2 Petrus 2:3 - En Taar Weru a nunuwu' é Tontemboan

³ Ampa'paan sé guru ra'ica wutul itu longi' in doit, séra masisil in sisisilen sé niéma' éra in esa torona muwak icamu. Ampa'paano sé niéma' éra itu, en ukuman éra uréo keli aitu'tulo i Amang Kasuruan wo em papaté éra ra'io ipauré-uré.

2 Petrus 2:3 ပူးပေါင်းရင်းမြစ်များ

Matius 23:14

Icawangkuro mio' kamu sé makailek wutul in Torat wo sé tou Farisi! Kamu tou punek, ampa'paan pauwaken iow sé wéwéné balu e mandét im balé éra. Wo mengaakal sé tou ang karapi in sombayang lalambotan. Ampa'paan in itu kéréan oka miow en ukuman si uter keli.]

Lukas 18:8

Icua-Ku ai camu: Em perkara é tou sinisir-Na itu makala'us oka bélan-Na! Taan sa si Toyaang i Tou maai sumawel, ra'ipé' tantu sa Sia makérépé' tou sé maéman ai Sia ang kayo'baan anio'.”

Lukas 20:20

Wo si Yesus peméa-méan rékén é makailek wutul in Torat wo sé kikiiten é imam. Wo iru'du' éra mangé tou e mawere-weren si Yesus wo séra mapa in loor kéndo'. Sé tou itu mamuéi a si Yesus maké im buwuéien tanu kéndo' awéan si masalé' kailekan éra wosama' ro'na ta'kongen éra Sia. Wo sa Sia suméa' sumowat, isarakan éra oka Sia a si gubernur Romawi si makakawasa an sangkum itu en ukumen im patén.

Lukas 22:47

An tutuw i Yesus maroma'pé' wo rumumpakai sé sangareru' tou. Séra aipakawali mai i Yudas si esaan asé sangapulu' rua murit i Yesus. Si Yudas mawaya' an dior é tou itu wo sia sumusut angé a si Yesus wo cumiom Sia.

Yohanes 2:16

Wo icua i Yesus a sé mawangkér sé mombo, “Paalin wo icesot waya sé mombo wo en lalandangan. Tioo émaan iow em Balé i Amang-Ku mamuali pawangkéran.”

Roma 16:18

Ampa'paan sé tou tanu siitu ra'ica matawoi sumelewir si Kristus Apo'ta, taan séra matawoi asalo makiit ing kasalé'an éra in esa. Séra maroma' mapaké i roroma' matawér wo nunuwu' sé manam palingan, akar séra imuwako sé tou sama' en até.

2 Korintus 2:17

Kami ra'ica meputé wo sé kinakelian tou sé mengakua in abar i Amang Kasuruan e mangéré ing kauntungan in esa. Em paangé-angén ami lekep en até, ampa'paan si Amang Kasuruan e rumu'du' icami. Wo si Amang Kasuruan in esa en suméré sapaoka icami makua in abar itu tanu ata-ata i Kristus.

1 Tesalonika 2:5

Si Amang Kasuruan en sairi ami, kailekan-Na wutul en an untep in até ami. Kailekan iow ka'i in esa kami ra'ica kawisa numuwu' i nunuwuun sé asaloke' mengaarui sé tou, wo kami ra'- ica kawisa mawasa-wasa in lumongi' im baya-waya.

1 Tesalonika 5:3

Awéan en orasna sé tou eng kumua in tana'i, “Eng katouanta arui wo elur, ra'ica toro maindé-indé'.” Taan tumarépé'anke'mai séra tenan oka ing kawenduan meputé wo ing kawenduan si pinendam i wéwéné an tutuw i makéré toyaang. Sé tou itu ra'ica wana en icawekar asi kawenduan itu.

1 Timotius 3:3

ra'ica lalangun, ra'ica tae'bow taan sama' a sé tou, masalé' meelu-eluran wo sé kakélé in tou wo ra'ica ata in doit,

1 Timotius 3:8

Taniitu ka'i wo sé maselewir sé jamaat, séra sumémbong tumu'tul sé jamaat, em peri éra musti loor akar pasiriin é tou, ra'ica punek, ra'ica lalangun wo ra'ica longi'.

1 Timotius 6:5

meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

Titus 1:11

Sé tou tanu siitu musti iru'du'mu menes wosama' séra ra'io mengasusui sé ra'ica wana en torona. Ampa'paan sé pengasusui éra itu mengauwak sé tou wosama' séra ro'na makéré roit. Wo en sususuien éra itu lumicokoo sé keli pamalé'.

