kauré-uré.

Yudas 1:6

Taniitu ka'i wo sé malaékat sé lumébéo maké ing kakawasaan si aitantuo ai séra wo itumela'uo im patawoian éra. Séra yuntep asi tampa si uli-ulit riréimbeng, am bitu séra wina'kes i ranté si ra'ica kawukaan akar ing kauré-uré. Séra tinang am bitu akar asi endo pengaakiman en akimen asi endo wangko' itu.

Wahyu 20:10

Wo si kikiiten é sétang si sumélé'kowo sé tou itu, iténdél an untep in ta'sic api wo walélang. An tampa ituo en tinéndélan si binatang wo si nabi ra'ica wutul. Wo am bitu séra niokoi endo wo em bengi akar ing kauré-uré.