Titus 1:7

Sé mengatilik an jamaat en tawoienna mengatu'tul sé jamaat i Amang Kasuruan, sia musti menonou ra'ica wana e ro'na méé kaséaan, ra'ica tirayo, ra'ica tae'bow, ra'ica lalangun, ra'ica tampenokolen wo ra'ica ata in doit.

1 Petrus 2:8

Wo awéan ka'i en aipatic, “Si watu itu mamuali watu pasangkilan akar icawangkur.” Eng kaangéanna séra casangkil asi watu itu akar cawangkur ampa'paan séra ra'ica maéman wo ra'ica makiit in Taar i Amang Kasuruan, tanu siituo en aitantu mai i Amang Kasuruan ai séra.

1 Petrus 5:2

Téiran iow sé tou maéman a si Yesus sé aitoké i Amang Kasuruan ai camu. Téiran iow séra kaputé i gembala matéir sé dombana. Téiran iow séra ra'ica ampa'paan pinelesé' taan ang karapi in arui en até, kumiit ing kasalé'an i Amang Kasuruan. Wo tioo ampa'paan maéré-éré ing kalébéan, taan ang karapi i mauli-ulit tumawang iséra.

2 Petrus 1:16

Aisusuio ami ai camu andumoro' ing kawasa i Apo'ta Yesus Kristus wo andumoro' ka'i Sia maai sumawel. Sapa sé aisusui ami itu ra'ica sisisilen sé asalo niéma' é tou, ampa'paan icamio in esa en suméré ing kawangko'-Na.

2 Petrus 2:1

Indior, an uner é tou i Amang Kasuruan, imapaturu'o sé nabi ra'ica wutul. Tanu siituo ka'i an uner iow, mapaturu' oka mai ka'i sé guru ra'ica wutul. Em paangé-angén éra en sumusui in sususuien mengasélé'kow si mengawali sé tou am papaté. Sé guru ra'ica wutul itu mengakélong si Apo' Yesus si Makakawasa si tumu'buso ing kamesé-meséaan éra. Ampa'paano in itu, séra makala'us oka patén.

2 Petrus 2:9

Anaé, ro'na kailekanta sapaoka si Amang Kasuruan tumawang sé tou sé masiri' Sia an tutuw séra am pangepé'an, wo sume'sek sé tou léwo' in ukumen asi endo Sia mai makim pakasa in tou.

Yudas 1:11

Icawangkuro mio' séra! Ampa'paan séra kumiito in lalan si suméa' meputé wo in lalan si kiniit i Kain. Séra ka'i mengaéma' ing kamesé-meséaan tanu si Bileam imengaéma' ing kamesé-meséaan si masalé-salé'ke' makéré roit. Wo séra patén ampa'paan masundur si Casuruan kaputé i Korah.

Yudas 1:15

Wo susur in tou akimen-Na oka wo mukum sé tou mengaéma' ing kamesé-meséaan, ampa'paan pakasa eng kaléwo'- an sé pinengaéma' éra wo pakasa em pakaroma' éra mengawawa' wo mengawuruk i ngaran i Amang Kasuruan.”

Yudas 1:16

Séra itu mengimbuluke' wo mengawéé séa' a sé tou walina, taan séra in esa menonou makiit ing kasalé'an in owak éra mengaéma' ing kamesé-meséaan. Séra manuwu' mengaangkai in owak in esa wo manuwu' maarui sé tou walina e mekéré in untung.

Yudas 1:4

Icuaku in taniitu, ampa'paan awéan tou sé sumolisipo mai an uner iow. Séra itu sé tou ra'ica makiit in lalan i Casuruan. Séra itumerimao in upus aitambér i Amang Kasuruan taan ra'ica pengakiiten éra eng kasalé'an-Na, wo isuméa' mengapaké in upus aitambér-Na itu wosama' ro'na isalu éra eng kasalé'- an in owak éra sé ra'ica loor. Wo ka'i ra'ica pangakun éra sapaoka wayake' si Yesus Kristus si Makakawasa wo Apo'ta. Sé tou tanu isérao sé indioré'wo aitantuo makéré oka in ukuman.

Yudas 1:7

Taniitu ka'i eng kota Sodom wo eng Gomora wo sé kota an sangkumna. Sé tou a mangé mbitu mengaéma' sé meputé wo im pinengaéma' é malaékat itu, ampa'paan séra mengabersina wo maéma' ing kasalé'an in owak sé ra'ica loor. Ampa'paan in itu séra makéré in ukuman an api si ra'ica mape'de-pe'del akar ing kauré-uré, en itu mamuali popokéi a sé pakasa in tou.